საკრებულოს მოქმედი წევრი ლელა ჩახვაძე, რომელიც ამჟამად ლანჩხუთში პარტია ,,სტრატეგია აღმაშენებელს” წარმოადგენს, განცხადებას ავრცელებს და საკრებულოს ჯერ კიდევ პირველ პირს ბესიკ ტაბიძეს რიგ ბრალდებებს უყენებს.
„ჩემს წინააღმდეგ ბესო ტაბიძემ ჩაატარა სპეცოპერაცია. 27 რიცხვში ავტომანქანიდან, 400 ცალი ფლეიერი მომპარეს ჩემი და ბატონი გიორგი ვაშაძის დასურათებით (რამდენიმე დარიგებული მქონდა და რამდენიმე დამრჩა).
2020 წლის არჩევნებში ,,სტრატეგია აღმაშენებელმა” ლანჩხუთის რაიონში მიიღო 400 ხმა და ახლა, როცა, როგორ ვმუშაობდი ხედავდა მთელი ლანჩხუთი, ასეთი შედეგი რის მიზეზიცაა, გასაგები იყო ჩემთვის, მაგრამ ამაში ასეთი დოზით ჩართული თუ იქნებოდა მოქმედი საკრებულოს თავმჯდომარე, ბესო ტაბიძე არ მეგონა.
დადიოდა თურმე სოფელში თითონ და მისი ხალხი ღამღამობით და ჩემს ახლობლებს, ოპოზიციურად განწყობილ მოსახლეობას, ეუბნებოდა, მაგას სხვა თანამდებობაზე ვნიშნავთ არჩევნების შემდეგო, მაგის პარტია ვერ გავა დაკარგული ხმებიაო. ხოლო მის საახლობლოს, ლელას დავასამარებ და ვინ ვერ გავა საკრებულოს თავმჯდომარედ მაგას დავანახებო“, _ ამბობს მის მიერ გავრცელებულ განცხადებაში ლელა ჩახვაძე, რომელიც ტაბიძეს შვილთან დაკავშირებულ შემთხვევას უხსენებს, მაშინ გვერდით დავუდექიო და კორუფციაშიც ადანაშაულებს: „ტენდერში ხელის ჩამყოფო, ბიუჯეტიდან 60%-მდე მხოლოდ შენს ადმინისტრაციულ ერთეულში გაქვს წაღებული და იქიდან 20% შენს ჯიბეშია წასული, როგორც ამაზე საზოგადოების დიდი ნაწილი საუბრობს“.
ლელა ჩახვაძე იმასაც ამბობს, რომ კომისიის წევრები, რომლებიც „სტრატეგია აღმაშენებელს“ წარმოადგენდნენ ზეწოლას განიცდიდნენ მმართველი ძალის მხრიდან.
„ისეთი არჩევნები ჩაატარა ხელისუფლებამ, 5 დღეა, ოქმი არ არის დაწერილი. იმიტომ კი არა, რომ სხვაზე ნაკლები საოლქო არის ლანჩხუთში, იმიტომ, რომ ხელისუფლება ვერ იმეტებს ოპოზიციისთვის კუთვნილ ადგილს. 600 ბიულეტენი ბათილია. ჩემი კომისიის წევრებზე სერიოზული ზეწოლები იყო. გაცილებით დიდი არამზადული დახვეწილი მეთოდებით არის გაყალბებები, რაც კი დღემდე, რომელიმე ხელისუფლებას გაუკეთებია. დღეს ეს, ხვალ კიდევ სხვა იქნება“, _ დასძენს ლელა ჩახვაძე.
ლელა ჩახვაძის მხრიდან გაჟღერებულ ბრალდებებთან დაკავშირებით „გურია ნიუსი“ კომენტარისთვის თავად ბრალდებების ადრესატს ბესიკ ტაბიძეს დაუკავშირდა.
ტაბიძემ, ფაქტობრივად, კომენტარიც არ გააკეთა მის მიმართ გაჟღერებულ ბრალდებებთან დაკავშირებით.
„საკუთარ სოფელში, ნინოშვილში ლელა ჩახვაძემ სულ 7 ხმა აიღო, აქედან ოთხი საკუთარი ოჯახიდან. ასე რომ, დასკვნებიც თავად გააკეთეთ. არ ვაპირებ რაიმე ვუპასუხო“, _ გვითხრა ბესიკ ტაბიძემ.
[sexy_author_bio]
