ამ ეტაპზე უცნობია, როდის გაიმართება 80 წლის ქალის მკვლელობაში ბრალდებული 20 წლის მამაკაცის სასამართლო პროცესი. დაკავებულის ადვოკატი “გურია ნიუსთან” საუბრის დროს ამბობს, რომ ზ.დ. ამ ეტაპზე დუმილის უფლებით სარგებლობს.
“ჯერჯერობით, ვერაფერს გეტყვით. ისიც, არ არის ცნობილი ამ ბიჭმა მოკლა თუ არა 80 წლის ქალი. ის იყენებს დუმილის უფლებას”, _ გვითხრა დავით მამალაძემ.
შეგახსენებთ, რომ ოზურგეთის მუნიციპალიტეტის სოფელ მელექედურში 80 წლის ი.ხ. საწოლში გაგუდული იპოვეს.
სასტიკი მკვლელობისა და ქურდობის ფაქტზე შსს-მ 20 წლის ახალგაზრდა დააკავა. აღნიშნულის შესახებ განცხადებას შსს-ს პრესსამსახური ავრცელებს.
შინაგან საქმეთა სამინისტროს გურიის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, განზრახ მკვლელობისა და ქურდობის ბრალდებით 1999 წელს დაბადებული ზ.დ. დააკავეს. დანაშაული 7-დან 15 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა ოზურგეთის მუნიციპალიტეტის სოფელ მელექედურში, საცხოვრებელ სახლში, 1941 წელს დაბადებული ი.ხ. გაგუდა, ხოლო ამავე საცხოვრებელი სახლის ეზოდან ავტომობილი მოიპარა. მოგვიანებით აღნიშნული ავტომობილი მიატოვა და შემთხვევის ადგილიდან მიიმალა.
სამართალდამცველებმა გატაცებულ ავტომობილს მომხდარიდან მალევე, ოზურგეთის მუნიციპალიტეტის სოფელ თხინვალში მიაკვლიეს.
პოლიციამ ამავე სოფელში დააკავა ბრალდებული ზ.დ. დაკავებული აღიარებს ჩადენილ დანაშაულს. გამოძიება განზრახ მკვლელობისა და ქურდობის ფაქტებზე, საქართველოს სსკ-ის 108-ე და 177-ე მუხლებით მიმდინარეობს.
