გუშინ კატარის მუნდიალზე მერვედფინალური ეტაპის დასკვნითი ორი შეხვედრა გაიმართა. მაროკოს ნაკრებმა კიდევ ერთხელ დაამტკიცა, რომ ამ ჩემპიონატზე სერიოზული ძალაა და ესპანეთის ეროვნული გუნდი ვადაზე ადრე შინ გაუშვა. ამ შეხვედრის ძირითადი და დამატებითი დრო ფრედ – 0:0 დასრულდა. თერთმეტმეტრიანების სერიაში უფრო ზუსტი აფრიკული გუნდი აღმოჩნდა – 3:0.
პორტუგალიის ეროვნულმა გუნდმა შვეიცარიასთან მატჩი ბოლო დროს სხვადასხვა კონფლიქტებში გარეული კრიშტიანო რონალდოს გარეშე დაიწყო და შვეიცარიის ნაკრებს ფაქტობრივად ცალკარა ფეხბურთი ეთამაშა – 6:1. „ვარსკვლავთბიჭუნა“ მინდორზე 74-ე წუთზე გამოჩნდა, როდესაც პორტუგალიელთა სასარგებლოდ უკვე ყველაფერი გადაწყვეტილი იყო.
მეოთხედფინალში პორტუგალიის ნაკრები მაროკოს დაუპირისპირდება.
კატარის მუნდიალის მერვედფინალურ შეხვედრაში ბრაზილიის ნაკრებმა სამხრეთ კორეას დამაჯერებლად სძლია და ეს წარმატება „ფეხბურთის მეფე“ – პელეს მიუძღვნა, რომელსაც ბოლო დღეებია ჯანმრთელობასთან დაკავშირებით სერიოზული პრობლემები გააჩნია.
თამაშის შემდეგ ბრაზილიის ნაკრების ფეხბურთელებმა მოედნის ცენტრში პელეს მხარდამჭერი ბანერი გაიტანეს, რომელიც საავადმყოფოში კიბოს ებრძვის.
პელემ მატჩს უყურა და ნათესავების მეშვეობით მათ მადლობა გადაუხადა: „ეს შვებისა და ბედნიერების ნაზავია. მათ ჩემი დღევანდელი დღე ბედნიერებით სავსე გახადეს“.
ექიმების თქმით, პელეს მდგომარეობა სტაბილური გახდა და თავს უკეთ გრძნობს.
ბრაზილია – სამხრეთ კორეის შეხვედრა ნეიმარმა და ვინისიუსმა შეაფასეს.
ნეიმარი: „ძალიან შემეშინდა ტრავმის გამო, რადგან მანამდე ყველაფერი ძალიან კარგად მიდიოდა, ძალიან კარგი სეზონი მქონდა. უკიდურესად უსიამოვნო იყო ასეთი დაზიანების მიღება, მთელი ღამე ვტიროდი, ჩემმა ოჯახმა ეს იცის, მაგრამ ყველაფერი გამოვიდა და დავბრუნდი. დროა, უფრო შორს წავიდეთ, ვიდრე – წინა მუნდიალზე. ვოცნებობთ ამ თასის მოგებაზე, თუმცა, ნაბიჯ–ნაბიჯ უნდა ვიაროთ. ეს ჩვენი მეოთხე მატჩი იყო და კიდევ სამი დარჩა. კარგად ვართ მომზადებული და ტიტულზე ვართ ორიენტირებული“.
ვინისიუსი: „ყოველი მატჩის შემდეგ უფრო თავდაჯერებულები ვხდებით. ბევრი მაღალი დონის ფეხბურთელი გვყავს, რომლებსაც შესანიშნავად თამაში შეუძლიათ. იმედი მაქვს, რომ ცეკვას ბოლომდე გავაგრძელებთ. გვინდა პელეს ჩავეხუტოთ: მას ახლა ჩვენი თანადგომა სჭირდება. ამ გამარჯვებას მას ვუძღვნით. გვჯერა, რომ ის შეძლებს რთული სიტუაციიდან გამოსვლას. მსოფლიოს ჩემპიონები მისთვისაც უნდა გავხდეთ“.
სამხრეთ კორეასთან გატანილი ყოველი გოლი ბრაზილიელმა ფეხბურთელებმა ცეკვით აღნიშნეს. თვით 61 წლის მწვრთნელმა ტიტემაც კი იცეკვა.
სამხრეთამერიკელთა ეს ზეიმი „მანჩესტერ იუნაიტედის“ ყოფილ ნახევარმცველ როი კინს სასტიკად არ მოეწონა.
„ვერ ვიჯერებ, რასაც ვუყურებ. ცხადია, ბრაზილია ბრწყინვალედ თამაშობს. ფანტასტიკური დაბოლოება ვინისიუსისგან პირველი გოლისას, თამაშის შესანიშნავი დასაწყისი, მაგრამ არასოდეს მინახავს ამდენი ცეკვა. ეს „ცეკვავენ ვარსკვლავებს“ ჰგავს.
მე ეს არ მომწონს. ხალხი ამბობს, რომ ეს მათი კულტურაა, თუმცა ვფიქრობ, მოწინააღმდეგის უპატივცემულობაა. უკვე ოთხი გაიტანეს და ყოველი გოლის შემდეგ იცეკვეს. მე არც ისე ძლიერ გამაღიზიანა პირველი გოლის მერე ზეიმმა, შემდეგი აღნიშვნისას მწვრთნელი უნდა ჩარეულიყო, მაგრამ მანაც იგივე გააკეთა. ამით უკმაყოფილო ვარ. არ ვფიქრობ, რომ ეს საერთოდ ლამაზია. მხოლოდ დროის საკითხია, ამ ბრაზილიელთაგან რომელიმეს ვინმე ოდესმე გალახავს“, _ განაცხადა როი კინმა.
ბრაზილიის ნაკრებთან 2022 წლის მუნდიალის მერვედფინალური მატჩი სამხრეთ კორეის მთავარი მწვრთნელის რანგში პაულო ბენტოსთვის ბოლო აღმოჩნდა.
მატჩის შემდეგ მან განაცხადა, რომ დაკავებულ თანამდებობას ტოვებს და რომ ეს გადაწყვეტილება ჯერ კიდევ სექტემბერში იყო მიღებული. 53 წლის დამრიგებელმა ფეხბურთელებსა და ფედერაციის პრეზიდენტს ყველაფრისთვის მადლობა გადაუხადა.
გუშინ, ურუგვაის ფეხბურთის ფედერაციის პრეზიდენტმა 2022 წლის მსოფლიო ჩემპიონატზე დასაქმებული მსაჯები გააკრიტიკა.
„ორი მსაჯი, რომლებმაც ურუგვაის წინააღმდეგ სერიოზული შეცდომა დაუშვეს, მუნდიალზე ვეღარ იმუშავებს. მსგავსი სკანდალები სხვა ჯგუფებშიც მოხდა. ვიღაცამ რონალდოს გვერდით დაახველა და იმწამსვე პენალტი დადეს,“ _ განაცხადა იგნასიო ალონსომ.
ურუგვაის ფეხბურთის ფედერაციის პრეზიდენტი პორტუგალიისა და განას მატჩს გულისხმობდა, რომელიც პირველ ტურში შედგა. იმ შეხვედრაში რონალდომ აფრიკულ გუნდთან თერთმეტმეტრიანი მოიპოვა და გოლადაც გარდასახა.
რაც შეეხება კრიტიკის მიზეზს. მესამე ტურში ედინსონ კავანის წაქცევისთვის მსაჯმა პენალტი არ დანიშნა, არადა, საკამათო ეპიზოდი იყო, ვინ იცის შეიძლება ურუგვაის თერთმეტმეტრიანი გაეტანა და ფლეი–ოფის საგზურიც მოეპოვებინა.
ცნობილი გახდა, რომ ფიფამ ურუგვაის ნაკრების ფეხბურთელების, ედინსონ კავანის, ხოსე მარია ხიმენესის, ფერნანდო მუსლერასა და დიეგო გოდინის, ასევე, ურუგვაის ფეხბურთის ასოციაციის მიმართ გამოძიება დაიწყო.
საქმე ეხება განასთან მატჩის შემდეგ მომხდარ ინციდენტს, როდესაც კავანიმ VAR-ს მონიტორი წააქცია, ხიმენესმა სავარაუდოდ, მატჩის ოფიციალურ პირს ფიზიკური შეურაცხყოფა მიაყენა, ხოლო გოდინი და მუსლერა მსაჯის მიმართ აგრესიას გამოხატავდნენ.
„ფიფას სადისციპლინო კომისიამ ურუგვაის ფეხბურთის ასოციაციის წინააღმდეგ საქმის წარმოება დაიწყო სადისციპილინო კოდექსის მე-11 (შეურაცხმყოფელი ქცევა და სამართლიანი თამაშის პრინციპების დარღვევა), მე-12 (მოთამაშეებისა და ოფიციალური პირების არასათანადო ქცევა) და მე-13 (დისკრიმინაცია) მუხლების შესაძლო დარღვევაზე, 2 დეკემბერს, განისა და ურუგვაის ნაკრებების მატჩის დროს მომხდარ ინციდენტებთან დაკავშირებით. ცალკე საქმე აღიძრა ურუგვაელი ფეხბურთელების, ხოსე მარია ხიმენესის, ედინსონ კავანის, ფერნანდო მუსლერასა და დიეგო გოდინის წინააღმდეგ სადისციპლინო კოდექსის მე-11 და მე-12 მუხლების პოტენციურ დარღვევაზე“, – ნათქვამია განცხადებაში.
მანამდე მედიაში გავრცელდა ინფორმაცია, რომლის მიხედვით ხიმენეს 15-მატჩიანი დისკვალიფიკაცია ემუქრება. სხვა ფეხბურთელების მოსალოდნელი სასჯელი ჯერჯერობით უცნობია.
ინგლისის საფეხბურთო ნაკრების ყოფილმა თავდამსხმელმა ალან შირერმა მსოფლიოს ჩემპიონატის მეოთხედფინალში საფრანგეთთან მატჩზე კომენტარი გააკეთა და აღნიშნა, რომ სანერვიულო უფრო მეტად მეტოქეს ექნება.
„ინგლისი თავდაჯერებული უნდა იყოს. სენეგალთან მოგებულ მატჩში ყველაფერი იდეალურად იყო, თუ არ ჩავთვლით საწყის 25-30 წუთს, როდესაც თამაშში ჩართვა პიკფორდსაც მოუხდა. დაფასება სჭირდება მწვრთნელის ქმედებებსაც: სწორი საკადრო გადაწყვეტილებები მიიღო, რომლებმაც მაგრად იმუშავა.
საფრანგეთის ნაკრები პატივისცემას ნამდვილად იმსახურებს, შეიძლება მათი თამაშით აღფრთოვანდე კიდეც, თუმცა, შიში საჭირო არაა. არავითარ შემთხვევაში. დაე, მათ ეშინოდეთ ჩვენი. შეხედონ ჩვენს შემადგენლობას და იქნებ თქვან კიდეც: „ოჰო, რა ბიჭები შეურჩევიათ!“.
მბაპე მართლაც ძალიან კარგია, მაგრამ ჩვენც ხომ ძალიან მაგარი შემტევი ფეხბურთელები გვყავს. მათ შეუძლიათ სასტარტოდან დაიწყონ ანაც თამაშში სათადარიგოთა სკამიდან ჩაერთნონ და მაინც დიდი სარგებელი მოიტანონ“.
52 წლის ალან შირერი ინგლისის ნაკრების ღირსებას 1992-2000 წლებში იცავდა და 63 მატჩში 30 გოლი აქვს გატანილი.
ახლო წარსულში ცნობილი კამერუნელი თავდამსხმელი, ამჟამად ამავე ქვეყნის ფეხბურთის ფედერაციის პრეზიდენტი სამუელ ეტო‘ო უსიამოვნო ინციდენტში გაეხვა.
ის ბრაზილიისა და სამხრეთ კორეის მატჩის შემდეგ სტადიონს ტოვებდა, როდესაც ალჟირელ „იუთუბერთან“ კონფლიქტი მოუვიდა.
კამერუნს მუნდიალზე მოსახვედრად გადამწყვეტი მატჩი ალჟირთან ჰქონდა, იქ კი მთავარმა არბიტრმა ბაკარი გასამამ ეტო‘ოს გუნდის სასარგებლოდ რამდენიმე საკამათო გადაწყვეტილება მიიღო.
ალჟირელებმა მაშინ მსაჯი გააკრიტიკეს, „იუთუბერი“ კი სამუელს სწორედ ამ მატჩისა და მსაჯის შესახებ არასასურველ კითხვებს უსვამდა, რასაც ეტო‘ოს გაღიზიანება მოჰყვა.
ავტორი
