ბრაზილიის ნაკრებს გვარდიოლა ჩაიბარებს?

გუშინ, გამოცემასთან „Napoli Magazine“ „ნაპოლის“ ყოფილმა ფეხბურთელმა ჯანფრანკო ძოლამ ხვიჩა კვარაცხელიას შესახებ ისაუბრა.
„კვარაცხელია ის ფეხბურთელია, რომელმაც ჩემზე ყველაზე დიდი შთაბეჭდილება მოახდინა! მისი სახით დიდი სიურპრიზი ვიხილეთ და მან ლუჩიანო სპალეტის „ნაპოლის“ დიდი ხარისხი შესძინა. გამაოცა მისმა საფეხბურთო ინტელექტმა. ხვიჩა არის ძალიან ტექნიკური, კრეატიული და მოწესრიგებული მოთამაშე,“ – განაცხადა ჯანფრანკო ძოლამ.
გუშინ, ესპანურმა გამოცემამ „SPORT“ საინტერესო ინფორმაცია გაავრცელა. მას შემდეგ, რაც ბრაზილიის ნაკრების მთავარი მწვრთნელის თანამდებობა ტიტემ დატოვა, ქვეყნის ფეხბურთის ფედერაცია ერთ-ერთ ვარიანტად პეპ გვარდიოლას განიხილავს.
უახლოეს დღეებში ბრაზილიის ფეხბურთის ფედერაცია გვარდიოლასთან დაკავშირებასა და მასთან სხვადასხვა დეტალებზე საუბარს გეგმავს. ცნობილია, რომ თავად ესპანელმა ფეხბურთის სპეციალისტმა რამდენიმე დღის წინ „მანჩესტერ სიტისთან“ კონტრაქტი გაახანგრძლივა.
ისტორიულად მიღებულია, რომ ბრაზილიის ნაკრებში მხოლოდ ბრაზილიელი მწვრთნელები ინიშნებიან. ამ ქვეყნის ეროვნული გუნდის ჩაბარების კანდიდატებად „ფლუმინენსეს“ მწვრთნელი ფერნანდო დინიზი, „გრემიოს“ თავკაცი რენატუ პორტალუპი და „სან პაოლოს“ მწვრთნელი როჟერიო სენი განიხილებიან. ამის მიუხედავად, კიდევ ერთი წარუმატებლობის გათვალისწინებით, რომელიც ტიტეს გადახდა თავს, ბრაზილიის ფეხბურთის ფედერაცია ევროპელი მწვრთნელის დანიშვნის შესაძლებლობასაც გაითვალისწინებს.
ბრაზილიის ნაკრებმა კატარის 2022 წლის მსოფლიო ჩემპიონატზე ჯგუფური ეტაპი წარმატებით გაიარა, მერვედფინალში სამხრეთ კორეასაც მოუგო, თუმცა მეოთხედფინალურ სტადიაზე ხორვატიასთან წააგო და ტურნირს ვადაზე ადრე დაემშვიდობა.
გუშინვე, არანაკლებ საინტერესო ინფორმაცია გაავრცელა გამოცემამ „sport.es“. აღმოჩნდა რომ ბელგიის ნაკრების მთავარი მწვრთნელის პოსტზე საფრანგეთის ნაკრების ყოფილი თავდამსხმელი ტიერი ანრის კანდიდატურა იხილება.
მსოფლიოს 2022 წლის ჩემპიონატის დატოვების შემდეგ ბელგიის ნაკრების მთავარი მწვრთნელის პოსტი რობერტო მარტინესმა დატოვა. ანრი ბოლო წელიწადნახევრის განმავლობაში მის თანაშემწედ მუშაობდა.
45 წლის ტიერი ანრი თავის სამწვრთნელო კარიერაში დამოუკიდებლად ფრანგულ „მონაკოსა“ და კანადურ „მონრეალს“ წვრთნიდა.
ცნობილი გახდა რომ კანდიდატების არჩევისას ბელგიის საფეხბურთო ასოციაციის ხელმძღვანელობა ნაკრების ამჟამინდელი ლიდერების – ტიბო კურტუას, რომელუ ლუკაკუსა და კევინ დე ბრუინის აზრს გაითვალისწინებს.
გუშინ ცნობილი გახდა, რომ ბელგიის ნაკრების თავდამსხმელმა, 31 წლის ედენ აზარმა სანაკრებო კარიერა დაასრულა.
ედენ აზარმა ბელგიის ნაკრებში 126 მატჩი ჩაატარა და 33 გოლი გაიტანა.
„დღეს მე გვერდი გადავშალე. მადლობა თქვენი სიყვარულისთვის, უდიდესი მხარდაჭერისთვის. მადლობა იმ ბედნიერებისთვის, რომელსაც ერთად ვიზიარებდით 2008 წელს. მე დავასრულე საერთაშორისო კარიერა. ახალი თაობა მოდის. მოვიწყენ უთქვენოდ.“ – დაწერა აზარმა სოციალურ ქსელში.
კატალონიის „ბარსელონა“ კი ნახევარდაცვის გასაძლიერებლად ახალ მოთამაშეებს ეძებს. აღმოჩნდა, რომ მაროკოს ეროვნული გუნდის ფეხბურთელი აზედ უნაჰი მათთვის მისაღები ვარიანტია.
ფრანგული „ანჟერის“ ნახევარმცველი კატარის მუნდიალზე მაროკოს ნაკრების შემადგენლობაში ერთ-ერთი ყველაზე გამორჩეული მოთამაშეა. მისი ამჟამინდელი ღირებულება 5 მილიონი ევროა, თუმცა მსოფლიო ჩემპიონატზე წარმატებული თამაშის შემდეგ ივარაუდება, რომ მისი ღირებულება ერთი-ორად გაიზრდება.
გუშინ ცნობილი გახდა რომ „პარი სენ ჟერმენის“ კარის დარაჯი კეილორ ნავასი შესაძლოა მიუნხენის „ბაიერნში“ გადავიდეს, რომელსაც ძირითადი მეკარე მანუელ ნოიერი სეზონის ბოლომდე გამოაკლდა. წინა კვირას ნოიერმა თხილამურებით სრიალისას ფეხი მოიტეხა.
კეილორ ნავასს „პსჟ“-ში სათამაშო პრაქტიკა არ აქვს და კლუბის დატოვება თავადაც სურს. „ბაიერნს“ ასევე დაუკავშირეს დომინიკ ლივაკოვიჩი, რომელმაც მსოფლიოს ჩემპიონატზე ხორვატიის ნაკრების რიგებში თავის გამოჩენა შეძლო.