“ბრძანებები“და “გაფრთხილებები“ შერჩევით _ “საქმეს სჭირდებოდა და იმიტომ იყვნენ დასაქმებულები“

ოზურგეთის მუნიციპალიტეტის ა(ა)იპ-ებში რეორგანიზაცია თითქმის დასრულებულია. ა(ა)იპ-ები წლების წინ, “ნაციონალური მოძრაობის“ მმართველობის პერიოდში წინასაარჩევნოდ შეიქმნა, ტენდენცია იმისა, რომ წინასაარჩევნოდ დაასაქმონ კოორდინატორები თუ მხარადმჭერები,  დღესაც გრძელდება. ა(ა)იპ-ებში დასაქმებულთა ყოველთვიური ანაზღაურება საკმაოდ სოლიდურია.

ამ მხრივ ერთ-ერთი გამორჩეული აიპი „ქალაქ ოზურგეთის მუნიციპალიტეტის სერვისცენტრი იყო, როემლსაც დაფინანსება ყოველ წელს ემატებოდა.

ჩვენი წყაროს ინფორმაციით, რეორგანიზაციის დროს, დირექტორმა იმ თანამშრომლებს, რომლებიც წინასაარჩევნოდ დაასაქმეს, გაფრთხილებები მისცა, ხოლო მათ სახელზე, ვინც წლებია მუშაობდნენ აღნიშნულ ა(ა)იპ-ში ბრძანებები დაიწერა. თანამშრომელთა ინფორმაციით, “სერვისცენტრში“ წინასაარჩევნოდ უკონტროლო სიტუაცია იყო. მათ არასდროს უნახავთ ის პირები, ვინც წინასაარჩევნოდ სპეციალისტებად იყვნენ გაფორმებულები. ასეთი კი, დაახლოებით, 30 კაცი მაინც იქნებოდა.

“ფაქტობრივად, ჩვენი სამსახური იყო შტაბი. იბარებდნენ კოორდინატორებს და აკონტროლებდნენ სიებს, რამდენი “უხილავი“ თანამშრომელი იყო, რომლებიც ჩვენ თვალად არ გვინახავს. ეს ყველაფერი კი დირექტორის და კადრების განყოფილების  უფროსის ხელში გადიოდა“, _ ამბობს ჩვენი წყარო.

თუ რამდენი თანამშრომელი იყო სულ “სერვიცენტრში“, აქედან რამდენი იყო “ხილული“ და “უხილავი“, რით ამოარჩიეს თანამშრომლები, ვისთვისაც ბრძანებები დაიწერა , რა დაიმსახურეს იმათმა, ვისაც გაფრთხილებები დაურიგეს, აღნიშნული ინფორმაციის მოსაპოვებლად,  თავდაპირველად “ გურია ნიუსი“ “სერვისცენტრის“ იურისტს გიორგი ანთაძეს დაუკავშირდა.  

_ არ მახსოვს მოიცადეთ,  გადავრეკავ და გაგიგებთ, _გვითხრა იურისტმა. თუმცა, რამდენიმე წუთში  გვიკავშირდება და დირექტორთან გვამისამართებს.

ამის შემდეგ ვუკავშირებით კადრების განყოფილების უფროსს იზო გოგელიას, რომელიც გვეუბნება, რომ საჭესთან ზის და მოგვიანებით დაგვიკავშირდება. თუმცა, მან არც დაგვირეკა და ჩვენს სატელეფონო ზარებსაც აღარ უპასუხა.

„გურია ნიუსი“  დაუკავშირდა გოგიტა დოლიძეს, რომელიც სერვისცენტრის დირექტორის  მოადგილე იყო კომუნალურ საკითხებში. რადგან გვქონდა ინფორმაცია, რომ თავად იბარებდა წინასაარჩევნოდ დასაქმებულ პირებს და აძლევდა დავალებებს, აკონტროლებდა სიებს:

_ მე არ ამიყვანია არცერთი ახალი თანამშრომელი, არც არავის ვიბარებდი, არაფერს ვაკონტროლებდი, ამისთვის ბატონ ვოვას უნდა მიმართოთ, გვითხრა დოლიძემ.

„ოზურგეთის სერვისცენტრის“ ყოფილი დირექტორი ვოვა სალუქვაძე, რომელიც დღესაც თანამდებობას ელოდება (ჩვენი ინფორმაციით, იგი კვლავ დასუფთავების სამსახურში ქალაქს ჩაიბარებს), “გურია ნიუსთან“ უარყოფს ინფორმაციას, რომ მან წინასაარჩევნოდ დაასაქმა პირები. როგორც სალუქვაძე ამბობს, ადამიანები დასაქმდნენ საჭიროების მიხედვით:

_ გპასუხობთ,  სულ 151 თანამშრომელი მყავდა, აქედან 7 თანამშრომელი მყავს შტატში, დანარჩენ პირებს, რეორგანიზაციისა და შრომითი ხელშეკრულებებით გათვალისწინებული კანონით,  შეუწყდათ შრომითი კონტრაქტი,  შრომითი ურთიერთობები. ეს ჩვეულებრივად შესაძლებელია რეორგანიზაციის პროცესში. თუ რამდენია ასეთი პირი, ზუსტ ციფრთან დაკავშირებით მომმართეთ ოფიციალურად და მოგიმზადებთ მაგ კითხვაზე პასუხს, ამბობს სალუქვაძე და ასევე, არ გვცემს პასუხს, თუ რამდენი პირი ჰყავდა წინასაარჩევნოდ დასაქმებული:

_ ვერ დაგეთანხმები ამაში, საქმის მოთხოვნილებიდან გამომდინარე ხდებოდა ადამიანების დასაქმება,  რასაც ითვალისწინებს კონტრაქტი შრომითი ხელშეკრულების. კიდევ ერთხელ გეტყვით, საქმეს ესაჭიროებოდა და იმიტომ იყვნენ დასაქმებულები, ისინი სამსახურში დადიოდნენ. იყვნენ პირები, ვინც მაგ დროს დავასაქმეთ, თუმცა, ამას მოითხოვდა საჭიროება. ვინც მუშაობდა ჩვენთან ყველა თავის სამუშაოს ეწეოდა. თუკი მეკითხებით, მაშინ პასუხს უნდა დაუჯეროთ. შემოდით წერილობითი მოთხოვნით და გიპასუხებთ. ინფორმაციას ასე ვერ მოგცემთ. ზუსტი ციფრი არ მახსოვს.

_ ბატონო ვოვა, რომ დაავალოთ იურისტებს ან კადრების უფროსს მოგვაწოდოს ინფორმაცია?

_ მე უნდა დამიჯეროთ,  იგეგმება ეფექტური ორგანიზაციის ჩამოყალიბება.

_ აქამდე არ იყო ეფექტური?

_ მაგაში ვერ დაგეთანხმებით

_ ბატონო ვოვა,  თქვენ რა თანამდებობაზე მოიაზრებით?

_ ამ კითხვაზე პასუხი არ მაქვს, ხომ შეიძლება დღეს არ მქოდეს პასუხი, მაგრამ ხვალსითვის ვიყო მზად, _ ამბობს სალუქვაძე.