ოზურგეთელი ქეთევან ჯინჭარაძე უკრაინაში 6 წელია, რაც ოჯახის წევრებთან ერთად ცხოვრობს. ის კიევთან ახლოს ბუჩაში იმყოფება.
“გურია ნიუსი“ სოციალური ქსელით დაუკავშირდა ქეთევან ჯინჭარაძეს. მისი თქმით, რუსი ოკუპანტები ყველაფერს აკეთებენ იმისთვის, რომ მშვიდობიან მოსახლეობას, რაც შეიძლება მეტი პრობლემა შეექმნას.
“უფრო მეტად სოციალურ ქსელში ვეცნობი ამბებს და ვკითხულობ. სახლიდან ვერ გავდივართ. დილიდან სროლები და აფეთქებებია. მეგობარმა დამიკავშირდა და მითხრა, რომ ბუჩიდან ირპინში გადმოსასვლელი ხიდი ააფეთქეს,“ – გვითხრა ქეთევან ჯინჭარაძემ.
ქეთევან ჯინჭარაძე ჩვენთან საუბრის დროს უკრაინის პრეზიდენტ ვოლოდიმირ ზელენსკის გმირს უწოდებს.
“ვოლოდიმირ ზელენსკის იმედი გვაქვს და იმ ადამიანების, რომლებიც ყოველდღიურად იცავენ უკრაინას. აქ, რაც სოლიდარობა არის, არსად არ მინახავს. პრეზიდენტი ზელენსკის ყოველი გამოჩენა იმედს გვაძლევს და ის არის ჩვენი დროის გმირი, უკრაინაში არის ერთიანობა და ეს ომი უნდა მოვიგოთ ჩვენ. “
ჩვენი რესპონდენტი საუბრის დასასრულს მსოფლიოს და რუსეთის პრეზიდენტს მიმართავს.
“დროულად შეწყვიტონ ეს ომი და უდანაშაულო ხალხის ხოცვა. მსოფლიომ მიიღოს მკაცრი ზომები. რაც შეეხება ვლადიმერ პუტინს მას არ უყვარს ადამიანები და ეს მან არაერთხელ დაამტკიცა. საქართველოს ტერიტორიების 20 პროცენტი მას აქვს დაკავებული და ახლა უკრაინის ხელში ჩაგდება უნდა. არ გამოუვა პუტინს მისი გეგმის შესრულება. მშვიდობა გვინდა, სიმშვიდეში ცხოვრება და განვითარება, პუტინი კი ომის მომხრეა,“ – გვითხრა ქეთევან ჯინჭარაძემ.
[sexy_author_bio]
