“ბჟუჟის ადიდებისას მეზობლებთან ვათევ ღამეს!” _ სანაპიროსთან მცხოვრებს წალეკვა ემუქრება

ოზურგეთის მუნიციპალიტეტის სოფელ წითელმთის მკვიდრის გერმანე თოდრაძის ეზოს გასწვრივ მდინარე ბჟუჟი ჩამოედინება. დღეის მდგომარეობით, მდინარემ უკვე ჩამოაქცია და წაიღო ეზოს მნიშვნელოვანი ნაწილი და ზედ ღობის საზღვართან გადის. იქვე დგას სხვადასხვა სათავსო, საქათმე, რასაც დაცულ ადგილზე გადატანა ესაჭიროება.

გერმანე თოდრაძე ამბობს, რომ თუ არ გადაიტანს ამ ნაგებობებს, მდინარე სათითაოდ წაიღებს ყველას:

_ ის კი არა, იქნებ, სახლიც წაიღოს. მე აქ ვცხოვრობ ჩემი დღე და მოსწრება. ზოგი ასეთ უცნაურ კითხვასაც მისვამს, აქ როგორ დასახლდიო. ჯერ ერთი, სოფელში უკეთეს ადგილზე სად დასახლდები და მეორეც, აქ ცხოვრობდა ჩემი მამა–პაპა და მე სად უნდა წავსულიყავი? საქმე იმაშია, რომ მდინარე ბჟუჟს მოუნდომეს გასწორხაზოვნება. ამან მომიტანა უბედურება. ხედავთ, მდინარეზე ხიდს, წითელმთიდან სოფელ მაკვანეთში ასე გადადიან. ამ ხიდის ზევით მდინარეს ფართო კალაპოტი ჰქონდა, გაშლილი იყო და ბუნებისგან შექმნილ გზას სწორად მიიკვლევდა. მერე მოინდომეს შემჭიდროებული კალაპოტის გაკეთება, ქვა–ღორღი ცალ მხარეს მისწიეს და მდინარე მოაწვა ეზოს გასწვრივ მდებარე სივრცეს.

თოდრაძის თქმით, მან ოზურგეთის მუნიციპალიტეტის მერიას არაერთხელ მიმართა. აღნიშნავს იმასაც, რომ დაპირება არის, თუმცა, საქმე ჯერ არ ჩანს. იგი ამბობს, რომ ეზოს გასწვრივ 50-მეტრიანი ჯებირის გაკეთებაა საჭირო, რაც მუნიციპალიტეტს, წესით, უნდა შეეძლოს.

_ თუმცა, მეუბნებიან, რომ ეს იმდენი დაჯდება, სახლ–კარს შეიძენო. კი, ბატონო, მომცენ ლტოლვილის სტატუსი ან რაც უნდათ, დამაკმაყოფილონ და წავალ აქედან, სხვაგან გადავსახლდები. აბა, რა ვქნა? 68 წლის კაცი ვარ. აქ ვიშრომე, ვიწვალე, თუ რამ შემიქმნია მთელი სიცოცხლე, ესაა, რასაც აქ ხედავთ და ესეც ბჟუჟს გავატანო? ყურადღება ხომ უნდა მომაქციონ. კი მპირდებიან, მაგრამ დავბერდი ამ დაპირებაში. მე ვიცდი, მაგრამ ეს გაგიჟებული მდინარე ერთხელაც არ დაიცდის და წაიღებს ჩემს სახლ–კარს. ყველამ იცის, რომ ადიდდება, პირდაპირ ჩემს ეზოში მიედინება. კალაპოტი შეუცვალეს, ვასწორებთო. რას ქვია ეს გასწორხაზოვნება, იქნებ, თქვენ იცით მათი ენა?! გაასწორეს კი არა, მოღრიცეს და მოუშვირეს ჩემს სახლ–კარს. ახლა მიშველონ, მომეხმარეთ, დააჩქარონ ეს პროცესი. ჰკითხეთ ჩემს მეზობლებს. სხვისას ვათევ, მდინარე როცა ადიდებულია, ღამით სახლში გაჩერება საშიშია. ნადირის შემოვარდნა სჯობს, თავს დაიცავ, ალბათობა მეტია. აგორებულ ზვირთებს სად გაექცევი? _ გვეუბნება ოჯახის უფროსი.

ოზურგეთს მუნიციპალიტეტის საკრებულოს წევრი სოფელ შემოქმედიდან თამაზ ბურჭულაძე “გურია ნიუსთან” ამბობს, რომ გერმანე თოდრაძის წუხილი სამართლიანია და ოჯახს მართლაც უმძიმესი მდგომარეობა აქვს:

_ ამ ოჯახის მდგომარეობის შესახებ ყველა საქმის კურსშია. მუნიციპალიტეტის ხელმძღვანელობამ იცის, თუ რა საფრთხის ქვეშაა თოდრაძეების კარმიდამო. ზუსტ რიცხვს ვერც მე გეტყვით, მაგრამ, ვფიქრობ, მალე გაკეთდება აქ გაბიონი, _ გვითხრა მან.

გერმანე თოდრაძე ამბობს, რომ მისი აქედან წასვლა სიკვდილის ტოლფასია. ამიტომ თუ მოხერხდება, როგორმე ეზოს გასწვრივ ჯებირის გაკეთებაში უნდა დაეხმარონ:

_ მთელი ზაფხულის განმავლობაში ტურისტები დადიან. დრო შეიცვალა, ტურიზმი ვითარდება და ცოტა შემოსავლები ჩვენთვისაც გაჩნდა. რა სჯობს ბჟუჟის ხეობას ზაფხულში. ამიტომ, მილიონი რომ მომცენ, არ მინდა სხვაგან წასვლა, თუ აქ ჯებირის გაკეთება მოხერხდება და ჩემს სახლში ვიცხოვრებ. განა ასე ადვილია ჩემს ასაკში ადამიანის სხვა ადგილზე გადასახლება? _ გვეუბნება ის.

“გურია ნიუსმა” აღნიშნულის თაობაზე ოზურგეთის მუნიციპალიტეტის მერიას მიმართა.

მერიის პრესსამსახურისგან მივიღეთ პასუხი, რომ თოდრაძის ეზოსთან დამცავი გაბიონი გაკეთდება.

_ წითელმთაში, გერმანე თოდრაძის დაზიანებულ კარმიდამოსთან, მუნიციპალიტეტის მერია დამცავი გაბიონის გაკეთებას გეგმავს, _ ნათქვამია განცხადებაში.

“გურია ნიუსი” თვალს მიადევნებს თოდრაძის ეზოსთან გაბიონის გაკეთების საქმეს.