კატარის მუნდიალის შემდეგ პორტუგალიის ნაკრები მთავარი მწვრთნელის გარეშე დარჩა. ორი დღის წინ გავრცელდა ცნობა, რომ პორტუგალიის ფეხბურთის ფედერაციამ ეროვნული გუნდის მართვის სადავეები იტალიური „რომას“ ამჟამინდელ თავკაც ჟოზე მოურინიოს შესთავაზა. პორტუგალიური ფეხბურთის მამები თანახმანი იყვნენ რომ „განსაკუთრებულ ჟოზეს“ ერთდროულად ორ სამსახურში ემუშავა. თითქოს მოურინიოც ამ პირობებზე თანახმა იყო, მაგრამ გუშინ ახალი საინტერესო „ნიუსი“ გავრცელდა.
ნიდერლანდების ნაკრების აწ უკვე ყოფილმა მთავარმა მწვრთნელმა ლუი ვან გაალმა განაცხადა, რომ პორტუგალიის ნაკრებში მუშაობაზე სერიოზულად დაფიქრდება.
მსოფლიო ჩემპიონატის მეოთხედფინალურ შეხვედრაში ნიდერლანდების ნაკრები არგენტინასთან თერთმეტმეტრიანების სერიაში დამარცხდა, რის შემდეგაც, ლუი ვან გაალმა თანამდებობიდან წასვლის შესახებ განაცხადა.
გუშინ, ლუი ვან გაალი თანამემამულე ჟურნალისტებს ესაუბრა, სადაც დასმულ შეკითხვაზე მომავალ გეგმებთან დაკავშირებით შემდეგნაირად უპასუხა:
„მუშაობა დავასრულე, ისევ. თუმცა თუ პორტუგალიიდან დამირეკავენ, მე მათ მოვუსმენ. ჯერ–ჯერობით მხოლოდ ამის თქმა შემიძლია“.
ფერნანდუ სანტუშის წასვლის შემდეგ, პორტუგალიის ნაკრების მთავარი მწვრთნელის თანამდებობას, ჟოზე მოურინიოს, ანდრე ვილაშ–ბოაშს და პაულო ფონსეკას უწინასწარმეტყველებენ, თუმცა ისინი არც ვან გაალის დონის მქონე სპეციალისტზე იტყვიან უარს.
გუშინ, გამოცემამ „L’Equipe“ გაავრცელა ცნობა რომ დიდიე დეშამი დიდი ალბათობით, საფრანგეთის ნაკრებში მუშაობას გააგრძელებს. დარჩენის წინააღმდეგი არც დეშამია, რომელსაც ნაკრებში მუშაობის გაგრძელება საფრანგეთის პრეზიდენტმა ემანუელ მაკრონმა პირადად სთხოვა. დეშამი ეროვნულ გუნდს მსოფლიოს 2026 წლის ჩემპიონატის ბოლომდე გაწვრთნის.
საინტერესოა, რომ საფრანგეთის ნაკრებში მუშაობის დაწყებას ზინედინ ზიდანი ელოდებოდა, მაგრამ თუ დეშამი დარჩება, მას კვლავ საკლუბო ფეხბურთზე მოუწევს აქცენტირება და უკვე დაუკავშირეს ტურინის „იუვენტუსს“.
ზინედინ ზიდანი „იუვენტუსს“ კი დაუკავშირეს, მაგრამ ამ გუნდში დიდი „აურზაურია“, რომელსაც ბედნიერი დასასრული ალბათ არ ექნება.
იტალიური მასმედიის მტკიცებით, ტურინული კლუბის წინააღმდეგ მიმდინარე გამოძიების ფარგლებში რამდენიმე ფეხბურთელს დისკვალიფიკაცია ემუქრება.
ტურინის პროკურატურა იუვენტუსის საბუღალტრო აღრიცხვის გაყალბების საქმეს იძიებს, რომელშიც ფეხბურთელებიც ფიგურირებენ. როგორც ირკვევა, კლუბის რამდენიმე მოთამაშემ უარი თქვა არა ოთხი თვის ხელფასზე, არამედ მხოლოდ ერთი თვის ანაზღაურებაზე.
ფეხბურთელების დასჯის ალბათობა ძალიან მაღალია, „იუვენტუსს“ კი ქულების დაკლების საფრთხე ემუქრება. ფეხბურთელებთან ერთად, რომლებმაც არალეგალური კონტრაქტები გააფორმეს, დისკვალიფიკაციის საფრთხე მათ აგენტებსაც ემუქრებათ.
ახლო წარსულში პოპულარული იტალიელი ფეხბურთელი ჯანლუკა ვიალი ლონდონის საავადმყოფოში მოათავსეს, სადაც პანკრეასის კიბოს ებრძვის.
58 წლის ვიალის ჯანმრთელობის მდგომარეობა ბოლო დღეებში მნიშვნელოვნად გაუარესდა, რის გამოც მკურნალობის აქტიურ პროცესზე გადავიდა.
ლონდონში ვიალის 87 წლის დედაც ჩავიდა, რათა თავისი შვილის გვერდით იყოს.
ჯანლუკა ვიალი კიბოს 2017 წლიდან მოყოლებული ებრძვის. ერთი პერიოდი მას პროგრესი ჰქონდა, მაგრამ დაავადება შემდეგ ისევ გააქტიურდა.
ცნობილი გახდა, რომ იტალიური „სალერნიტანა“ მექსიკის ნაკრების ვეტერან კარის დარაჯს გილერმო ოჩოას დაიმატებს. მხარეებს შორის შეთანხმება უკვე შედგა და მხოლოდ კონტრაქტზე ხელის მოწერა რჩება.
მექსიკელი „სალერნიტანას“ თავისუფალი აგენტის სტატუსით შეუერთდება.
ესპანური „სევილიასა“ და ისკოს ურთიერთობა კი ხანმოკლე გამოდგა. გუშინ მხარეებმა ურთიერთშეთანხმების საფუძველზე ხელშეკრულება გაწყვიტეს. ისკომ „სევილიაში“ მხოლოდ ოთხნახევარი თვე გაატარა.
ფეხბურთელს კლუბის სპორტულ დირექტორ მონჩისთან კონფლიქტი ჰქონდა, რომელიც მას შემდეგ წარმოიშვა, რაც „სევილიადან“ მთავარი მწვრთნელი ხულენ ლოპეტეგი დაითხოვეს. ამიტომაც, 30 წლის ფეხბურთელმა ხელშეკრულების გაწყვეტა მოითხოვა.
ავტორი
