საქართველოს საფეხბურთო ნაკრების ბოლო შეხვედრებში გიორგი ჩაკვეტაძეს მონაწილეობა არ მიუღია. მოთამაშეს ფიზიკურად არანაირი ტრავმა არ აწუხებდა, მაგრამ ეროვნული გუნდის ამჟამინდელმა თავკაცმა ვილი სანიოლიმ მისთვის ძირითად შემადგენლობაში ადგილი ვერ ან არ გამონახა. ფრანგმა ფეხბურთის სპეციალისტმა ეს გადაწყვეტილება შემდეგნაირად ახსნა _ ვარჯიშებზე ვერ დამარწმუნა, რომ შვედეთთან თამაშს იმსახურებდაო.
სამწუხაროდ, გიორგის უიღბლობა ბელგიაში დაბრუნების შემდეგაც დაებედა და “გენტის” სათამაშო განაცხადში ვერ ხვდება. გუშინ გამოცემა “nieuwsblad.be”-სთან, “გენტის” თავკაცმა ჰეინ ვანჰაზებრუკმა ქართველის უთამაშებლობის თემაზე ისაუბრა.
“დიდი კონკურენციაა შეტევაში, ბევრი კარგი ფეხბურთელი გვყავს. როცა შანსი მოგეცემა, უნდა გამოიყენო. ჩაკვეტაძე რომ არ არის განაცხადში, საკუთარ თავს მოჰკითხოს. მას გადატვირთვა ესაჭიროება. გიორგის საკმარისი ნიჭი გააჩნია, რომ მუდამ იყოს შემადგენლობაში. არ ვამბობ, რომ, გინდა თუ არა სასტარტოში, მაგრამ, როგორც ხედავთ, არ არის განაცხადში და ეს მხოლოდ მისი ბრალია. ვარჯიშებზე მისი მონაცემები რომ ნახოთ, ყოველთვის კარგი არ არის. ზოგიერთ დღეს მას უბრალოდ არაფერი გაუკეთებია. როცა “გენტში” ბრუნდები და ისევ არაფერს აკეთებ, დიდი ბოდიში, მაგრამ პრობლემებს თავად იქმნი. თუკი მას სურს, რომ ტალანტი არ დაკარგოს, ყველაფერი უნდა შეცვალოს”.
იმედია, უახლოეს მომავალში გიორგი ჩაკვეტაძის უიღბლობას წერტილი დაესმევა. ის ახალგაზრდა და ნიჭიერი მოთამაშეა, საქართველოს კი არ აქვს იმის ფუფუნება, რომ ასეთი ფეხბურთელი დაკარგოს.
ცოტა ხნის წინ იტალიური “ჯენუას” მთავარ მწვრთნელად ახლო წარსულში ცნობილი უკრაინელი ფეხბურთელი ანდრეი შევჩენკო დაინიშნა. მიმდინარე სეზონში “ჯენუა” სუსტად ასპარეზობს და იტალიის “სერია A”-ს დატოვების საფრთხე ემუქრება. გუშინ იტალიურ გამოცემას “Gazzetta dello Sport” “მილანისა” და “ჯენუას” ყოფილი მცველი და ამჟამად თბილისის მერი კახი კალაძე ესაუბრა, რომელმაც შევჩენკოს მისამართით საქებარი სიტყვები არ დაიზარა:
“შევას ძალიან სწორი ხასიათი აქვს, ის მუშაობს მიზნებისთვის, რომელსაც ყოველთვის აღწევს. მის მიერ მოპოვებული “ოქროს ბურთი” ამის ნათელი მაგალითია. როგორც მისი მეგობარი, მიმაჩნია, რომ მან სწორი გზა აირჩია. ანდრეიმ ეროვნულ ნაკრებში საკმაოდ კარგად იმუშავა და ახლა გუნდზე გადაერთო. “ჯენუაში” კარგი ატმოსფეროა. ანდრეის და ტასოტის რთული მისია ელით, მაგრამ საინტერესო. დარწმუნებული ვარ, შევა ყველაფერს გააკეთებს,რომ “ჯენუა” გაძლიერდეს. იმიტომ, რომ ის სერიოზული პროფესიონალი და ძალიან კარგი ადამიანია”, _ აღნიშნა კახი კალაძემ.
კორონავირუსი კი ევროპულ ფეხბურთში “შემოიჭრა” _ 8 დეკემბერს “ჩემპიონთა ლიგაში” მიუნხენის “ბაიერნისა” და “ბარსელონას” შეხვედრა დიდი ალბათობით, გულშემატკივრების გარეშე გაიმართება. ამის მიზეზი გერმანიაში კორონავირუსით დაინფიცირების მაღალი მაჩვენებელია.
ცნობილი გახდა რომ უახლოეს პერიოდში გულშემატკივრებს ბავარიაში დაგეგმილ ღონისძიებებზე სტადიონებზე მისვლა აეკრძალებათ და ეს ყველა სპორტის სახეობას ეხება. დიდი ალბათობით ჩავის “ბარსელონა” უმნიშვნელოვანეს შეხვედრას ცარიელ სტადიონზე ჩაატარებს.
საინტერესოა რომ ასევე უმაყურებლოდ ჩატარდება 7 დეკემბერს გასამართი მატჩი “ლაიპციგისა” და “მანჩესტერ სიტის” შორის. ეს ამბავი მას შემდეგ გადაწყდა, რაც საქსონიის მხარემ ამ თვეში პირველმა გადაწყვიტა, რომ თამაშები დახურულ კარს მიღმა გაიმართოს. ეს მოსალოდნელიც იყო, რადგანაც გერმანიის მასშტაბით საქსონიაში ინფიცირების ყველაზე მაღალი მაჩვენებელი ფიქსირდება.
კორონავირუსმა არც კალათბურთი დაინდო _ “ლოს ანჯელეს ლეიკერსის” ლიდერი ლებრონ ჯეიმსი თავის გუნდს უახლოეს რამდენიმე შეხვედრაში ვერ დაეხმარება. ამის მიზეზი ჯანდაცვისა და უსაფრთხოების პროტოკოლია, რომელიც 36 წლის ფორვარდზე ვრცელდება.
“ლებრონ ჯეიმსმა დღეს კორონავირუსზე სამი ტესტი ჩაიტარა. პირველი დადებითი აღმოჩნდა, მეორე _ უარყოფითი. ამის შემდეგ ჯეიმსს ტესტირება კიდევ ერთხელ ჩაუტარეს, რომელიც ისევ დადებითი იყო. ამჟამად დაავადება უსიმპტომოდ მიმდინარეობს”, _ დაწერა გუშინ ტვიტერზე “TMZ SPORTS”-ის წარმომადგენელმა.
ეროვნული საკალათბურთო ასოციაციის მოთამაშე, რომელსაც კორონავირუსის ტესტზე დადებითი პასუხი აქვს, მოედანზე სულ ცოტა 10 დღე ვერ გავა, თუკი პროტოკოლში მოხვედრიდან 24 საათის განმავლობაში ჩატარებულ ორ PCR-ტესტზე უარყოფით პასუხს არ მიიღებს. სავარაუდოდ, NBA-ს 4-გზის ჩემპიონი “ლოს ანჯელეს ლეიკერსის” მინიმუმ 4 თამაშს გამოტოვებს.
კორონავირუსი მსოფლიო სპორტს “უტევს”, იტალიელმა სამართალდამცველებმა კი ტურინის “იუვენტუსის” წინააღმდეგ გაილაშქრეს. იტალიის მომხმარებელთა უფლებების დაცვის ასოციაციის ხელმძღვანელი მარკო დონცელი მიიჩნევს, რომ ტურინის “იუვენტუსს” ტიტულები უნდა ჩამოერთვას და “სერია B”-ში დაქვეითდეს. ამის მიზეზი გამოძიებაა, რომელიც ტურინული კლუბის ხელმძღვანელების მხრიდან შესაძლო ფინანსური დარღვევების გამო ცოტა ხნის წინ დაიწყო.
რამდენიმე დღის წინ ცნობილი გახდა, რომ იუვენტუსის პრეზიდენტის ანდრეა ანიელის, ვიცე-პრეზიდენტის პაველ ნედვედისა და ყოფილი სპორტული დირექტორის ფაბიო პარატიჩის მიმართ გამოძიებაა დაწყებული. ისინი ფინანსური ანგარიშგების გაყალბებაში არიან ეჭვმიტანილნი.
ეჭვობენ, რომ ტურინული კლუბის ხელმძღვანელობა ფინანსურ მაქინაციას 2018/19, 2019/20 და 2020/21 წლების სეზონებში მიმართავდა. საუბარია კლუბისგან 50 მილიონი ევროს ოდენობის ფინანსური მონაცემების ფალსიფიკაციაზე. ამას გარდა, სამართალდამცველები დაინტერესდნენ კლუბსა და კრიშტიანო რონალდოს შორის გაფორმებული კონტრაქტით და ეჭვობენ, რომ შარშანდელი ლოქდაუნის პერიოდში პორტუგალიელისთვის გადახდილი ანაზღაურება ფინანსურ ანგარიშგებაში შეტანილი არ იყო.
[sexy_author_bio]
