ლანჩხუთის საკრებულომ ხუთშაბათს გამართულ რიგგარეშე სხდომაზე მიმდინარე წლის მთავარ საფინანსო დოკუმენტში ცვლილების განხორციელების თაობაზე იმსჯელა და საკითხთან დაკავშირებით ადმინისტრაციული წარმოების დაწყებას მწვანე შუქი აუნთო.
საკრებულოს სხდომაზე გამოტანამდე საკითხი საფინანსო კომისიამ განიხილა მერიის საფინანსო სამსახურის უფროსის როლანდ ლაშხიას წარდგინებით.
ბიუჯეტში დაგეგმილი ცვლილების გახორციელების ერთ-ერთი მიზეზი, როგორც გაირკვა, ჭალასა და ნინოშვილის სკოლებში საგანმანათლებლო და სამეცნიერო ინფრასტრუქტურის განვითარების სააგენტოს მიერ 102719,16 ლარის ღირებულების სარეაბილიტაციო სამუშაოების გახორციელებაა. აღნიშნული თანხიდან ნინოშვილში საჯარო სკოლაში ინფრასტრუქტურული სამუშაოების შესასრულებლად 62908,86 ლარი უნდა გაიხარჯოს, ხოლო 39810,30 ლარი ჭალას სკოლას მოხმარდება.
მერიის საფინანსო სამსახურის უფროსის როლანდ ლაშხიას ინფორმაციით, საქართველოს მთავრობის განკარგულებით, გასული წლის ბოლოს საქართველოს რეგიონებში გასახორციელებელი პროექტების ფონდიდან ლანჩხუთის მუნიციპალიტეტს 1 608 425 ლარი გამოეყო, საიდანაც ნიგვზიანის ადმინისტრაციულ ერთეულში ეგნატე ნინოშვილის სახლ-მუზეუმთან მისასვლელი გზის აღდგენის სამუშაოებზე ცენტრალური ბიუჯეტიდან 300598 ლარი და საკუთარი სახსრებიდან 15822 ლარი მიიმართება; გვიმბალაურის, ღრმაღელის, სუფსის და ჩოჩხათის ადმინისტრაციულ ერთეულებში წყალმომარაგების სისტემის მოწყობის სამუშაოებზე ცენტრალური ბიუჯეტიდან 1 307 827 ლარი და საკუთარი სახსრებიდან 68 833 ლარი გამოიყოფა.
ბიუჯეტში გასახორციელებელ ცვლილებებთან დაკავშირებით, საფინანსო სამსახურის უფროსის ინფორმაციით, გასული წლის 18 იანვრის საქართველოს მთავრობის განკარგულებით, საქართველოს რეგიონებში გასახორციელებელი პროექტების ფონდიდან გამოყოფილი თანხიდან აუთვისებელი 698 289 ლარიდან, ამჯერად 208299 ლარი მიიმართება გზების კაპიტალურ შეკეთებაზე, საკუთარი სახსრებიდან დასაფინანსებელია 45 483 ლარი. საფეხბურთო აკადემიის რეაბილიტაციისათვის _ 478 210 ლარი, ხოლო საჭადრაკო სკოლის რეაბილიტაციაზე 11 780 ლარი, საკუთარი სახსრებიდან კი მიიმართება 18663 ლარი.
გაირკვა, რომ 2018 წლის 17 აგვისტოს მთავრობის განკარგულებით, სტიქიის შედეგების სალიკვიდაციო ღონისძიებების გახორციელების მიზნით ჩამორიცხული თანხიდან აუთვისებელი დარჩა 254 391 ლარი და აქედან გზების კაპიტალურ შეკეთებაზე მიიმართება 253 454 ლარი, 750 ლარი _ სარწყავი არხებისა და ნაპირსამაგრი ნაგებობების მოწყობა-რეაბილიტაცია-ექსპლოატაციას მოხმარდება, ხოლო 187 ლარი სასმელი წყლის სისტემის რეაბილიტაციაზე უნდა გაიხარჯოს.
რაც შეეხება გასული წლის პირველი აგვისტოს განკარგულებით, სტიქიის შედეგების სალიკვიდაციო ღონისძიებებისთვის გამოყოფილი თანხიდან აუთვისებელ 1 593 ლარს, როგორც რიგგარეშე სხდომაზე გაჟღერდა, იგია ავარიული ობიექტებისა და შენობების რეაბილიტაციას მოხმარდება.
როგორც სხდომაზე ითქვა, გურიის ტურიზმის ხელშეწყობის ღონისძიებების დასაფინანსებლად 6350 ლარი გამოიყოფა. აუთვისებელი და ხელშეკრულებით გათვალისწინებული ღონისძიებების დაფინანსება გახორციელდება მუნიციპალიტეტის ბიუჯეტში არსებული ნაშთის ხარჯზე.
