9 ნოემბერს, ოზურგეთის მუნიციპალიტეტის სოფელ ჭანიეთის ახალი საჯარო სკოლა საზეიმოდ გაიხსნა. ღონისძიებაში მონაწილეობდნენ განათლების მინისტრის მოადგილე ირინა აბულაძე, ოზურგეთის მუნიციპალიტეტის მაჟორიტარი დეპუტატი საქართველოს პარლამენტში არჩილ თალაკვაძე, გურიის გუბერნატორი ზურაბ ნასარაია, ოზურგეთის მუნიციპალიტეტის მერი კოტე შარაშენიძე და სხვა ხელმძღვანელი პირები, დეპუტატები, სკოლების დირექტორები, ფოლკლორული ანსამბლები.
სკოლის დირექტორმა მალვინა ნინიძემ მადლობა გადაუხადა ყველა იმ ადამიანს, რომლებმაც წვლილი შეიტანეს სოფელში ახალი სკოლისა და საბავშვო ბაღის მშენებლობაში.
„ჭანიეთელთათვის უდიდესი სიხარული და ბედნიერებაა, რომ გვეძლევა საშუალება ახალ სკოლაში ვაკეთოთ ქვეყნისთვის სასიკეთო საქმეები, _ თქვა მან.
განათლების მინისტრის მოადგილემ, ირინა აბულაძემ მასწავლებელთა თავდადებასა და ერთგულებაზე ისაუბრა, რომლებიც მიუხედავად ძნელბედობის წლებისა და გასაჭირისა, არასდროს შეჩერებულან და აკეთებდნენ საქვეყნო საქმეს.
_ გვიგულეთ თქვენ გვერდით, _ უთხრა მან ჭანიეთის საჯარო სკოლის მასწავლებლებსა და მოსწავლეებს.
მაჟორიტარმა დეპუტატმა არჩილ თალაკვაძემ ხაზი გაუსვა ევროპული სტანდარტით აგებული სკოლის ღირსებას:
_ ცხრა ნოემბრის შემდეგ აქ არის ევროპა, რადგან ეს არის ევროპული სტანდარტით აგებული სკოლა. იგი წარმოადგენს სახელმწიფოს სიმბოლოს. მინდა, მადლიერება გამოვხატო ზვიად კვაჭანტირაძის მიმართ. როცა მას ხელი ჩამოვართვი და აქ მოვდიოდი, ვიფიქრე, რომ მთავარია საქმე სწორად დათესო, რომლის შედეგის დადგომისას, შესაძლოა, იქ არ იყო, მაგრამ მთავარია, კარგი შედეგი, _ თქვა მან.
ოზურგეთის რესურსცენტრის ხელმძღვანელმა ლელა იმედაშვილმა ისაუბრა ახლო მომავალში კიდევ მრავალი სკოლის რეაბილიტაციის შესახებ და საგანგებოდ მიეფერა ჭანიეთის საჯარო სკოლის მოსწავლეს გიორგი ქავთარაძეს, რომელმაც ემოციური ლექსი-მისალმებით ზეიმის მონაწილეებს ცრემლიც კი მოჰგვარა.
ორიგინალური და დასახსომებელი საჩუქარი უძღვნა სკოლას სოფლის მკვიდრმა, სოფელ მერიის საჯარო სკოლის პედაგოგმა, ციური ბაბილოძემ. მან საკუთარი ხელით გადაწერილი „ვეფხისყტაოსანი“ გადასცა სკოლის დირექტორს მალვინა ნინიძეს.
_აქ სწავლობენ ჩემი შვილიშვილები და ამ საზეიმო დღეს, მათ, როგორც ამ სკოლის მოსწავლეებს, მივუძღვენი ეს საჩუქარი, _ თქვა მან.
როგორც სტუმრებმა, ისე მასპინძლებმა, სიხარულითა და კმაყოფილებით აღნიშნეს, რომ ევროსტანდარტებით აშენებული ჭანიეთის საჯარო სკოლის ექსტერიერი და ინტერიერი არა მარტო საუკეთესო დიზაინით გამოირჩევა, არამედ სრულად მიესადაგება სკოლის შინაარსობრივ ფუნქციას.
