შუხუთის კულტურის სახლის ყოფილი შენობის დემონტაჟი ბოლო ხანია ლანჩხუთში აქტუალურ თემად იქცა.
საქმე ისაა, რომ ეს შენობა მუნიციპალიტეტის საკრებულომ თავის დროზე საპრივატიზაციო ნუსხაში შეიტანა და ცოტა ხნის წინ აუქციონის შედეგად იმ ორგანიზაციის ვინაობაც გაირკვა, ვინც აღნიშნული შენობის დემონტაჟს განახორციელებს.
საგულისხმოა, რომ ამ შენობის ირგვლივ საუბარი კარგა ხანია მიმდინარეობს. აზრი ორად იყო გაყოფილი. ერთი ნაწილი თვლიდა, რომ შენობა დემონტაჟს არ საჭიროებდა და შესაძლებელი იყო მისი რეაბილიტაცია. მეორე ნაწილი კი პირიქით _ კატეგორიულად ითხოვდა ამ ავარიული შენობის დანგრევას და ამბობდნენ, რომ ეს უსახური შენობა საფრთხეს წარმოადგენდა მოსახლეობისთვის, განსაკუთრებით ბავშვებისთვის.
ამ შენობის სამომავლო ბედთან დაკავშირებით პოლემიკა საკრებულოს ერთ-ერთ სხდომაზე, დაახლოებით, ორი წლის წინ ლანჩხუთის მაშინდელ გამგებელს ზაზა ურუშაძესა და სოფლის მაჟორიტარ დეპუტატს კაკო იმნაიშვილს შორისაც გაიმართა. მაშინ მუნიციპალიტეტის პირველი პირი ამბობდა, რომ აღნიშნული შენობა აღდგენას აღარ ექვემდებარებოდა და არგუმენტად ექსპერტიზის დასკვნას იშველიებდა. სოფლის მაჟორიტარი კი აქცენტს შენობის უნიკალურობაზე აკეთებდა და სამხარაულის ექსპერტიზის ბიუროს მოწვევას ითხოვდა.
საბოლოოდ, დემონტაჟის გადაწყვეტილება მიღებულია და სამუშაოებიც იწყება, თუმცა, შუხუთელთა ერთი ნაწილი აპროტესტებს ადგილობრივი ხელისუფლების ამ გადაწყვეტილებას. მათ შორის არის შუხუთში მცხოვრები ცნობილი იურისტი და უფლებადამცველი ლია მუხაშავრია. მუხაშავრია თვლის, რომ შენობა ძალიან იაფად და რაც მთავარია, ჩუმად გაიყიდა მაშინ, როცა შეთანხმება არსებობდა, რომ არ მოხდებოდა მისი ამ სახით დემონტაჟი.
ლია მუხაშავრიას თქმით, ადგილი, რომელიც ისტორიული მნიშვნელობისაა და სადაც უამრავი ტურისტი, არ უნდა იყოს ასეთი ფარული გადაწყვეტილების მსხვერპლი. მისივე თქმით, შეიძლებოდა არსებული შენობის რეაბილიტაცია და ადრე დაანონსებული „ლელოს“ მუზეუმისთვის შესაფერისი თანამედროვე ფართის შექმნა. მითუმეტეს, რომ, როგორც თავად გვეუბნება, მან პირადად მიმართა საქართველოს კულტურული მემკვიდრეობის სააგენტოს და სთხოვა ამ ადგილს არამატერიალური კულტურის ძეგლის სტატუსი მინიჭებოდა.
როგორც ლია მუხაშავრია “გურია ნიუსთან” საუბრისას აღნიშნავს, ამ თემას სიხარულით შეხვდნენ თავად სააგენტოში, რადგან საყოველთაოდ ცნობილია ლელოსადმი დიდი ინტერესი და რომ ამ მოვლენას აქვს ძალიან დიდი პერსპექტივა, რაც საფუძველია იმისა, რომ მალე მოხდეს იუნესკოში „ლელოს“ ტრადიციის დარეგისტრირება და შემდგომ საერთაშორისო მნიშვნელობის ძეგლის სტატუსის მინიჭება. ეს კი თავისთავად გამოიწვევს შუხუთის ტურისტული პოტენციალის ათვისებას და ამ პროცესში ჩართული ადგილობრივი მოსახლეობისთვის შემოსავლების გაჩენას.
მუხაშავრია საუბარში იმასაც ამბობს, რომ აღნიშნული შენობის ბედით შუხუთის მკვიდრი, ბიზნესმენი გიორგი ჩხაიძე დაინტერესდა და მზადყოფნა გამოთქვა, რომ საკუთარი ხარჯებით დაშლიდა შენობას, სამშენებლო მასალას დაასაწყობებდა და სამომავლოდ „ლელოს“ მუზეუმის ასაშენებლად გამოიყენებდა.
როგორც საუბრიდან ირკვევა, ამაზე შეთანხმებაც ყოფილა ადგილობრივ ხელისუფლებასთან, მაგრამ, როგორც ამას ქალბატონი ლია ამბობს, შენობა ჩუმად გაიტანეს აუქციონზე და 600 ლარად გაყიდეს, მაშინ, როცა მისივე თქმით, მარტო ტუფის ქვით ნაშენი შენობის ნარჩენი თლილი ქვის ღირებულება 40 ათას ლარს აღწევს.
აღნიშნულ საკითხზე კომენტარი ვთხოვეთ შუხუთის მაჟორიტარ დეპუტატს აკაკი იმნაიშვილს, რომელიც წლებია დაინტერესებულია აღნიშნული შენობის რეაბილიტაციით და საკრებულოს თითქმის ყველა სხდომაზე ითხოვდა პრობლემის რაც შეიძლება სწრაფ დროში გადაჭრას.
„სამწუხაროდ მოხდა ის, რაც არ უნდა მომხდარიყო. პირდაპირ ვიტყვი, რომ არსებობდა სიტყვიერი შეთანხმება მერიასთან, რომ აღნიშნული შენობის დემონტაჟი მოხდებოდა და გამოცხადდებოდა პირობიანი აუქციონი, სადაც დაფიქსირებული იქნებოდა, რომ აუქციონში გამარჯვებული ორგანიზაცია დაშლიდა შენობას და სამშენებლო ნარჩენებს ადგილზე დაასაწყობებდა. ამ პირობაზე შევთანხმდით, მაგრამ რამდენიმე ხნის წინ ვიგებ, რომ აუქციონი ჩატარებულა და არა იმ პირობით, რაზეც შევთანხმდით. რატომღაც, არ ჩამაყენეს საქმის კურსში და ეს ძალიან ცუდია. ვნახოთ, გვპირდებიან, რომ ამ საქმეს გამოასწორებენ, მაგრამ როგორ, ეს არ ვიცი“, _ ამბობს სოფლის მაჟორიტარი და ადასტურებს, იმასაც, რომ შენობის დემონტაჟი აუცილებელი იყო, რადგან ექსპერტიზამ დაადასტურა მისი უვარგისობა, ოღონდ, მისი ინფორმაციით, ეს იყო არა სამხარაულის ბიუროს დასკვნა, არამედ რომელიღაც კერძო ბიუროს.
„გიორგი ჩხაიძე „ლელოს“ მუზეუმის დაპროექტების ხარჯებს საკუთარ თავზე იღებდა და შემდგომ მშენებლობისთვის საჭირო ხელშეწყობისთვისაც მზად იყო, მაგრამ რატომღაც მერიაში არჩიეს, რომ საქმე სხვა გზით წაეყვანათ და ზემოთ ნახსენები შეთანხმებაც დაარღვიეს. შედეგად კი მივიღეთ ის, რომ აუქციონზე გამარჯვებულ ორგანიზაციას სულაც არ აქვს ვალდებულება, სამშენებლო ნარჩენები სოფელს დაუტოვოს და საკუთარი მიზნებისთვის არ გამოიყენოს. მაშინ, როცა სოფლისთვის საკეთილდღეო საქმე კეთდებოდა მაშინ, როცა იყვნენ დაინტერესებული ადამიანები, ვინც ამ საქმეს ბოლომდე მიიყვანდნენ. რატომ მოხდა არა მარტო მათი, არამედ მთლიანად სოფლის მაცხოვრებელთა დიდი ნაწილის იგნორირება? მეტიც, რატომ დადის ხმები, თითქოს ეს გადაწყვეტილება კონკრეტულ ადამიანებს დაბრალდეს, რომლებიც პირად ინტერესზე მეტად სოფლის ინტერესს ახმოვანებდნენ და გამოდის, რომ ამ მიჩქმალურ გასხვისებაში სულ სხვა ადამიანების ინტერესი და ელემენტარული გულგრილობა შეიძლება დავინახოთ, რომლებიც აქეთ არიან გადაბრალების რეჟიმში“, _ ამბობს შუხუთელთა ის ნაწილი, ვინც სოფლის კულტურის სახლის ყოფილ შენობასთან დაკავშირებით ხელისუფლების მხრიდან მირებულ გადაწყვეტილებას ეწინააღმდეგება.
შუხუთის კულტურის სახლის დემონტაჟთან დაკავშირებულ აჟიოტაჟს ლანჩხუთის მერიის გამოხმაურება მოჰყვა.
„შუხუთის კულტურის სახლის შენობა სრულად ამორტიზებული და ექსპლუატაციისთვის უვარგისია, რაზედაც არსებობს სამხარაულის სასამართლო ექსპერტიზის ეროვნული ბიუროს შესაბამისი დასკვნა. ამავე დასკვნის თანახმად, შენობა ექვემდებარება დემონტაჟს.
უფრო მეტიც, ავარიული შენობა საფრთხეს წარმოადგენს შუხუთელებისთვის და განსაკუთრებით, მოსწავლეებისთვის, შეგახსენებთ, რომ შენობის გვერდით მდებარეობს შუხუთის საჯარო სკოლა და რისკის ალბათობა საკმაოდ დიდია“, _ ვკითხულობთ მერიის მიერ საკუთარ ფეისბუქგვერდზე გავრცელებულ განცხადებაში. მერიაში, ასევე, აბსურდულად მიიჩევენ განცხადებას აუქციონის მალულად ჩატარებასთან დაკავშირებით.
„ელექტრონული აუქციონის ჩუმად ჩატარება, პრაქტიკულად, შეუძლებელია. ინფორმაცია აუქციონის ჩატარების თაობაზე ქვეყნდება www.eauction.ge-ზე, რომელიც საქართველოს ფინანსთა სამინისტროს მომსახურების სააგენტოს ინიციატივით, საფინანსო ანალიტიკურ სამსახურთან ერთად შეიქმნა 2010 წლის მარტში.
ასევე მცდარია აზრი იმის თაობაზე, თითქოს შუხუთის კულტურის სახლის შენობა გაიყიდა ჩალის ფასად, 600 ლარად.
კიდევ ერთხელ შეგახსენებთ, რომ შენობა შეფასდა სამხარაულის ექსპერტიზის ეროვნული ბიუროს მიერ, დასკვნის საფუძველზე განისაზღვრა ვარგისი მასალების ღირებულება, რაც 9495 ლარს შეადგენს და არა 40 ათას ლარს, როგორც ლია მუხაშავრია ვარაუდობს.
დემონტაჟის ღირებულება ამავე დასკვნის საფუძველზე, შეადგენს 8850 ლარს, ხოლო რაც შეეხება ექვსას ლარს, ეს არის აუქციონის ჩატარებისთვის საწყისი ღირებულების პირობა და არა შესასყიდი თანხა“, _აცხადებს ლანჩხუთის მერია და აქვე გამოთქვამს მზადყოფნას შუხუთის მოსახლეობის ინტერესებისა და მოთხოვნების გათვალისწინებით, სოფლის ცენტრში დაიგეგმოს ლელოს მუზეუმის ინფრასტრუქტურული პროექტის გახორციელება.
