გუშინ ბრიტანულ მასმედიაში გავრცელდა ცნობა, რომ ლონდონის “ჩელსის” ხვიჩა კვარაცხელიას ხელში ჩასაგდებად ახალი გეგმა გააჩნია.
რამდენიმე დღის წინ იტალიურ გამოცემებში დაიწერა რომ „ნაპოლის“ ქართველთან ხელშეკრულების გახანგრძლივება სურს და მას ხელფას გაუორმაგებს, რის შემდეგაც დაახლოებით 2 მილიონ ევროს გამოიმუშავებს.
ამის საპასუხოდ, ბრიტანულ პრესაში გავრცელდა ინფორმაცია, რომლის მიხედვითაც, „ჩელსი“ ჩვენებურს სეზონში 7 მილიონ ევროზე მეტს შესთავაზებს.
რომან აბრამოვიჩის ყოფილ გუნდს კვარაცხელია „მილანში“ მოასპარეზე რაფაელ ლეაოს ალტერნატივად ჰყავს შეგულებული, რომლის ტრანსფერიც უფრო ძვირად ფასობს და ხელფასსაც დაახლოებით 10 მილიონ ევროს ითხოვს.
ორი დღის წინ შოთა არველაძემ რომში, დიეგო მარადონას ხსოვნისადმი მიძღვნილ საქველმოქმედო, ლეგენდების მატჩში ითამაშა და დუბლიც შეასრულა. თამაშის შემდეგ შოთამ გამოცემებთან „Corriere del mezzogiorno“–სა და „Calcionapoli24“–თან ისაუბრა და რასაკვირველია ხვიჩა კვარაცხელიას თემასაც შეეხო.
„კვარა ფენომენია. წარმოუდგენელი მოთამაშეა და მისით ძალიან ვამაყობ. მას უყვარს ის, რასაც აკეთებს და მისი თამაშის ყურება ძალიან სასიამოვნოა. კვარა ძალიან კარგი ბიჭია. დიდებული ფეხბურთელია და გაიბრწყინა გუნდში, რომელიც კარგ ფეხბურთს თამაშობს. პარასკევს მასთან ვილაპარაკე და მითხრა, რომ კარიერაში საუკეთესო პერიოდი აქვს. ზურგის ტკივილი ისევ აწუხებს, მაგრამ იმედოვნებს, რომ მოედანზე, რაც შეიძლება მალე დაბრუნდება. ქართველი ხალხისთვის კვარა ძალიან ბევრს ნიშნავს, ის ჩვენი საუკეთესო ფეხბურთელია და საქართველოს ნაკრებისთვის დიდ პერსპექტივას წარმოადგენს. მის გარეშე დიდი პრობლემები გვაქვს, მაგრამ მასთან ერთად, ევროპის ან მსოფლიოს ჩემპიონატზე გასვლა შესაძლებელი მიზანია“, – განაცხადა შოთა არველაძემ.
„საბურთალოს“ მარჯვენა მცველმა გიორგი გოჩოლეიშვილმა დონეცკის „შახტართან“ ხელშეკრულება ოფიციალურად გააფორმა.
გოჩოლეიშვილს დონბასური გუნდი განაცხადში სეზონის საგაზაფხულო ნაწილში შეიყვანს.
„Transfermarkt“–ის მიხედვით, გოჩოლეიშვილის სატრანსფერო ფასი 600 ათასი ევროა და ის საქართველოს ნაკრების შემადგენლობაში მაროკოსთან ამხანაგური მატჩისთვის ემზადება.
ადრე იყო საუბარი რომ გოჩოლეიშვილით ესპანური „ვალენსია“ სერიოზულად გახლდათ დაინტერესებული. სამწუხაროდ გიორგი მამარდაშვილის გუნდიდან ოფიციალური შემოთავაზება არ ყოფილა.
გუშინ ფრანგულმა გამოცემამ „L’Equipe“ საინტერესო ინფორმაცია გაავრცელა. აღმოჩნდა რომ კილიან მბაპესა და „პარი სენ–ჟერმენს“ შორის სიტუაცია კიდევ უფრო გართულდა. ფრანგული წყაროების მიხედვით, კლუბსა და ფეხბურთელს შორის ურთიერთობა სრულად გაფუჭებულია და არის იმის ალბათობა, რომ უახლოეს მომავალში მბაპემ „პსჟ“ დატოვოს.
უთანხმოების მიზეზი ამჯერად 23 წლის ფეხბურთელის ანაზღაურება გახდა. სექტემბრის ბოლოს მბაპეს საბანკო ანგარიშზე კუთვნილი ხელფასი კლუბმა სრულიად ვერ ჩაურიცხა.
კილიანს ხელფასი სრულად აღებული არც 11 ოქტომბერს ჰქონდა, რამაც ფეხბურთელი ძალიან გააღიზიანა. მეორე დღეს პრესაში გაჩნდა ინფორმაცია, რომ თავდამსხმელს „პსჟ“–ს დატოვება სურდა, რადგან კლუბი არ ასრულებდა მისთვის მიცემულ პირობებს. მბაპეს აზრით, მას „პსჟ“–მ უღალატა.
კილიან მბაპემ „პსჟ“–სთან ახალ კონტრაქტს ხელი გასულ ზაფხულს მოაწერა. ხელშეკრულების მიხედვით, იგი პარიზულ კლუბში 2025 წლის ზაფხულამდე უნდა დარჩეს, ხოლო მისი ანაზღაურება კვირაში დაახლოებით 1,2 მილიონი ევროა.
15 ნოემბრიდან იტალიის ქალაქ ასისში სტარტს აიღებს მსოფლიო ჩემპიონატი სენიორ–მოჭადრაკეთა შორის.
საქართველოს სახელით ჩემპიონატზე იასპარეზებენ: მსოფლიოს 5-გზის ჩემპიონი და სენიორთა შორის მსოფლიო ჩემპიონატების 7-გზის გამარჯვებული ნონა გაფრინდაშვილი, სენიორ–ვაჟთა შორის 2014 წლის მსოფლიო ჩემპიონატის გამარჯვებული ზურაბ სტურუა და ევროპის მოქმედი ჩემპიონი სენიორ–ქალთა შორის, სოფიკო ტერელაძე.
2019 წელს ნონა გაფრინდაშვილმა ბუქარესტში 65 წელს ზემოთ ქალ მოჭადრაკეთა შორის ბრწყინვალედ იასპარეზა, 8.5 ქულა დააგროვა, მსოფლიო ჩემპიონის ტიტულს დაეუფლა და 78 წლის ასაკში ყველაზე ასაკოვანი მსოფლიო ჩემპიონი გახდა.
ავტორი
