გუშინ, კატარში დაწყებულ მსოფლიოს ჩემპიონატზე, ინგლისისა და ირანის ნაკრებების მატჩის საწყისმა, ოფიციალურმა ნაწილმა პოლიტიკური ელფერი შეიძინა. მაშინ, როდესაც დოჰას არენაზე ირანის სახელმწიფო ჰიმნი დაუკრეს, ირანელმა ფეხბურთელებმა არ იმღერეს, ხოლო ტრიბუნებზე მყოფმა ირანელმა გულშემატკივრებმა უსტვინეს.
თავად თამაში ცალკარა გამოდგა, ინგლისელთა დიდი უპირატესობით მიმდინარეობდა და მათი დამაჯერებელი გამარჯვებით დასრულდა – 6:2.
დღის მეორე დაპირისპირებაში აფრიკის მიმდინარე ჩემპიონი სენეგალის ეროვნული გუნდი ლუის ვან გაალის ნიდერლანდების ნაკრებს მედგრად დაუხვდა. თამაში ნულოვანი ფრისაკენ მიდიოდა, მაგრამ ბოლოში იოჰან კრუიფის თანამემამულეების მაღალმა კლასმა მაინც თავისი გაიტანა და აფრიკელთა კარის ბადეში ორი უპასუხო ბურთი მოათავსა – 2:0.
გუშინდელი დღის მესამე შეხვედრაში უელსისა და აშშ–ის ნაკრებებმა ქულები გაიყვეს – 1:1.
კატარის მუნდიალის საზეიმო გახსნიდან და პირველი ოფიციალური შეხვედრიდან უკვე ორი დღე გავიდა, მაგრამ მსოფლიოს მასმედიით მისი კრიტიკა კვლავ გრძელდება. კატარისა და ეკვადორის მატჩში „ალ ბაით სთედიუმი“ სავსე იყო, მაგრამ მე-60 წუთისთვის ტრიბუნებზე ძალიან ბევრი ცარიელი ადგილი გამოჩნდა – ხალხმა სტადიონი ძალიან ადრე დატოვა.
„მსგავსი არაფერი მინახავს და ეს ჩემი მე-10 მსოფლიოს ჩემპიონატია“, – განაცხადა გერმანული არხის, „ZDF“–ის კომენტატორმა ბელა რეტიმ. გერმანიის ნაკრების ყოფილმა ფეხბურთელმა და 2014 წლის მსოფლიოს ჩემპიონმა კრისტოფერ კრამერმა კი თქვა: „კატარი უბრალოდ საფეხბურთო ერი არაა“.
სტადიონზე ეკვადორელები ცოტანი იყვნენ, მაგრამ საფეხბურთო გარემო მათ შექმნეს. მატჩის ბოლოს მხოლოდ მცირერიცხოვანი ეკვადორელი ფანების ხმა ისმოდა ტრიბუნებიდან, რომლებიც ლუდის აკრძალვას აპროტესტებდნენ: „ლუდი გვინდა, ლუდი გვინდა!“
ფეხბურთში XXII მსოფლიო ჩემპიონატის დაწყების პირველ დღეებში ერთი ბრიტანული ვებ–გვერდის ხუმრობაც დასამახსოვრებელი გახლდათ: – „2014 წლიდან დაწყებული მორგან ფრიმენმა უფრო მეტ მსოფლიო ჩემპიონატში მიიღო მონაწილეობა, ვიდრე იტალიის ნაკრებმაო“. რატომღაც ინგლისელებს იტალიის ეროვნული გუნდის არყოფნა უყურადღებოდ რომ დაეტოვებინათ…
კატარის მსოფლიო ჩემპიონატი პოლიტიკასთან მჭიდროდ დაკავშირებული აღმოჩნდა. ცნობილი გახდა რომ მასპინძლები რუსეთთან გარკვეულ კავშირს ინარჩუნებენ. გავრცელებული ინფორმაციის თანახმად, შეიხმა ტამიმ ბინ ჰამად ალ–ტანიმ რუსეთის პრეზიდენტ ვლადიმერ პუტინს ტელეფონის საუბრისას მადლობა გადაუხადა „ღონისძიების ორგანიზებაში თანამშრომლობისთვის“.
ემირის კანცელარიაში განაცხადეს, რომ თავის მხრივ პუტინმაც მიულოცა კატარს ფეხბურთში მსოფლიოს ჩემპიონატის მასპინძლობა და მის ნაკრებს წარმატებები უსურვა.
პოლიტიკას გვერდი ვერ აუარა ირანის ნაკრების კაპიტანმა და ათენის „აეკ“–ის მცველმა ეჰსან ჰაისაფიმ, რომელმაც ინგლისის ნაკრებთან მატჩის წინ პრესკონფერენციაზე განაცხადა რომ მის ქვეყანაში ნორმალური გარემო არ არის.
„ჩვენს ქვეყანაში არ არის კარგი პირობები და ხალხი ბედნიერი არაა. ჩვენ აქ ვართ, მაგრამ ეს არ ნიშნავს, რომ ამ ხალხის ხმა არ უნდა ვიყოთ. უნდა ვისიამოვნოთ, ვიბრძოლოთ, მაქსიმუმი გავიღოთ, გავიტანოთ გოლები და ირანელი ხალხი საუკეთესო შედეგებით წარმოვაჩინოთ. იმედი მაქვს, ირანში პირობები ხალხის მოლოდინების შესაბამისად შეიცვლება“, – თქვა ჰაისაფიმ.
როგორც მოგვიანებით გამოჩნდა, ირანის ნაკრების მოთამაშეებმა დანაპირები გარკვეულწილად შეასრულეს. ჯერჯერობით ამ ქვეყნის ხელისუფლებას ფეხბურთელების დემარშის შესახებ ოფიციალური ინფორმაცია არ გაუკეთებიათ.
ფიფამ და ტურნირის მასპინძელმა კატარმა მსოფლიო ფეხბურთის ლეგენდები მუნდიალზე მიიწვია, მაგრამ ერთი ფეხბურთელისგან უარი მიიღო. ეს ირანელი ალი დაეია.
ირანული ფეხბურთის ლეგენდამ ინსტაგრამის გვერდზე პოსტი გამოაქვეყნა, სადაც დაწერა, რომ მუნდიალს არ დაესწრება, რადგანაც ამ ჟესტით სურს, მხარდაჭერა გამოხატოს იმ ადამიანებისადმი, რომლებმაც ბოლო პერიოდში ირანში შექმნილი არეულობის გამო ახლობლები დაკარგეს.
„გამარჯობა ჩემო ძვირფასო და საპატიო თანამემამულეებო. ამ დღეებში, როცა უმეტესობა თავს ცუდად გრძნობს, ფიფას და კატარის ფეხბურთის ფედერაციის ოფიციალურ მოწვევაზე უარი ვთქვი. მე არ დავესწრები მსოფლიო ჩემპიონატს ჩემს მეუღლესთან და ქალიშვილებთან ერთად. მირჩევნია, ვიყო თქვენთან, ვიყო ჩემს სამშობლოში და გამოვხატო ჩემი თანაგრძნობა ყველა ოჯახის მიმართ. მათ საყვარელი ადამიანები დაკარგეს. ირანისთვის და ირანელებისთვის ნათელი მომავლის იმედით. ბიძა ალი“, – დაწერა ალი დაეიმ ინსტაგრამის გვერდზე.
დაეის პოსტს ინსტაგრამზე კლარენს ზეედორფი გამოეხმაურა, რომელმაც ირანელი ფეხბურთელი გაამხნევა და მას ირანის სულიერი ლიდერი უწოდა.
„შენ ნამდვილი სულიერი ლიდერი ხარ შენი ხალხისთვის, მეგობარო. აღფრთოვანებული ვარ შენი სიმამაცით, სიკეთითა და ლიდერობით. მშვიდობა არის ის, რასაც ძალიან მალე უნდა მივაღწიოთ. ძალიან მიყვარხარ შენ, შენი ოჯახი და ყველა ძმები და დები ირანიდან“, – დაწერა ზეედორფმა პოსტის კომენტარში.
გუშინ ნიდერლანდების ეროვნული გუნდი სენეგალს დაუპირისპირდა. ამ მატჩამდე კი ნაკრების წევრები კატარში მყოფ მიგრანტ მუშებს შეხვდნენ.
ნიდერლანდების ეროვნული გუნდის მთავარმა მწვრთნელმა ლუის ვან გაალმა წარმოუდგენელი უწოდა იმ ფაქტს, რომ მსოფლიოს თასის კატარში ჩატარებას ფიფამ მხარი დაუჭირა. კომენტარები გუნდის კაპიტანმა ვირჯილ ვან დაიკმა და ნახევარმცველმა ფრენკი დე იონგმაც გააკეთეს.
ვან დაიკი: „ვკითხულობთ და ვუსმენთ ახალ ამბებს, რომლებიც აქაურ რეალობას გადმოსცემენ. მიმაჩნია, რომ კარგი იყო ეს შეხვედრა, აზრის ჩამოყალიბება და ამ ადამიანებთან კონტაქტი. გვერჩივნა, მიგრანტ მუშებთან კომუნიკაცია კამერების გარეშე გვქონოდა, რადგან პრობლემების შინაარს უფრო სიღრმისეულად გავიგებდით. თუმცა, ეს შესაძლებელი არ იყო და შეხვედრის ფორმატის მიუხედავად, გვიხარია, რომ ეს გავაკეთეთ.“
დე იონგი: „ერთ–ერთ ბიჭთან ერთად განცალკევებით აღმოვჩნდი. აქაური სიტუაციის შესახებ რამდენიმე კითხვა დავუსვი, მაგრამ იმდენად ბედნიერი იყო, რომ ამაზე ვერ ფიქრობდა. მთხოვდა, ლივერპულში გადავსულიყავი.“
ნიდერლანდების ნაკრები მუნდიალის მონაწილეებიდან ერთ–ერთი აღმოჩნდა, რომელიც მიგრანტ მშრომელებს შეხვდა. იქამდე მუშებს არგენტინის, ინგლისისა და აშშ–ის გუნდებმა უმასპინძლეს. შეხვედრების ორგანიზატორი საერთაშორისო პროფკავშირული ორგანიზაცია „Building and Wood Workers International“ იყო, რომელსაც მსოფლიოს ჩემპიონატის ორგანიზატორებთან კავშირი არ აქვს.
ფიფა და კატარის მუნდიალი ლონდონის „ტოტენჰემისა“ და ინგლისის ნაკრების მცველმა ერიკ დაიერმაც გააკრიტიკა.
„ბევრი რა მოხდა, რაც იმედგაცრუებას იწვევს. მაშინ, როცა კატარს მასპინძლობის უფლება მისცეს, 16 წლის ვიყავი. ჩვენ არავინ გვეკითხება, სად ვითამაშოთ. ამ გადაწყვეტილებებს იღებენ ადამიანები, რომლებიც ჩვენზე მაღლა დგანან.
საშინელი სიტუაციაა. აქ ვსხედვართ და ფეხბურთზე საუბრის ნაცვლად ამაზე ვსაუბრობთ. ბოლოს და ბოლოს, ჩვენ ფეხბურთელები ვართ და არა – პოლიტიკოსები, ამას ვერ დავმალავთ, ამის იგნორირება არასწორი იქნება. რთული სიტუაციაა, არა მარტო ჩვენთვის, არამედ ყველა მოთამაშისთვის, რომელიც ტურნირზეა“.
დღეს „მუნდიალი – 2022“-ზე სადებიუტო შეხვედრას არგენტინის ნაკრებიც ჩაატარებს.
ნაკრების უმთავრესმა ვარსკვლავმა ლიონელ მესიმ აღნიშნა, რომ მიმდინარე მსოფლიოს ჩემპიონატის მოსაგებად ყველაფერს გააკეთებს.
„როგორც სჩანს, ეს, ჩემთვის ბოლო მსოფლიოს ჩემპიონატია. უკანასკნელი შანსი, რათა პირადად ჩემი და სრულიად არგენტინის ოცნება რეალობად ვაქციოთ. ის უნდა გავაკეთოთ, რაც ვიცით. თავს კარგად ვგრძნობთ, თუმცა, რთულ მატჩებს ველით, რადგანაც მსოფლიოს პირველობაზე სხვაგვარად არ ხდება. ნერვები უნდა მოვთოკოთ და პირველიდან ბოლო წუთამდე ჩვენი ფეხბურთი ვითამაშოთ. ვიცი, რომ მთელი მსოფლიოს მასშტაბით უამრავი გულშემატკივარი გვეყოლება, რისთვისაც მათ მადლობას ვუხდი“,- განაცხადა ლეო მესიმ.
საინტერესოა რომ ამ პირველობაზე ლეო მესის ორი რეკორდის დამყარება შეუძლია.
მას ფინალურ ტურნირებზე 19 მატჩი აქვს ჩატარებული და თუ კიდევ ორ შეხვედრას ითამაშებს, დაეწევა არგენტინის ნაკრების რეკორდსმენს დიეგო მარადონას, რომელსაც მუნდიალებზე 21 მატჩი აქვს ნათამაშები.
თუ მესი კატარში 7 შეხვედრას ჩაატარებს, გაუსწრებს აბსოლუტურ რეკორდსმენს, გერმანელ ლოთარ მათეუსს, რომლის ანგარიშზე 25 მატჩია.
ავტორი
