ოზურგეთის მუნიციპალიტეტის საკრებულოს დამოუკიდებელმა დეპუტატმა ლევან მგელაძემ ოზურგეთის საკრებულოში, დეპუტატების და დამსწრეების წინაშე წლიური ანგარიში წარადგინა.
_ საანგარიშო პერიოდში დავესწარი საკრებულოს _ 19, ბიუროს _ 21, კომისიის _ 38 და დროებითი სამუშაო კომისიის 2 სხდომას, რომელიც დაფიქსირებულია ოქმების სახით. 12-ჯერ დავესწარი არასამთავრობო ორგანიზაციების სხდომას. ვატარებდი რეგლამენტით გათვალისწინებულ თუ დაუგეგმავ შეხვედრებს მოსახლეობასთან, _ თქვა მან და გამოყო სოციალური, ინფრასტრუქტურული თუ სხვა საკითხები, რომლებზეც მისივე თქმით, ბევრი იმუშავა წლის განმავლობაში. მან, ასევე, გამოყო ქალაქ ოზურგეთისთვის თვითმმართველი ქალაქის სტატუსის დაბრუნების საკითხი.
_ ჩემი მიზანია, ოზურგეთს თვითმმართველი ქალაქის სტატუსი დაუბრუნდეს“, _ – განაცხადა მგელაძემ.
ლევან მგელაძემ უკან გადადგმული ნაბიჯი უწოდა საპრეზიდენტო არჩევნებს. საარჩევნო პროცესის გაუმჯობესების შესახებ ისაუბრა და გამოთქვა სურვილი, „ასეთი არჩევნები საქართველოში არასდროს ჩატარდეს“.
კოლეგა დეპუტატებმა გამოთქვეს საკუთარი თვალსაზრისი დეპუტატ ლევან მგელაძის მუშაობის შესახებ. მათ ხაზი გაუსვეს იმ ფაქტს, რომ ის ხალხმა, როგორც დამოუკიდებელი კანდიდატი, ოზურგეთში ორჯერ აირჩიეს, რაც მის მაღალ ავტორიტეტზე მიუთითებსო.
ნანული ორაგველიძემ მცირე შენიშვნაც გამოთქვა, ქალაქ ოზურგეთის საკრებულოში უფრო კრიტიკული იყოო.
ლევან მგელაძემ „გურია ნიუსის“ კითხვებსაც უპასუხა. კერძოდ, ოზურგეთისთვის კვლავ თვითმმართველი ქალაქის სტატუსის დაბრუნებაში საკუთარ ძალისხმევას როგორ ხედავს.
_ ჩვენ გვქონდა შეხვედრები, ჯერჯერობით, არასამთავრობო ორგანიზაციებთან, ალბათ, შემდეგ შეგროვდება წინადადებები პეტიციის სახით, რომელიც მიეწოდება ხელისუფლებას და იმედია, მივაღწევთ იმას, რაც დაგეგმილი იქნება.
_ საპრეზიდენტო არჩევნებთან დაკავშირებით მკვეთრად უარყოფითი აზრი გამოთქვით…
_ ყველა არჩევნებს ეხება ეს ჩემს მოხსენებაში. იყო უამრავი დარღვევა. მარტო ჩემი აზრი არ არის, ეს არის არასამთავრობოების აზრი, საზოგადოებრივი ორგანიზაციების აზრი. პრობლემები იყო, თვალი უნდა გავუსწოროთ ყველამ ამ პრობლემებს. წელსაც გვაქვს ჩვენთან არჩევნები, ქალაქის ერთ-ერთ მაჟორიტარულ ოლქში და სასურველი იქნება, რომ ნამდვილად დემოკრატიულ გარემოში ჩატარდეს.
საუბარია საკრებულოში „ქართული ოცნების“ მაჟორიტარი დეპუტატის, ახლახან გარდაცვლილი ლევან თოიძის მონაცვლე ახალი კანდიდატის არჩევნებზე, თუმცა, მოახლოებული არჩევნების ირგვლივ უკვე გარკვეული ვერსიები ვრცელდება, რომლის შესაბამისად, არჩევნებიც ვერ იქნება დემოკრატიული, რის შესახებაც “გურია ნიუსი” რეპორტაჟს უახლოეს დროში შემოგთავაზებთ.
