საერთაშორისო პროექტის „ევროპული სოლიდარობის დღეების“ ფარგლებში, მეოთხე საჯარო სკოლაში დასკვნითი შეხვედრა შედგა.
სკოლის დირექტორმა, ტარიელ კალანდაძემ ისაუბრა მრავალმხრივი პარტნიორული ურთიერთობების განმტკიცებისა და ურთიერთთანამშრომლობის შესახებ.
მან თქვა, რომ კონკურსში, რომელიც გასული წლის ოქტომბერში დაიწყო, პრეილის (ლატვია) , ნიჟინის (უკრაინა) და ოზურგეთის (საქართველო) სახელით, მოსწავლეები მონაწილეობდნენ.
მეოთხე საჯარო სკოლის, სამივე საფეხურის ცამეტმა მოსწავლემ, მიიღო ამ პროექტში მონაწილეობა. მათ საკუთარი ნახატები წარადგინეს.
კონკურსის ლაიტმოტივი იყო: „ჩემი სამშობლოს სილამაზე და ისტორია“ .
შემოქმედებითი კონკურსის მონაწილეებს სიტყვით მიმართა ოზურგეთის საკრებულოს თავმჯდომარემ, დავით დარჩიამ, პროექტისა და სამომავლო გეგმების შესახებ, პროექტის ქართული მხარის კოორდინატორმა, საკრებულოს აპარატის უფროსმა ნანა თავდუმაძემ.
ლატვიურ-უკრაინულ-ქართული, საქართველოს პარლამენტის მეცნიერების, კულტურისა და სამოქალაქო განათლების დეპარტამენტის დირექტორის მოადგილემ, გიორგი კილაძემ ისაუბრა ეროვნული ბიბლიოთეკის იმ კოლექციებზე, რომელიც ეხება უკრაინასა და საქართველოს ურთიერთობას. მანვე დამსწრეებს წარუდგინა ეროვნული ბიბლიოთეკის ციფრული კოლექციები: „უკრაინა“ და „საქართველო, ევროპა, აშშ და დემოკრატიული ღირებულებები“.
შემოქმედებით კონკურსში გამარჯვებული მეოთხე საჯარო სკოლის, სამივე საფეხურის ცამეტ მოსწავლეს და მათ პედაგოგებს სამახსოვრო საჩუქრები და დიპლომები გადასცეს.
_ძალიან გვიხარია, რომ ჩვენი მოსწავლეები საერთაშორისო პროექტის გამარჯვებული არიან. მათ გადაეცათ ინგლისურენოვანი დიპლომები, ფუნჯები, საღებავები. დაწყებითი კლასების მოსწავლეებს გადასცეს ფერადი ფანქრები. თითოეულ გამარჯვებულს, პედაგოგებს, მშობლებს, მუნიციპალიტეტს ვულოცავ ამ გამარჯვებას. ასეთი გამარჯვება ქვეყნებს შორის საუკეთესო, მეგობრული ურთიერთობების გაღრმავებას უწყობს ხელს. მით უფრო, როცა ახლა ვხედავთ, რა ხდება მოძმე უკრაინაში, – თქვა „გურია ნიუსთან“ სკოლის დირექტორმა ტარიელ კალანდაძემ.
სკოლის სახვითი ხელოვნების მასწავლებლმა შორენა კიკუტაძემ, რომელიც ძალიან გახარებულია მოსწავლეთა წარმატებით, აღნიშნა, რომ ეს კონკურსი განსაკუთრებულად ბევრი რამის მთქმელია:
_კონკურსი დაიწყო მაშინ, როცა პანდემია მოგვადგა კარს და ყველაფერი ერთბაშად დადუმდა. თითქოს, წარმოუდგენელი იყო ყველაფერი. და ამ დროს ბავშვები ისხდნენ და ფიქრობდნენ, ბჭობდნენ, წერდნენ და ხატავდნენ სამშობლოზე, მეგობრობაზე, სხვა ქვეყნების თანატოლებზე. სხვათა შორის, მაშინ უკრაინის ტრაგედია დაწყებული არ იყო. ბავშვებმა კი უამრავი უკრაინული დროშა დახატეს, მზისფერი უხვად მიმოფანტეს თავიანთ ნამუშევრებში…მიხარია, რომ ეს ფერები პროექტში გამარჯვების მაუწყებელი აღმოჩნდა და უკრაინის მიმართ თანადგომის გამოხატულებად იქცა, – თქვა ქალბატონმა შორენამ.
ავტორი
