როლანდ ბლადაძე საქართველოს უზენაეს სასამართლოს ეკონომიკისა და მდგრადი განვითარების მინისტრთან შეხვედრამდე, საქმეზე გადაწყვეტილების სარეზოლუციო ნაწილის გამოცხადების გადადების თხოვნით მიმართავს.
როგორც ცნობილია, სასამართლოსთვის გადაწყვეტილების სარეზოლუციო ნაწილის გამოცხადების თხოვნა, ეკონომიკისა და მდგრადი განვითარების სამინისტროს მიერ როლანდ ბლადაძისთვის ჩამორთმეულ ქონებაზე დავის მორიგებით დასრულების ახალი პირობის გასაჯაროება გახდა.
სამინისტრო დავის მორიგებით დასრულების მიზნით, ყოველგვარი ბრალის აღიარების გარეშე გამოხატავს მზაობას სსიპ „სახელმწიფო ქონების ეროვნული სააგენტოს“ მეშვეობით, მოამზადოს და საქართველოს მთავრობას განსახილველად წარუდგინოს საქართველოს მთავრობის განკარგულების პროექტი – ქ. თბილისში, ნინო ჟვანიას ქუჩა N72-ში (ყოფილი კეკელიძე), 3 სექცია, მე-12 სართული, ბინა N23 (ს/კ 01.15.02.056.001.01.503) მდებარე უძრავი ქონების სიმბოლურ ფასად გადაცემის თაობაზე შემდეგი პირობით: კასატორი მხარე უარს განაცხადებს სახელმწიფოს მიმართ დავის საგნის ირგვლივ ქონებრივი ან სხვა სახის ზიანის ანაზღაურებაზე, ასევე, ყოველგვარ მოთხოვნაზე, საჩივარზე, სარჩელზე როგორც საქართველოს საერთო სასამართლოებში, ისე, ნებისმიერი სხვა ქვეყნის, მათ შორის, ადამიანის უფლებათა ევროპულ სასამართლოში. აღნიშნული განცხადება 2018 წლის 28 მაისით თარიღდება და სასამართლოში უკვე რეგისტრირებულია.
როგორც ბლადაძე აცხადებს, საქართველოს ეკონომიკისა და მდგრადი განვითარების სამინისტროს შემოთავაზებული პირობები რადიკალურად ცვლის იმ შეთანხმებებს, რომელიც საკითხთან მიმართებით, 2018 წლის 11 მაისის სასამართლო სხდომაზე დაფიქსირდა. როლანდ ბლადაძე თანახმა იქნებოდა ალტერნატიული ფართის სახით მიეღო ერთი საცხოვრებელი ბინა ქ. თბილისში, თუ მორიგების აქტში არ დაფიქსირდებოდა მიყენებული ზიანის სამომავლოდ მოთხოვნის უფლებაზე უარი. სასამართლომ სამინისტროს როლანდ ბლადაძის მინისტრ დიმიტრი ქუმსიშვილთან შეხვედრის ორგანიზება ჯერ კიდევ 11 მაისის სხდომაზე დაავალა და გაიზიარა მხარის პრეტენზიები იმის თაობაზე, რომ შესაძლებელია, პოლიტიკური გადაწყვეტილების მიმღებ პირთან – მინისტრთან არ ხდებოდეს სასამართლოს საქმისადმი დამოკიდებულებებისა და როლანდ ბლადაძის მოთხოვნების სრულფასოვნად მიტანა. მიუხედავად ამისა, სამინისტროსთან გაგრძელებული კომუნიკაციის პირობებში, მინისტრსა და დაზარალებულ მოქალაქესთან შეხვედრა, მოცემულ დრომდე, მიუღწეველი გახდა.
„ჩემთვის პრინციპულად მნიშვნელოვანია მინისტრთან შეხვედრა, რომლის პოზიციები იქნება განმსაზღვრელი დავის მორიგებით დასრულებაზე. არსებობს გარკვეული პირობები, რომელზედაც უშუალოდ მინისტრმა უნდა გასცეს პასუხი. ამიტომაც, მოგმართავთ პერსონალურად და თხოვნით, საქმეზე სარეზოლუციო ნაწილის გამოცხადება გადაიდოს გონივრული ვადით, 11 ივნისის მდგომარეობით“, _ ნათქვამია საქართველოს უზენაესი სასამართლოს მიმართ რეგისტრირებულ წერილში. ცნობისთვის: მინისტრი დიმიტრი ქუმსიშვილი საქართველოში 30 მაისიდან ბრუნდება.
როლანდ ბლადაძემ აღნიშნა, რომ იმ შემთხვევაში, მათი საბაზრო ღირებულებების მიუხედავად, თუკი უპირობოდ სახელმწიფოს მიერ გადაცემულ იქნებოდა შავი კარკასის მდგომარეობით, მდებარე ორი საცხოვრებელი ფართი ქ. თბილისში ნინო ჟვანიას (ყოფილი კეკელიძე) ქუჩაზე შემდეგი მონაცემებით 252 კვ.მ. ფართი და 160 კვ.მ. ფართი (მე-12 სართულზე), დავას მორიგებით დაასრულებდა და კასატორი მხარე უარს განაცხადებს სახელმწიფოს მიმართ დავის საგნის ირგვლივ ქონებრივი ან სხვა სახის ზიანის ანაზღაურებაზე, ასევე, ყოველგვარ მოთხოვნაზე, საჩივარზე, სარჩელზე როგორც საქართველოს საერთო სასამართლოებში, ისე, ნებისმიერი სხვა ქვეყნის, მათ შორის, ადამიანის უფლებათა ევროპულ სასამართლოში. სასამართლომ შენიშნა, რომ სახელმწიფოს ზედმეტობით გადაცემული ფართი შემთხვევაში, უნდა ეფიქრა მოქალაქის ერთგვარ მორალურ კომპენსირებაზე, რომელიც გამოიხატა უკანონო დევნაში, ქონების ჩამორთმევაში და როლანდ ბლადაძის მოთხოვნის უფლების დათმობაში სამომავლო დავებთან დაკავშირებით.
„ახალგაზრდა ადვოკატების“ საქართველოს უზენაეს სასამართლოსთან კომუნიკაციის შედეგად, წინასწარი ინფორმაციით, როლანდ ბლადაძის შუამდგომლობა უნდა დაკმაყოფილდეს და საქმეზე სარეზოლუციო გადაწყვეტილების გამოცხადების გადადება 11 ივნისის მდგომარეობით მოხდება.
საქმეს ნინო ბაქაქური (თავმჯდომარე), ბესარიონ ალავიძე და ზურაბ ძლიერიშვილი განიხილავს. უზენაეს სასამართლოს გადაწყვეტილება დღეს უნდა გამოეცხადებინა.
