ქალაქ ოზურგეთში, თენიეშვილის ქუჩაზე (ყოფილი გაგარინის ქუჩა) ახლახან ძაღლმა 11 წლის გოგონა დაკბინა. გოგონა საავადმყოფოში გადაიყვანეს, ვაქცინაცია ჩაუტარდა და დღეისთვის თავს უკეთ გრძნობს.
“გურია ნიუსი” თენიეშვილის ქუჩას ეწვია _ აქაურებმა შემოგვითვალეს, ძაღლების შემოსევაღა გვაკლდა, ყოველი წვიმის დროს ჭერი თავზე გვექცევა და მოუწყობელ ეზოებში, გაავდრებისას ტბები დგას, სიცხეში კი შესაძლოა, ქვეწარმავალმა დაგვჭამოსო.
ადგილზე როცა მივედით, ქუჩაზე მდებარე ორსართულიანი კორპუსების მცხოვრებლები ეზოში დაგვხვდნენ და საკუთარ გასაჭირზე გვესაუბრნენ.
თენიეშვილის ქუჩის ნომერ 6, 8 და 10 კორპუსში თითქმის ერთნაირი მდგომარეობაა _ მოუწესრიგებელი ეზოები და სანიაღვრე არხები, მიუსაფარი ძაღლების და კატების წანწალი ჩვეულებრივი ამბავია, რაზეც ღიად საუბრობს მოსახლეობა:
სვეტა ტომასიანი, ლამზირი ხინთიბიძე, ვენერა ბექაური, მეორე კორპუსის მობინადრეები: “ჩვენს კორპუსებთან იმდენი მიუსაფარი ძაღლი დაძრწის, ალბათ, ქალაქში ამდენი არსადაა. რამდენიმე დღის წინ ბავშვს უკბინა. მოვიდნენ ქალაქის მუნიციპალური მომსახურების ცენტრიდან და ძაღლს ვერ წავიყვანთ, ჯერ ათი დღის განმავლობაში უნდა დავაკვირდეთ, რომ დავრწმუნდეთ, ცოფიანია თუ არაო… კიდევ ვინმე უნდა დაკბინოს, თუ რა უნდა მოხდეს უარესი?
ეს გვაკლდა ახლა. უმძიმესი მდგომარეობაა ჩვენს ეზოებში _ რამდენი წელია, ვითხოვთ, რომ სანიაღვრე არხები წესიერად გაკეთდეს, კეთილმოეწყოს ეზოები. კორპუსების წინ, ქუჩის გაწვრივ ჩამწკრივებული ალვის ხეები ჩვენი თავის ტკივილია. მთელი წლის მანძილზე კორპუსების ჟოლობებში ალვის ფოთლები იჭედება, ყოველ გაწვიმებაზე გაჭედილი მილებიდნ წყალი გადმოდის და პირდაპირ ჭერში და ფანჯრებში ჟონავს, კედლები იჟღინთება წყლით და ხედავთ, ბათქაში როგორ ცვივა. ამდენი წელი ამის გაკეთება არ შეიძლებოდა? რა უნდა ამ ხეების “გადამორვას” _ ხომ არ ვამბობთ, ძირფესვიანად ამოიღეთო? დრომ ვერ დაანგრია და ამ ფოთლების მიზეზით დაინგრევა ეს კორპუსები”, _ ამბობენ ქალბატონები.
ადგილობრივები კორპუსების წინ დაუგეგმავად გაშენებული ბოსტნების და ეზოები აღებას და სკვერების გაშენებასაც ითხოვენ. პადვაკან ტონაკანიანი ამბობს, რომ ანტისანიტარიის, ათასგვარი ბუზების და ხოჭოების მეტი, არაფერი ვრცელდება ამ შემოღობილი ბოსტნებიდან:
“ძაღლი, რომელმაც ბავშვი დაკბინა, აგერ, კორპუსის ქვეშ, სადარბაზოს შესასვლელთან ათევს ღამეს. როგორმე ეს ძაღლები უნდა მოგვაშორონ! კორპუსების წინ და უკან ანტისანიტარიაა მოუწყობელი სივრცეებია. იანვრის შემდეგ დადის მოსახლეობა გამგეობაში. სამი წლის წინაც იყვნენ და მას შემდეგ, დრო და დრო სულ მიდიან, მაგრამ რა? ცარიელი დაპირება და მორჩა”, _ ამბობს ტონაკანიანი.
მარინა დარჩია: “მარადიული პრობლემაა ეზოს მოწესრიგება. რახანია დავდივართ გამგეობაში. ბოლოს ცხრა აგვისტოს გამგეობაში. იქნებ, გვაღირსონ რაიმე”.
ანიკო კილაძე: “გუშინ მოვიდნენ გამგეობიდან. არჩევნები ახლოვდება და, ალბათ, ამიტომ. რა გაწუხებთო, გვკითხეს. გააკეთონ ოღონდ და არჩევნებს დავეძებ?! სამი წლის წინ გაუკეთეს ეს ჟოლობები, მაგრამ ალვის ხეები ისეა გაზრდილი, ჟოლობებში ფოთლები იჭედება და ყოველი წვიმის დროს გვაზიანებს. გთხოვთ, იქნებ, გააგებინოთ, რომ გადაჭრან ეს ხეები. ერთი შეხედვით, მზიან ამინდში, პრობლემას ვერ შეამჩნევთ, თუმცა, წვიმაში მოდით და ნახეთ ჩვენი უბედურება. წყალი ზევიდან გადმოდის და ტბებად დგება ოთახებში. კედლები ხომ სულ გაჟღენთილია”.
მობინადრეები იუმორნარევ შემოთავაზებაზეც აკეთებენ აქცენტს, იქნებ, ბიძინა ივანიშვილმა იყიდოს და მოგვაშოროს, ალვის ხეების პირობაზე ლამაზი და ასაკიანიც არისო.
რაც შეეხებ კეთილმოუწყობელ მე-12 კორპუსს, სადაც არც წყალია და კედლებიც ჩამოშლილია, სადარბაზო კი მთლიანად კეთილმოუწყობელი, მობინადრეები ამბობენ, რომ მათი თხოვნა, წვეოდა აქ მცხოვრებლებს, დააკმაყოფილა ოზურგეთის მუნიციპალიტეტის მერმა, კოტე შარაშენიძემ და ადგილზე მივიდა.
_ კი მოვიდა, მარა თქვა, ეს კორპუსი დასაშლელი ყოფილაო, _ თქვეს მათ.
“გურია ნიუსი” მუნიციპალიტეტის მომსახურების ცენტრის სპეციალისტს, ვეტექიმ გოგი მაღლაფერიძეს დაუკავშირდა და მიუსაფარი ძაღლების შესახებ ესაუბრა:
_ ვიყავი ადგილზე. ბავშვი დაკბინა ძაღლმა, მაგრამ როგორც ეტყობა, ეს ძაღლი ცოფიანი არ არის. ჩვენ შევთავაზეთ, რომ ათი დღის განმავლობაში დაკვირვება მოახდინონ. ხუთი დღე უკვე გასულია. შემდეგ გადავიყვანთ, სტერილიზაციას გავუკეთებთ და დავაბრუნებთ ადგილზე. წესი ასეთია.
_ ბატონო გოგი, ძაღლი დატოვეთ ღია ცის ქვეშ. დაკვირვების მოხდენა თუ გინდათ, რატომ არ მოათავსეთ იზოლატორში? რა გარანტიაა, რომ კიდევ ვინმეს არ დაკბენს?
_ხუთი დღე უკვე გასულია. არაა ის ძაღლი ცოფიანი. მივალთ და გადავიყვანთ ერთ კვირაში…
რაც შეეხება საცხოვრებელი კორპუსების პრობლემას, ეზოების კეთილმოწყობასა და ხეების გადამორვას, აღნიშნულის შესახებ, ოზურგეთის მერიიდან “გურია ნიუსს” ასეთი კომენტარი მოაწოდეს:
“მზადდება თენიეშვილის ქუჩის ნომერ ოთხი და ექვსი კორპუსების ეზოების კეთილმოწყობის საპროექტი სახარჯთაღრიცხვო დოკუმენტაცია. პროექტი ითვალისწინებს ეზოს მოასფალტების და სანიაღვრე არხების მოწყობას. რაც შეეხება აღნიშნულ ტერიტორიაზე ხეების გადამორვას, ოზურგეთის მუნიციპალიტეტის მერიის სამართლებრივი უზრუნველყოფისა და ზედამხედველობის სამსახურის მიერ გაცემულია ნებართვა, რომლის საფუძველზეც ააიპ “მომსახურების ცენტრი” ხეების დამორვას განახორციელებს”.
