რამდენიმე დღის წინ სოციალურ ქსელში, ფეისბუქგვერდზე “ვეძებ” გამოქვეყნდა ანა ბოლქვაძის პოსტი. პოსტს ამოცნობის მიზნით, მსგავსებისთვის თან ახლავს ოჯახის ფოტოები. ბოლქვაძეები 1989 წლის 5 თებერვალს დაბადებულ გოგოს ეძებენ.
როგორც ისინი ვარაუდობენ, გოგონა ცოცხალია, მათ კი სამშობიარო სახლიდან ბავშვის ცხედარი გამოატანეს. მათი ვარაუდით, ბავშვი მედიკოსებმა გააშვილეს.
“ვეძებთ 1989 წლის 5 თებერვალს თბილისის პირველ სამშობიაროში დაბადებულ გოგოს (სავარაუდოდ, დაბადების თარიღი იქნება შეცვლილი). ბავშვი დაიბადა ჯანმრთელი. მეორე დღეს დედას უთხრეს, რომ საჭირო გახდა ბავშვთა რესპუბლიკურ საავადმყოფოში გადაყვანა რეანომობილით, რადგან განუვითარდა სეფსისი, თუმცა, მშობელის დაუკითხავად და უნახავად მოხდა ბავშვის წაყვანა. დედას დაუსვეს კითხვები: ჰქონდა თუ არა რამე გენეტიკური ან ინფექციური დაავადება გადატანილი? მთელი 20 დღის განმავლობაში აკითხავდა მამა ბავშვთა რესპუბლიკურ საავადმყოფოში, დაჟინებული თხოვნის თუ მოთხოვნის მიუხედავად, ბავშვს არ ანახებდნენ! 20 დღის შემდეგ უთხრეს, რომ გარდაიცვალა და გამოატანეს ცხედარი.
თუმცა, ახლახან ვიგებთ, რომ დაბადების მოწმობას აწერია განმეორებითი და რეგისტრაციის თარიღი წერია 1989 წლის 18 მარტი. გარდაცვალების მიზეზად წერია თანდაყოლილი ფილტვების ანთება, რაც არ შეესაბამება სიმართლეს.
თუ ვინმეს გეცნობათ ეს ისტორია ან ბავშვობის ფოტოებით ამსგავსებთ შეგვეხმიანეთ!”, _ წერს ანა ბოლქვაძე სოციალურ ქსელში.
“გურია ნიუსი”, სავარაუდოდ, გაშვილებული ბავშვის ახლობელს ესაუბრა. მისი თქმით, ძალიან ბევრი ფაქტორია, რაც აფიქრებინებთ, რომ ბავშვი ცოცხალი და გაშვილებულია. თუმცა, ოჯახის ინტერესებიდან გამომდინარე, მასთან საუბარს არ ვასაჯაროებთ.
როგორ განვითარდება მოვლენები “გურია ნიუსი” აუცილებლად მიაწვდის მკითხველს.
