ჩოხატაურელმა ემიგრანტმა, 50 წლის თეა ნიკოლეიშვილმა იტალიაში სიცოცხლე თვითმკვლელობით დაასრულა. ამის შესახებ ინფორმაცია სოციალურ ქსელში ერთ-ერთმა ემიგრანტმა გაავრცელა.
,,დღეს იტალიის ქალაქ მარტინა ფრანკაში, სადაც ამჟამად ვიმყოფები, სიცოცხლე თვითმკვლელობით დაასრულა ქართველმა ემიგრანტმა, თეა ნიკოლეიშვილმა. უზომოდ ვწუხვარ. ყველა შოკში ვართ”, – წერს მზია ალადაშვილი.
„გურია ნიუსი“ შეეცადა გაერკვია, რას უკავშირებენ გარდაცვლილის ოჯახის წევრები მომხდარს და როდის გადმოასვენებენ თეა ნიკოლაიშვილს საქართველოში _ამ საკითხებზე გარდაცვლილის ბიძაშვილი, ვასილ ნიკოლაიშვილი გვესაუბრა.
როგორც ის ჩვენთან საუბარში ამბობს, დანამდვილებით არაფრის თქმა არ შეუძლია, თუმცა, არ გამორიცხავს, რომ მიზეზი თეა ნიკოლაიშვილის შვილის ირგვლივ არსებული პრობლემები გამხდარიყო.
„არ ვიცი, რატომ გააკეთა. შვილთან ერთად იყო იტალიაში წასული და როგორც ვიცი, შვილის ჰქონდა რაღაც პრობლემები და შესაძლოა მიზეზი ესეც გახდა. დანამდვილებით არაფრის თქმა არ შემიძლია. თეას შვილი, ლეილა, 19 წლისაა. ამ ეტაპისთვის დაკავებულია იტალიაში. ზუსტად რა მიზეზით და რა პრობლემისთვის, ვერ გეტყვით. ის ინფორმაცია ვიცი მეც, რაც ინტერნეტით ვრცელდება. გაჟღერდა ინფორმაციაც, რომ თვითმკვლელობა ფინანსურ მაქინაციებს უკავშირდება, მაგრამ არც ეს ვიცი. გამოძიება დაადგენს. გუშინ გავიგეთ მომხდარის შესახებ. ამ ეტაპისთვის ჩვენი საკონსულო დაუკავშირდა იტალიის საკონსულოს შეავსეს რაღაც დოკუმენტები და გვითხრეს, რომ შესაძლო,ა გადმოსვენებას 1 კვირა დაგვიანდეს, თუმცა, შესაძლოა უფრო მეტი დროითაც დაგვიანდეს. ამის შესახებ ემიგრანტებმა გვითხრეს. ჩაუტარებენ, სავარაუდოდ, ექსპერტიზას”, _ გვითხრა ვასილ ნიკოლაიშვილმა.
