საქართველოს 20-წლამდე ნაკრების წევრმა ვახტანგ ჯინჭარაძემ პრო დ2-ში მოასაპარეზე “პერპინიანთან” კონტრაქტი 2022 წლამდე გაახანგრძლივა. ის პოზიციით ბურჯია, თუმცა, მეორე ხაზშიც შეუძლია თამაში და ნაკრებში სწორედ ამ პოზიციაზე თამაშობს.
ჯინჭარაძე 2018-19 წლების სეზონი გორის “ჯიქში” გაატარა და 2019 წელს საქართველოს 20 წლამდე ნაკრებთან ერთად არგენტინაში გამართულ მსოფლიო თასზე იასპარეზა, სადაც ოთხ შეხვედრაში მიიღო მონაწილეობა და ახალი ზელანდიის ნაკრების წინააღმდეგ ლელოს დადებაც მოახერხა.
მიმდინარე სეზონიდან ჯინჭარაძე “პერპინიანის” ღირსებას იცავს და ძირითადად ესპუარებში ასპარეზობს, თუმცა, გუშინ პრო დ2-ის მორიგ ტურში, სადაც „პერპინიანსი“ გასვლაზე „ბაირიცს“ დაუპირისპირდა, ქართველი მორაგბე განაცხადში იყო და მატჩში 51-ე წუთიდან ჩაერთო, მარცხენა ბურჯის, ბოუტემანეს მაგივრად.
აღსანიშნავია ის ფაქტიც, რომ ბაირიცის განაცხადშიც იყვნენ ქართველები, ორი პირველხაზელი, გიორგი ნუცუბიძე და ვახტანგ ახობაძე, რომლებიც 54-ე და 66-ე წუთიდან გამოჩდნენ სტადიონზე.
საკმაოდ დაძაბული მატჩი „პერპინიანის“ გამარჯვებით _ 18:22 დასრულდა და სამხრეთელებს დროებით პირველ ადგილზე აღზევების საშუალება მიეცათ, თუმცა, კონკურენტებს თამაშით ნაკლები აქვთ ჩატარებული. შემდეგი თამაში მათ 28 თებერვალს უწევთ ერთ-ერთ აუტსაიდერ „რუენთან“. თავის მხრივ, „ბაირიცი“ მეხუთე ადგილს იკავებს და ისინი შემდეგ მატჩს 27 თებერვალს „გრენობლთან“ გასვლაზე გამართავენ.
