| ჩოხატაურის მუნიციპალიტეტში დამოუკიდებლობის დღისადმი მიძღვნილი ღონისძიებები გაიმართა. ადგილობრივი ხელისუფლების წარმომადგენლებმა ყვავილებით შეამკეს საქართველოს დემოკრატიული რესპუბლიკის მთავრობის პირველი თავმჯდომარის, ნოე რამიშვილის, ბიუსტი. შესრულდა სახელმწიფო ჰიმნი; ხელოვნების სასახლის მიმდებარე ტერიტორიაზე ადგილობრივი შემსრულებლების კონცერტი და სხვადასხვა სახის გასართობი ღონისძიება გაიმართა; ცენტრალური სტადიონზე ჩატარდა სპორტული აქტივობები: დოღი, მკლავჭიდი, მხატვრული ტანვარჯიში, ბაგირის გადაძალვა და რაგბის საჩვენებელი თამაში. გამარჯვებულებს სპეციალური პრიზები და სიგელები გადაეცათ. საზეიმო ღონისძიებები ხელოვნების სასახლეში კვარტეტ „უნისონის“ კონცერტით გაგრძელდა. დასასრულ გამოვლინდნენ საპატიო ჩოხატაურელები:
ზაალ სიხარულიძე-ფიზიკოსი, აქტიურად იყო ჩაბმული ეროვნულ მოძრაობაში, 1992-93 წლებში იბრძოდა სამაჩაბლოსა და აფხაზეთში; პატრიარქის კურთხევით არის სიხარულიძეთა საგვარეულოს მედროშე, მინიჭებული აქვს რაინდის წოდება და ჯვარი. არის „საქართველოს ჩოხოსნების“ თავმჯდომარე, ეროვნული აკადემიის საპატიო წევრი. ამჟამად წარმოადგენს მსოფლიოს ვეტერანთა ფედერაციას ამიერკავკასიაში. დავით ჟღენტი- ქველმოქმედი, საგზაო სამშენებლო კომპანია შ.პ.ს „NEW ROAD-ის“ დამფუძნებელი და გენერალური დირექტორი. საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ ზედიზედ ორჯერ იყო დასახელებული წლის საუკეთესო მეგზევედ. მუნიციპალიტეტის წინაშე გაწეული განსაკუთრებული ღვაწლისთვის დაჯილდოვდნენ სხვადასხვა სფეროს წარმომადგენლები.
საქართველოს დამოუკიდებლობის დღისადმი მიძღვნილ ღონისძიებებს გურიის მხარეში სახელმწიფო რწმუნებული გიორგი ურუშაძე, საქართველოს გარემოს დაცვისა და სოფლის მეურნეობის მინისტრის მოადგილე თენგიზ ნასარიძე, სოფლის განვითარების სააგენტოს თავმჯდომარის მოადგილე ნატალია ხარატიშვილი, ჩოხატაურის მუნიციპალიტეტის მერი დავით შარაშიძე და საკრებულოს თავმჯდომარე ირაკლი კუჭავა ესწრებოდნენ. #26მაისი #ესდღეჩვენია #ჩოხატაური |
Developed By Web Features 2025 © All rights reserved