საზოგადოებამ, მედიის საშუალებით, კარგად იცის ჩოხატაურის მუნიციპალიტეტში უკვე ორი წლის განმავლობაში მიმდინარე პროექტის შესახებ, რომლის ფინანსური მხარდამჭერი ევროკავშირია.
პროექტის _ “ჩოხატაურის მუნიციპალიტეტი მდგრადი ენერგეტიკული მომავლისკენ” _ აპლიკანტია ჩოხატაურის მუნიციპალიტეტი. პროექტის თანააპლიკანტები ანუ ორგანიზაციები, რომლებიც ჩართულები არიან ამ პროექტში, არიან პოლონეთის “სოლიდარობის ფონდი PL საქართველოში” და არასამთავრობო ორგანიზაცია “პროგრესის სახლი” ოზურგეთიდან. დღეს სამწლიანი პროექტის მეორე წელს შევაჯამებთ ჩოხატაურის მუნიციპალიტეტის საკრებულოს თავმჯდომარის მოადგილესთან ზაალ მამალაძესთან ერთად.
_ ეს პროექტი არის მრავალფუნქციური, მრავალმხრივი და ამიტომ, ძალიან მნიშვნელოვანია ჩოხატაურისთვის. პირველ რიგში, მთავარი კომპონენტი საგანმანათლებლო მიმართულებაა: ექსპერტების მიერ ჩატარდა საინფორმაციო ტრენინგკურსების ციკლი ენერგო ეფექტურობის მიმართულებით. ტრენინგკურსების მონაწილეები იყვნენ საბავშვო ბაღების ბენეფიციარები, მშობლები, მასწავლებლები. ასევე, საუბრები შედგა სკოლებშიც; მედიის მეშვეობით, ჩოხატაურის მოსახლეობის დიდმა ნაწილმა ინფორმაცია მიიღო ენერგო ეფექტურობის და განახლებადი ენერგიის მიმართულებით, _ ამბობს ზაალ მამალაძე.
ამ პროექტის მეორე მნიშვნელოვანი კომპონენტი ინფრასტრუქტურული მიმართულებაა. მოგეხსენებათ, საბავშვო ბაღებში განსაკუთრებით მნიშვნელოვანია სუფთა გარემო, ენერგო ეფექტურად აღჭურვილი სითბო–სიგრილის სისტემები. ამიტომ, სამიზნე შვიდი საბავშვო ბაღიდან, ენერგო ეფექტურად აღიჭურვა სამი, ხოლო ოთხის _ ამჟამად მიმდინარეობს და სავარაუდოდ, იანვრის ბოლოს დასრულდება. შედეგად, მივიღებთ ენერგოდამზოგავ სუფთა და ნორმალურ გარემოს ბავშვებისთვის.
მკითხველს შევახსენებ, რომ რუსული დეზინფორმაციის ნაკადი ხშირად ავრცელებს ირონიის შემცველ მანიპულაციურ ინფორმაციას, რომ “ევროპა ჭუჭყიანია, რადგან იქ ცხელ წყალს ზოგავენ” ან “ევროპა ღრმა კრიზისშია და ფანჯრებიდან გასულ სითბოს აკონტროლებენ“… დიახ, განვითარებული ქვეყნები, შეთანხმებების და კონვენციების საფუძველზე, დედამიწაზე მიმდინარე რთული ეკოლოგიური პრობლემების გამო, ცდილობენ, ნაკლები ენერგოდანახარჯით, მეტ ეფექტს მიაღწიონ, ნაკლები ზიანი მიაყენონ საცხოვრებელ გარემოს, დედამიწას. ამ გამოცდილებების და გნებავთ, ცხოვრების წესის გაზიარება, სასიცოცხლოდ მნიშვნელოვანია ჩვენი ქვეყნისთვისაც.
პროექტის საინტერესო და ძალიან მნიშვნელოვანი კომპონენტია მცირე გრანტების პროგრამა. ამ პერიოდში, სამი მიმართულებით გაიცა მცირე გრანტები: საინიციატივო ჯგუფების, ინდივიდუალური და არასამთავრობო ორგანიზაციების მიერ შემოტანილი პროექტები; ასევე, გრანტები მედიის მიმართულებით. დღემდე, სულ 25 გრანტი გაიცა _ თითოეული 5 ათასი ევროს ფარგლებში. საკმაოდ წარმატებული პროექტები გახორციელდა ან მიმდინარეობს გახორციელება. მაგალითად, მიმდინარეობს მშენებლობა და მცირე ინფრასტრუქტურის მოწყობა, მათ შორის, მაგალითად, გარე განათების მიმართულებით, სასტუმროების აღჭურვა მზის პანელებით; მწვანე სივრცეების მოწყობა და ა. შ.
შემდეგი კომპონენტი გაცვლითი პროგრამებია: ორი ჯგუფი უკვე ესტუმრა პოლონეთს; ერთი _ სამთავრობო მიმართულებით და ისინი გაეცნენ ინოვაციურ მიდგომებს, თუ როგორ და რა მიმართულებით არის წარმატებული ენერგოეფექტურობა პოლონეთში. თუმცა, მხოლოდ ნახვა და გაცნობა არაა საკმარისი – ყველაფერი უნდა ვიღონოთ, რომ ევროპულ სტანდარტებს მივუახლოვდეთ ენერგიის დაზოგვის, ნარჩენების გადამუშავების თვალსაზრისით.
მეორე ჯგუფმაც, რომელიც დაკომპლექტებული იყო გამარჯვებული პროექტების წარმომადგენლებით, ძალიან მნიშვნელოვანი ტრენინგები გაიარეს იქაურ პარტნიორებთან, ნახეს კარგი გამოცდილება მასპინძელ ქვეყანაში და გაეცნენ, თუ როგორ მიდის დღეს მთელი მსოფლიო ენერგო ეფექტურობის გზით მომავალი თაობის და კლიმატის გაჯანსაღების სასარგებლოდ.
პროექტის მნიშვნელოვანი კომპონენტია გარე განათების სისტემების მოწყობა; მაგალითად, 1.3 კმ ახალი ქსელი მოეწყო ამაღლებაში, უდაბნოს ეკლესიის მიმართულებით. აქ დამონტაჟდა LED- განათებები თავისი ხაზებით, ახალი ბოძებით და ა. შ.
მნიშვნელოვანი კომპონენტად ვთვლი, რომ ამ პროექტის დასრულების შემდეგ, ჩოხატაურის მუნიციპალიტეტში დაინერგება რეინვესტირების მექანიზმი, რომელიც შემუშავდა ექსპერტებთან ერთად. ამ მექანიზმის ფორმები დაეფუძნება იმ სახსრებს, რა შეღავათსაც მიიღებს ჩოხატაურის მუნიციპალიტეტი ბაღების ენერგო ეფექტურად აღჭურვის, გარე დამზოგავი განათებების მოწყობის შედეგად.
საჭიროა მოხდეს ამ თანხების აკუმულირება კონკრეტულ ანგარიშზე და ახალი საბავშვო ბაღების აღჭურვა, განათებების მოწყობა LED- განათების ახალი სისტემებით და ესეც საკმაოდ მნიშვნელოვანია, რომ პროექტს ერთჯერადი სახე არ ჰქონდეს.
კიდევ ერთი კომპონენტის შესახებ მინდა ვისაუბრო: პროექტით განსაზღვრულია 50 ათასი ევროს ღირებულების ტექნიკით, ჩოხატაურის კინოს სახლში, ტექნოპარკის აღჭურვა. ამასთან დაკავშირებით, ჩვენ რამდენიმე დღის წინაც გვქონდა შეხვედრა ექსპერტთან, რომელიც მუშაობს პოლონეთში და სხვადასხვა ქვეყნებში ტექნოპარკების მიმართულებით. საინტერესო აღჭურვილობის შეძენა იგეგმება კინოს სახლის დასრულებული რეაბილიტაციის შემდეგ. ეს ლოკაცია ყველა თაობისთვის, მაგრამ განსაკუთრებით ახალგაზრდებისთვის იქნება მნიშვნელოვანი _ აქ უნდა იყოს კომპიუტერული ტექნიკა, უნდა შევიძინოთ საგანმანათლებლო უნარებით აღჭურვილი რობოტები. მათთან მუშაობით ჩვენი ახალგაზრდები შეისწავლიან სრულიად ახალ, თანამედროვე ტექნოლოგიებს; გაიგებენ, თუ როგორ შეიძლება წარმოებაში რობოტების გამოყენება. შემდეგ კი, ძალიან ბევრ სფეროში შეეძლებათ დანერგონ სიახლეები, გაიუმჯობესონ ფინანსური შემოსავლები და ცხოვრების დონე.
ეს პროექტი 3-წლიანია, მომავალ წელს სრულდება.
ვფიქრობ, იგი სასარგებლო და მნიშვნელოვანია მუნიციპალიტეტისთვის. განსაკუთრებით დასაფასებელია ჩვენს პარტნიორებთან ურთიერთობა _ პოლონეთის “სოლიდარობის ფონდი PL საქართველოში“, ” პროგრესის სახლთან“; მათ ჰქონდათ ევროკავშირის პროექტების მართვის გამოცდილება და მათი დახმარებით, ჩვენც მივიღეთ ეს გამოცდილება.
განსაკუთრებულად ხაზგასასმელია, რომ პროექტის გახორციელების პროცესში, არსებობს მაღალი კონტროლის მექანიზმი. ასევე, ჩვენ დასრულების ეტაპზე უნდა ჩავატაროთ აუდიტი _ ეს იქნება მოწვეული აუდიტი არა ჩვენი, არამედ _ ევროკავშირის მხრიდან. სამი თვის წინ ჩვენთან უკვე იყო ლონდონიდან მოწვეული აუდიტი, რომელმაც შეაფასა, თუ როგორ მიდის პროექტის ტექნიკური მხარე და საკმაოდ დადებითი შეფასება გააკეთა. ასევე, ჩატარდება მეორე აუდიტი, რომელიც შესრულებული სამუშაოს ხარისხს შეამოწმებს და იმედი მაქვს, რომ აქაც ნორმალურად ჩავაბარებთ გამოცდას…
ბოლოს, ვიტოვებ იმედს, რომ არ დაიხურება შესაძლებლობის ფანჯარა და მოგვეცემა შესაძლებლობა, გამოვიყენოთ პარტნიორების – ევროკავშირის, სხვა საერთაშორისო ფონდების ტექნოლოგიური და ფინანსური თანადგომა, რათა განვახორციელოთ მნიშვნელოვანი პროექტები, გავეცნოთ ევროპულ პროგრესს, უფრო სწრაფად განვვითარდეთ.
ეს ყველაფერი, დამატებითი რესურსების მოძიება, მოზიდვა, განსაკუთრებით მნიშვნელოვანია მწირი შემოსავლების მქონე ჩოხატაურის მუნიციპალიტეტისთვის.
არ შეიძლება აქვე არ ვთქვა: ამ ყველაფერს მხოლოდ მაშინ აქვს აზრი, თუ ყველა ადამიანი, განსაკუთრებით, ახალგაზრდობა, მომავალი თაობა აქ _ ჩოხატაურში, გურიაში, საქართველოში უსაფრთხოდ იცხოვრებს და სახელმწიფოს მხრიდან დაცულად იგრძნობს თავს; თუ მოქალაქეს, ახალგაზრდას თავისუფლად მიეცემა საშუალება განვითარებული მსოფლიოს ნაწილად იგრძნოს თავი, შეუერთდეს პროგრესს, ინოვაციურ პროცესებს და გამორჩეული ქართული ნიჭით, საქართველოს სასახელოდ იღვაწოს, _ გვითხრა ზაალ მამალაძემ.
