ჩოხატაურში პირველი საჯარო სკოლის დემონტაჟი დასრულდა

ჩოხატაურში ნიკო მარის სახელობის პირველი საჯარო სკოლის არქიტექტურული და მასთან დაკავშირებული მომსახურებების შესასყიდად მუნიციპალური განვითარების ფონდმა ტენდერი გამოაცხადა.

“2025 წლის 18 აგვისტოს საქართველოს განათლების, მეცნიერებისა და ახალგაზრდობის სამინისტროს # MES 4 250000997043 წერილისა და მისი დანართის (საქართველოს განათლების, მეცნიერებისა და ახალგაზრდობის სამინისტროს პრიორიტეტების შესაბამისად შერჩეული ასაშენებელი/სრულად სარეაბილიტაციო საჯარო სკოლების სია და მოკლე ინფორმაცია სკოლების შესახებ) საფუძველზე, სსიპ მუნიციპალურ განვითარების ფონდს დაევალა ჩოხატაურის მუნიციპალიტეტში, ზოგადსაგანმანათლებლო დაწესებულებ(ებ)ის–სკოლ(ებ)ის მშენებლობის პროგრამის ფარგლებში, ახალი სკოლის დიზაინ–პროექტის, დეტალური საინჟინრო–საპროექტო–სახარჯთაღრიცხვო დოკუმენტაციის მომზადების მომსახურების სახელმწიფო შესყიდვა.

2. ვინაიდან შესყიდვის ძირითად ობიექტს წარმოადგენს ახალი სკოლის მშენებლობისთვის საპროექტოსახარჯთაღრიცხვო დოკუმენტაციის შედგენის მომსახურება, მიზანშეწონილია, შესყიდვა განხორციელდეს კონკურსის საშუალებით.

დაადგინეს:

“კონკურსის მეშვეობით საპროექტო მომსახურების სახელმწიფო შესყიდვის წესისა და პირობების დამტკიცების შესახებ” სახელმწიფო შესყიდვების სააგენტოს თავმჯდომარის 2015 წლის 22 მაისის #7 ბრძანების მე-3 მუხლის პირველი პუნქტის თანახმად, ჩოხატაურის მუნიციპალიტეტში, ზოგადსაგანმანათლებლო დაწესებულებ(ებ)ის – სკოლ(ებ)ის მშენებლობის პროგრამის ფარგლებში, ახალი სკოლის დიზაინ – პროექტის, დეტალური საინჟინრო – საპროექტო – სახარჯთაღრიცხვო დოკუმენტაციის მომზადების მომსახურების სახელმწიფო შესყიდვის პროცედურები განხორციელდეს კონკურსის საშუალებით (CNT აბრევიატურა).

საკითხი II

მოისმინეს საკონკურსო კომისიის წევრების გამოსვლა:

სსიპ საქართველოს მუნიციპალური განვითარების ფონდის შეფასებისა და დაგეგმვის დეპარტამენტის მიერ მომზადდა ჩოხატაურის მუნიციპალიტეტში, ზოგადსაგანმანათლებლო დაწესებულებ(ებ)ის – სკოლ(ებ)ის მშენებლობის პროგრამის ფარგლებში, ახალი სკოლის დიზაინ–პროექტის, დეტალური საინჟინრო –საპროექტო – სახარჯთაღრიცხვო დოკუმენტაციის მომზადების მომსახურების სახელმწიფო შესყიდვისთვის

საჭირო ტექნიკური დავალება და დანართი დოკუმენტაცია (საკონკურსო დოკუმენტაციის დანართები: #1, #2, #3, #4, #5, #6, #7, #8). სახელმწიფო შესყიდვების სააგენტოს ვებ–გვერდზე ბაზრის კვლევის შესახებ

შესაბამისი განცხადების გამოქვეყნების მეთოდით ჩატარებული ბაზრის კვლევის შედეგად მიღებული ინფორმაციის თანახმად განისაზღვრა შესყიდვის სავარაუდო ღირებულება. ვინაიდან, ზემოთ აღნიშნულ ბაზრის კვლევაში მონაწილეობა მიიღო სამმა ორგანიზაციამ, შესყიდვის სავარაუდო ღირებულება განისაზღვრა ხსენებული სამი შემოთავაზების (7,000,000.00 ლარი, დღგ–ს გარეშე; 3,512,000.00 ლარი, დღგ–ს გარეშე; 2,009,000.00 ლარი, დღგ–ს გარეშე) პირველი სტადიის საშუალო არითმეტიკულს გამოკლებული 10%, გამრავლებული 30%-ზე, რაც არის მიბმის პროცენტული მაჩვენებელი და ამის ჯამი გამრავლებული 15-ზე (15 მიბმა).

დაადგინეს:

ჩოხატაურის მუნიციპალიტეტში, ზოგადსაგანმანათლებლო დაწესებულებ(ებ)ის – სკოლ(ებ)ის მშენებლობის პროგრამის ფარგლებში, ახალი სკოლის დიზაინ–პროექტის, დეტალური საინჟინრო–საპროექტო – სახარჯთაღრიცხვო დოკუმენტაციის მომზადების მომსახურების სახელმწიფო შესყიდვის სავარაუდო ღირებულება განისაზღვროს 3,174,600.00 ლარით, დღგ–ს გარეშე“, _ ვკითხულობთ მუნიციპალური განვითარების ფონდის გვერდზე გავრცელებულ ინფორმაციაში.

ინფორმაციისთვის, ნიკო მარის სახელობის პირველი საჯარო სკოლის რეაბილიტაციაზე საუბარი ჯერ კიდევ 2023 წელს დაიწყო. 2023-2024 სასწავლო წლის დაწყებამდე, ჩოხატაურის საგანმანათლებლო რესურსცენტრის ხელმძღვანელმა შორენა სიხარულიძემ გვითხრა, რომ  გორაბერეჟოულის, ბუკნარის, კოხნარის და დაბლაციხის საჯარო სკოლებთან ერთად, ნიკო მარის სახელობის სკოლის რეაბილიტაციაც იგეგმებოდა.

მოგვიანებით, 2024 წლის 16 სექტემბერს გამართულ მთავრობის სხდომაზე, პრემიერმა ირაკლი კობახიძემ განაცხადა:

“აქტიურად ვმუშაობთ სასკოლო ინფრასტრუქტურის შემდგომი გაუმჯობესების მიმართულებით. სექტემბერ–ოქტომბერში დასრულდება 60 საჯარო სკოლის სრული რეაბილიტაცია. წლის ბოლომდე დასრულდება 100-მდე სკოლის მშენებლობა–რეაბილიტაციის პროცესი. შედეგად 28 ათასზე მეტი მოსწავლე სწავლას განახლებულ, საერთაშორისო სტანდარტების შესაბამის სკოლებში განაგრძობს. ასევე შემოდგომაზე დაიწყება პროცედურები 15 საჯარო სკოლის მშენებლობის და 23 სკოლის სრული რეაბილიტაციისთვის და გათვალისწინებულია ყველა შესაბამისი სკოლის აღჭურვა თანამედროვე სტანდარტების შესაბამისად. ამ მიმართულებით მომავალშიც აქტიურად ვიზრუნებთ“.

სკოლების ჩამონათვალში, რომელთა მშენებლობა-პროექტირების შესახებაც გავრცელდა ინფორმაცია, იყო ნიკო მარის სახელობის დაბა ჩოხატაურის #1 საჯარო სკოლა.

ამ წლის იანვარში,  ჩოხატაურის პირველი საჯარო სკოლის სამოქალაქო განათლების მასწავლებელი თამუნა მეგრელიძე სოციალურ ქსელში წერდა:

“მე, ჩოხატაურის #1 საჯარო სკოლა, საუკუნეზე მეტი მყარად ვიდექი აქ, ამ უნიკალურ ეზოში. ვიდექი ამაყად, როგორც ცოდნისა და განათლების სიმბოლო, მომავალი თაობის განვითარების იმედი და შესაძლებლობა…

სათუთად ვინახავდი რაიონის თაობათა ისტორიას, მათ გამარჯვებებსა და ახდენილ ოცნებებს.

მე და თითოეული პედაგოგი, რომლებიც ჩემიანად მივიღე, წლების მანძილზე ვიბრძოდით, რათა თაობებისთვის მიგვეცა გონებრივი და სულიერი განვითარებისთვის აუცილებელი ცოდნა და ღირებულებები…

მე ვხედავ, რომ ჩვენს თავდაუზოგავ შრომას უდიდესი შედეგი ჰქონდა, ძალიან ვამაყობ ჩემს წიაღში აღზრდილი ადამიანებით. 140 წლის შემდეგ დანამდვილებით შემიძლია ვთქვა, მე, როგორც უდიდესი ისტორიის მქონე ცოდნის ტაძარი, რაიონის კულტურულ მემკვიდრეობას წარმოვადგენ!

ახლა კი… ნახევრად დამანგრიეს, მიმატოვეს, ჩემი მნიშვნელობა უგულებელყვეს და განუზომლად შეურაცხყვეს. თითქოს ჩემი არსებობა და მემკვიდრეობა არაფერს ნიშნავდეს. ჩემი ძველი კედლები ცარიელი და შემაძრწუნებლად მდუმარეა. ტკივილამდე მტანჯავს ეს სირცხვილი… ნუთუ აღარავის ახსოვს, რომ მე მხოლოდ შენობა არ ვარ…

ვოცნებობ, ისევ მესმოდეს ბავშვების ჟრიამული და არა ყინულივით ცივი ქარისა და წვიმის შეუბრალებელი ხმა, რომლებიც დაუნდობლად მექცევიან. ჩემთვის ძვირფასი ყოფილი თუ ამჟამინდელი მასწავლებლები და მოსწავლეები, თვალცრემლიანები ჩამივლიან ხოლმე… მინდა იცოდეთ, თქვენ გვერდით ვდგავარ! ჩემი კედლები შეიძლება დანგრეულია, მაგრამ ჩემი უდრეკი სული ისევ აქ არის! მე არ ვარ მარტო – ჩემში ცოცხლობს თქვენი ისტორია, თქვენი თავდადება, თქვენი ოცნებები! მაგრამ გთხოვთ, არ დაუშვათ და ეს ისტორია ქარს არ გაატანოთ… სწორედ თქვენ ხართ ის ძალა, რომელიც შეძლებს ჩემი ღირსებისა და ავტორიტეტის აღდგენას!

გახსოვდეთ, რომ მე ვდგავარ ამ ულამაზეს ეზოში ნახევრად დანგრეული, მაგრამ ისევ ამაყი! ახლა თქვენზეა დამოკიდებული, გახდებით თუ არა ის ძალა, რომელიც ჩემს სიჩუმეს ხმაურით შეცვლის და ჩემს ტკივილს – ახალი სიცოცხლით! მოგმართავთ ყველას, ვისაც ეს გეხებათ, აღმადგინეთ, დამაბრუნეთ იმ დიდებულ მდგომარეობაში, რისთვისაც შემქმნეს! გთხოვთ, უბრალოდ მოინდომეთ მთელი არსებით…

სიყვარულით, სსიპ ნიკო მარის სახელობის დაბა ჩოხატაურის #1 საჯარო სკოლა, თქვენი სახლი“.

ინფორმაციისთვის, ამ დროისთვის პირველი საჯარო სკოლის დემონტაჟის სამუშაოები დასრულებულია.

მუნიციპალური განვითარების  ფონდმა ტენდერი 12 სექტემბერს გამოაცხადა. განაცხადების მიღება 8 ოქტომბერს იწყება, ხოლო 13 ოქტომბერს უნდა დასრულდეს.

პირველი საჯარო სკოლის მოსწავლეები სწავლას გამოყოფილ ალტერნატიულ ფართში აგრძელებენ.