ლანჩხუთის მერიის ფეისბუქის ოფიციალურ გვერდზე ერთი თვალის გადავლებაც კი საკმარისია იმის გასაგებად, რომ სხვადასხვა ინფრასტრუქტურული პრობლემების მოსაგვარებლად მუნიციპალიტეტის მასშტაბით საკმაოდ სოლიდური თანხა იხარჯება. თუმცა, იმავე გვერდზე მოსახლეობის მხრიდან გაკეთებული კომენტარებიდან, ასევე, ცხადი ხდება, რომ პრობლემები ამ მხრივ მაინც ბევრია, რაც რიგითი ადამიანების გულისწყრომას იწვევს.
სოფელ წყალწმინდის მკვიდრი, ალიანა ბასკაკოვა მერიის გვერდზე იმ პრობლემის შესახებ წერს, რომელიც წლებია, გადაულახავ ზღუდედ იქცა, საუბარია შიდა სასოფლო გზაზე, რომლის მდგომარეობაც, მართლაც რომ საგანგაშოა.
„წყალწმინდა 15 წელია, თქვენი ეტაპების რეჟიმშია. გამოიცვალა ამდენი მთავრობა და ჩვენ საშველი მაინც არ დაგვადგა.
დიდის ამბით გაზომეთ გზა, არხები უნდა ამოგეღოთ, გზაზე ხრეში უნდა დაგეყარათ. ესეც რა ძნელი გასაკეთებელია?!
კარგად იციან, რომ ჩვენი გზები პრობლემურია.
იმდენი დაპირება გვაქვს მოსმენილი, რომელი დაპირების შესრულებას დაველოდოთ?!
მადლობა, რომ ასე მოგვაქციეთ ყურადღება. ჩვენ ნავებს შევიძენთ წვიმის დროს“, _ წერს ბასკაკოვა და იქვე ფოტოსაც აქვეყნებს, სადაც წვიმის შედეგად დატბორილი ქუჩა ნათლად ჩანს.
ალიანა ბასკაკოვასა თუ სხვების მხრიდან გამოთქმული წყრომის პასუხად ლანჩხუთს მერია იქვე განმარტავს, რომ მუნიციპალიტეტი, შესაძლებლობის ფარგლებში, მაქსიმალურად ცდილობს, ყველა ადმინისტრაციულ ერთეულში მსგავსი პრობლემების მოგვარებას.
„გასაგებია ყველას გულისტკივილი და საწუხარი, მაგრამ ისიც უნდა იცოდეთ და ხედავდეთ, რომ შესაძლებლობის ფარგლებში, მაქსიმალურად ვცდილობთ აღნიშნული პრობლემის მოგვარებას ყველა ადმინისტრაციულ ერთეულში. ამას რომ საკუთარი შემოსავლები ვერ გაწვდება, ესეც ცხადია. ეტაპობრივად ირიცხება თანხა ინფრასტრუქტურის პროექტებისთვის და ეტაპობრივად კეთდება სამუშაოები. ქალაქში ბევრ ქუჩაზეა ასფალტი, ბევრი ისევ მძიმე მდგომარეობაშია, მაგრამ არცერთი ქუჩა არ დარჩება ასფალტის გარეშე, სოფლებსაც მივხედავთ. ზოგან იგება შავი საფარი, ზოგან იგება რკინა-ბეტონის გზა. ვიღაცამ დღევანდელი ხელისუფლება დაადანაშაულა გზების ასეთი მდგომარეობის გამო. გადახედეთ გასულ წლებს, სად, რომელ სოფელსა თუ ადმინისტრაციულ ერთეულში მიმდინარეობდა ამდენი სამუშაო გზებზე, რაც ამ ხელისუფლების პირობებში მიმდინარეობს. სად და როდის დაიგო ქალაქში წინა ხელისუფლების დროს ასფალტი?! ვერ დაასახელებთ ვერცერთ ასეთ ფაქტს. ეს ხელისუფლება კი მოსვლის დღიდან აგვარებს ამ პრობლემას და ასე გააგრძელებს კიდეც“.
