უზენაესი სასამართლოს თავმჯდომარის არჩევის პროცესი, შესაძლოა, მმართველ გუნდსა და პრეზიდენტს შორის კიდევ ერთი დაპირისპირების მიზეზი გახდეს.
ჯერჯერობით, უცნობია, მმართველი პარტია მხარს დაუჭერს პრეზიდენტის მიერ შერჩეულ კანდიდატს, თუ დროის გაწელვის მიზნით, დაელოდება ახალი კონსტიტუციის ამოქმედებას, რომლის მიხედვით, უზენაესი სასამართლოს თავმჯდომარის შერჩევის უფლებამოსილება იუსტიციის უმაღლესი საბჭოს კომპეტენციაში გადადის.
,,გურია ნიუსმა“ ახალგაზრდა იურისტთა ასოციაციის თავმჯდომარეს, სულხან სალაძეს ჰკითხა, რამდენად მნიშვნელოვანია, უზენაესი სასამართლოს თავმჯდომარეობის კანდიდატის შერჩევის პროცესი დღეს მოქმედი კონსტიტუციის მიხედვით მოხდეს?
_ იუსტიციის საბჭოში არსებობს გავლენიანი ჯგუფი, რომელიც, პრაქტიკულად, მართავს სასამართლო სისტემას, რომლის დღის წესრიგი განსაზღვრულია არა სასამართლო სისტემის წინაშე არსებული გამოწვევებით, არამედ პირადი შეხედულებებით, ამიტომაც ამ უფლებამოსილების გადასვლა იუსტიციის საბჭოს ხელში უფრო დააზიანებს პროცესს და ნაკლებ შანსს დატოვებს იმისას, რომ ისეთი კანდიდატი იყოს შერჩეული, რომლის მიმართაც ფართო კონსენსუსი იქნება საზოგადოებაში.
შეიძლება ითქვას, რომ ეს არის ბოლო შანსი, რომ სასამართლო სისტემაში ვიხილოთ ისეთი კანდიდატი, რომელიც იქნება პრინციპული და დამოუკიდებელი“, _ გვითხრა სალაძემ.
_ დაელოდება თუ არა მმართველი პარტია ახალი ახალი კონსტიტუციის ამოქმედებას და გახდება თუ არა უზენაესი სასამართლოს თავმჯდომარის შერჩევის პროცესი კიდევ ერთი დაპირისპირების საგანი მმართველ პარტიასა და პრეზიდენტს შორის? _ ამ კითხვით ,,გურია ნიუსმა“ მმართველი პარტიის წარმომადგენელს, ზაზა პაპუაშვილს მიმართა:
_ თუ არჩევნებამდე დასახლდა კანდიდატურა და შეთანხმება მოხდება, რასაკვირველია, აირჩევს პარლამენტი. ყოველი ახალი კანდიდატურის შერჩევა ნებისმიერ თანამდებობაზე უფრო და უფრო ართულებს მოთხოვნებს, ეს სირთულე შეიძლება ახლდეს თან ამ პროცესს. თუ ისეთ კანდიდატურაზე შევჯერდებით, რომელიც მისაღები იქნება თავისი კომპეტენციით, განათლებითა და განვლილი ცხოვრებით, ვინ დაუდგება წინ?!
პრინციპი, რომელიც ჩვენ დავნერგეთ სასამართლო სისტემაში, არის ძალიან ზნეობრივი და მორალურად გამართული. სასამართლოს მივეცით თავისუფლება, რათა კიდევ ერთხელ გაეანალიზებინა რამდენად მნიშვნელოვანია სასამართლო სისტემა ქვეყნისთვის.
ვიღაცამ ეს შეძლო, ვიღაცამ ვერ შეძლო. ვერ უარვყოფთ, რომ მოსახლეობას აქვს კითხვები სასამართლოსთან დაკავშირებით, ჩვენც გვაქვს კითხვები, რომელთაც პასუხები უნდა გაეცეს და ხარვეზები აღმოიფხვრას. სხვათაშორის, გუნდშიც არის კითხვები მათ მიმართ და არანაირი სურვილი არ გვაქვს, ჩვენი მონაპოვარი ვიღაცა ადამიანმა ნაგვის ყუთში გადაყაროს“, _ გვითხრა პაპუაშვილმა.
ჩააგდებს თუ არა მმართველი პარტია პრეზიდენტის მიერ შერჩეულ კანდიდატურას, ჯერჯერობით, უცნობია.
ამ ეტაპზე ცნობილია, რომ ,,ქართული ოცნების“ ზოგიერთმა დეპუტატმა, პრეზიდენტის მიერ დაანონსებულ კონსულტაციებს, რომლის მიხედვითაც კანდიდატი საზოგადოების მაღალი ჩართულობით უნდა შეირჩეს, უნდობლობა გამოუცხადა.
რამდენიმე დღის წინ, უზენაესი სასამართლოსა და იუსტიციის უმაღლესი საბჭოს თავმჯდომარე ნინო გვენეტაძემ თანამდებობა დატოვა, მიზეზად კი ჯანმრთელობის მდგომარეობა დაასახელა, რის შემდეგაც აღნიშნული თანამდებობა ვაკანტური გახდა.
გადადგომის შემდეგ, საზოგადოებაში არსებული შეკითხვების მიუხედავად, გვენეტაძე მედიასთან არ გამოჩენილა.
