გუშინ საქართველოს ეროვნული გუნდისა და ბელგიური „სერენის“ თავდამსხმელი, გიორგი მიქაუტაძე თავის ამჟამინდელ კლუბს ოფიციალურად დაემშვიდობა.
21 წლის ფეხბურთელმა სოციალურ ქსელში გამოსამშვიდობებელი წერილი გაავრცელა:
„სეზონი დასრულდა, კლუბი კი უმაღლეს დივიზიონში დარჩა. ყველას მადლობას ვუხდი შეტყობინებებისთვის. ასევე, მადლობა შთამბეჭდავი ბოლო ორი სეზონისთვის.“
საინტერესოა, რა მოხდება მომავალში. მიქაუტაძის იჯარის ვადა ამოიწურა და ის, წესით, „მეცში“ უნდა დაბრუნდეს. თუმცა ეს კლუბი 25 ქულით ბოლო ადგილზეა და დიდი ალბათობით, გავარდება ფრანგული „ლიგა 1“-დან. შესაძლოა, „ლიგა 2“-ში თამაშს, ისევ ბელგიური „ჟუპილერ ლიგა“ და „სერენში“ ზედიზედ მესამე იჯარა სჯობდეს.
გუშინ საქართველოს ნაკრებისა და „ინდიანა პეისერსის“ შემტევმა გოგა ბითაძემ გამოცემას „Indystar“ ინტერვიუ მისცა და სხვა თემებთან ერთად ზაზა ფაჩულიაზეც ისაუბრა.
„ზაზა ფაჩულიას დამსახურებით გაიგო მთელმა მსოფლიომ რომ საქართველოს არაერთი კარგი კალათბურთელი ჰყავს. ბავშვობაში ზაზას თამაშებისთვის რომ არ მიმედევნებინა თვალი, ალბათ ვერც ვიფიქრებდი, რომ აქ მოხვედრა შემეძლო. მან აქ უმაღლეს დონეზე თამაში შეძლო და „გოლდენ სტეიტთან“ ერთად ორჯერ მოიგო ჩემპიონის ბეჭედი. ზაზამ ეს გააკეთა, ის საუკეთესო კალათბურთელია საქართველოს ისტორიაში. როდესაც „გოლდენ სტეიტთან“ გასვლით მატჩი გვაქვს, თამაშის შემდეგ ყოველთვის ერთად გავდივართ და სადმე საჭმელს ვჭამთ. ის დიდი ძმაა. ზოგადად, NBA-ში ბევრი ქართველი არ ვართ, ამიტომ ყველა ვიცნობთ ერთმანეთს, დიდი ოჯახივით ვართ“.
გუშინ ცნობილი გახდა რომ ევროპის ფეხბურთის მმართველმა ორგანომ რუსული ნაკრებები და კლუბები ტურნირებიდან მოკვეთა. უეფა-ში ამბობენ, რომ აქტიურ რეჟიმში გააგრძელებენ უკრაინაში მიმდინარე მოვლენებზე დაკვირვებას და მდგომარეობის განვითარების შესაბამისად გადაწყვეტილების შეცვლაზე, ან სანქციების კიდევ უფრო მეტად გამკაცრებაზე იმსჯელებენ.
ამ გადაწყვეტილებამ რუსეთში განსაკუთრებული ვნებათაღელვა გამოიწვია. სასჯელს საბჭოთა კავშირის საფეხბურთო ნაკრების ყოფილი მეკარე, ანზორ კავაზაშვილი განსაკუთრებული ემოციით გამოეხმაურა:
„ჩემი სახელით უეფას ყველა წევრს, რომლებმაც რუსეთის ევროტურნირებიდან და სხვა ჩემპიონატებიდან მოკვეთას მხარი დაუჭირეს, გადაეცით, რომ ნაძირალები და გამყიდველები არიან. მათ დაავიწყდათ სპორტი რა არის. სპორტი სამართლიანი შეჯიბრებაა, მაგრამ უეფაში ამის შესახებ არაფერი იციან. მათ დიადი რუსეთი გარიცხეს!
დაე, იმ ხალხის შთამომავლებმა, რომლებმაც ჩვენ წინააღმდეგ ხმა მისცეს, ისინი ამ ქმედების გამო დაწყევლონ. ჩვენ უეფას გარეშე არ გავქრებით. ჩვენი ხელისუფლება რამეს აუცილებლად მოიფიქრებს. მაგალითად, ჩვენს მეგობარ ქვეყნებთან ერთად, ოლიმპიურ თამაშებს, ჩვენს მსოფლიო ჩემპიონატს, აზიურ ჩემპიონთა ლიგასა და მსგავს ტურნირებს შევქმნით.
ისინი ცდებიან, თუ ჰგონიათ, რომ ევროტურნირებზე მოასპარეზე დიდი კლუბების გარეშე გავქრებით. ტაიმ-აუტს ავიღებთ, რომელიც შესაძლოა, 5-წლიანიც კი იყოს და მივაღწევთ იმას, რომ უეფაში დაბრუნებას შეგვეხვეწებიან. უეფას რეორგანიზაცია ელოდება. უეფა სამართლიანი ორგანიზაცია უნდა იყოს და არა დასავლელი პოლიტიკოსების ნაძირალა ხელქვეითი“.
ანზორ კავაზაშვილის მსგავსად ოფიციალური საპროტესტო განცხადებები რუსულ ფეხბურთში მოღვაწე სხვა ცნობილმა პიროვნებებმაც გააკეთეს.
ვიაჩესლავ კოლოსკოვი (რუსეთის საფეხბურთო კავშირის საპატიო პრეზიდენტი): „ეს ყველაფერი ძალზე სამწუხაროა. ჩეფერენის სიტყვები, ფეხბურთს ომთან კავშირი არ აქვსო, ჩვენთვის ცოტა იმედიანი იყო, მაგრამ სიტყვები სიტყვებად დარჩა. ახლა მხოლოდ ერთი ვარიანტი გვრჩება, აზიის კონფედერაციაში გადასვლა, მაგრამ ეს ვარიანტი ჩემი აზრით, მოკლავს რუსულ ფეხბურთს“.
ანდრეი სოზინი (რუსეთის საფეხბურთო კავშირი): „ველოდით ამ გადაწყვეტილებას. დადებითი ისაა, რომ აქ საუბარი მხოლოდ სეზონზეა, პლუს უეფას წევრებად ვრჩებით. ცუდი იქნებოდა, რუსეთის საფეხბურთო კავშირი 5 წლით რომ მოეკვეთათ. ასე აზიაში გადასვლის გარდა სხვა შანსი არ დაგვრჩებოდა. უნდა გავუძლოთ. არ არის კარგი ამბავი, მაგრამ ეს არც სასიკვდილო დარტყმაა“.
ალეკსანდრ მოსტოვოი: „ჩემთვის მოულოდნელობა არაა. იმედი არაფრის მქონდა. როცა ყველაფრიდან გაგდებენ, სხვა სახის მოლოდინი უცნაური იქნებოდა. კარგია, რომ მხოლოდ ერთ სეზონზეა საუბარი. ახლა უნდა გავიაზროთ ყველაფერი“.
ავტორი
