“გაცნობებთ, რომ საგანგებო სიტუაციების მართვის სამსახურის სახანძრო–სამაშველო ძალების დეპარტამენტის გურიის საგანგებო სიტუაციების მართვის მთავარი სამმართველოს ლანჩხუთის სახანძრო–სამაშველო განყოფილება უზრუნველყოფილია ყველა საჭირო სახანძრო–სამაშველო აღჭურვილობით“, _ გვპასუხობენ საქართველოს შინაგან საქმეთა სამინისტროს საგანგებო სიტუაციების მართვის სამსახურში ჩვენ მიერ, ლანჩხუთის სახანძრო–სამაშველო შენობის და აღჭურვილობის განახლებასთან დაკავშირებით, გამოთხოვილი ინფორმაციის პასუხად.
საქმე ისაა, ლანჩხუთის სამაშველო სამსახურს ტექნიკისა და აღჭურვილობის პრობლემა რომ აქვს, ამაზე მეტ-ნაკლები აქტუალობით წლებია საუბრობს ოპოზიცია თუ რიგითი ადამიანები. თემის კიდევ ერთხელ წინ წამოწევა დაახლოებით ერთი თვის წინ, შინაგან საქმეთა სამინისტროს საგანგებო სიტუაციების მართვის სამსახურის მიერ, ლანჩხუთის მუნიციპალიტეტში, სამოქალაქო უსაფრთხოების მიმართულებით სწავლების ჩატარებას მოჰყვა.
სწავლების ფარგლებში, ადგილობრივი თვითმმართველობის წევრებისთვის და მოსახლეობისთვის, სახანძრო-სამაშველო სპეციალური ტექნიკისა და აღჭურვილობის გამოფენა მოეწყო.
ჰოდა, სწორედ ამ ფაქტს გამოეხმაურა საკრებულოს წევრი ერთიანი “ნაციონალური მოძრაობიდან”, ირმა მგელაძე და კიდევ ერთხელ გააჟღერა, რომ ლანჩხუთის სამაშველო სამსახურს ტექნიკისა და აღჭურვილობის პრობლემა აქვს, რაც საჭიროა გადაუდებელი და უბედური შემთხვევების დროს ქმედითუნარიანობისთვის:
“როცა ჩამოდიხარ ამ დაქცეულ მუნიციპალიტეტში და სახანძრო–სამაშველო სამსახურიდან 50 მეტრში ატარებ რაღაცა სწავლებას, ბოლო–ბოლო უნდა შეგრცხვეს იმ სამსახურის, რომლისთვისაც არც ერთი ერთეული ტექნიკა არ შეგიძენია.
ერთი სახანძრო მანქანა პოლონელებმა გვაჩუქეს და 26 000 ლარი დაჯდა მისი გარემონტება, სხვა ყველაფერი მოძველებული და ნახევრად გამოუსადეგარია. კიდევ ერთი პიკაპი ჰყავთ, რომელიც ჩვენს დროს შევუძინეთ…
არადა, ოზურგეთსაც აქვს უკვე ახალი სახანძრო–სამაშველო ცენტრი და ჩოხატაურსაც. ჩვენ, ზუსტად ტრასისპირა მუნიციპალიტეტს კი წლებია მესმის ვაკეთებთო, მაგრამ…”
“ესენი რომ დავინახე გამიხარდა, მეგონა ჩვენი იყო, თურმე…
ტყუილად გადაყრილი ათასობით ლარი, არაფრის მომცემ ვითომ სწავლებებში და ტრეინინგებში. მაშველი რომელიც იქეთაა საშველი. დიდი პატივისცემა ჩვენგან სამაშველო სამსახურს, მაგრამ რა ქნან ტექნიკის და დამხმარე აღჭურვილობის გარეშე? სამაგიეროდ Black Sea Arena-ს ჰყავს კარგად გამართული სამაშველო რაზმი, თავისი ტრანსპორტით და ტექნიკით, რომელიც ივანიშვილის საცხოვრებელ ვილაში და სასტუმრო პარაგრაფში ხეებს და მცენარეებს რწყავს“, _ მერიის წინ გამართულ სამოქალაქო უსაფრთხოების სწავლების ფაქტს მაშინ რიგითი ლანჩხუთელებიც გამოეხმაურნენ.
საგულისხმოა, რომ სამაშველო სამსახურის თემა ირმა მგელაძემ საკრებულოს სხდომებზეც არაერთხელ გააჟღერა და პასუხიც ითხოვა მუნიციპალიტეტის ხელმძღვანელობისგან, თუ რა კეთდება პრობლემის მოსაგვარებლად.
“რამდენი წელია რაც “ოცნება” ხელისუფლებაშია და ერთი ცალი ტექნიკაც კი არავის შეუძენია. ეს ერთი თემა მაინც მოვაგვაროთ ლანჩხუთელებისთვის ამ მოწვევის საკრებულომ, ოპოზიციაც დაგიდგებით ყველანაირად გვერდში, მარტო ხელფასების აღება და პროცედურული დემოკრატია არ კმარა. ბატონო ალექსანდრე, შეხვედრიხართ შსს მინისტრს, გისაუბრიათ ამ თემაზე?” _ ამ კითხვით ოპოზიციონერმა დეპუტატმა მუნიციპალიტეტის მერს ალექსანდრე სარიშვილს 2022 წლის თებერვალში, საკრებულოს სხდომაზე მიმართა.
მაშინ მერის პასუხი იყო, რომ “არის საუბარი ახალი სახანძრო-სამაშველო სამსახური გაკეთდეს იქ, სადაც წლების წინ იყო, ტექნიკის განახლებაზეც არის საუბარი”.
ჰოდა, ამ ყველაფრიდან გამომდინარე, “გურია ნიუსმა” მიმდინარე წლის პირველ აპრილს წერილობით მიმართა შინაგან საქმეთა სამინისტროს საგანგებო სიტუაციების მართვის სამსახურს და გამოითხოვა ინფორმაცია ლანჩხუთის სახანძრო-სამაშველო შენობის და აღჭურვილობის განახლებასთან დაკავშირებით, სადაც გვპასუხობენ, რომ მიმდინარე წელს დაგეგმილია ლანჩხუთის სახანძრო-სამაშველო განყოფილებისთვის დამატებითი ტექნიკისა და სატრანსპორტო საშუალების გადაცემა.
უწყების მიერ მოწოდებული ინფორმაციით, გრიგოლეთის სანაპირო ზოლზე უკვე მოეწყო 2 სენდვიჩ-პანელის ტიპის სამეთვალყურეო სტაციონარული კოშკურა, ასევე იგეგმება ლანჩხუთის სახანძრო-სამაშველო განყოფილების ახალი შენობის მშენებლობა.
“საგანგებო სიტუაციების მართვის სამსახური მუდმივად ზრუნავს მასზე დაკისრებული ფუნქციების განსახორციელებლად საჭირო როგორც ტექნოლოგიური კუთხით განვითარებაზე, ასევე სპეციალური ტექნიკისა და აღჭურვილობის განახლება–შეძენაზე, რაც ეტაპობრივად ხორციელდება. პროფესიული კვალიფიკაციის ამაღლების მიზნით მუდმივად მიმდინარეობს მეხანძრე–მაშველთა სპეციალური, პროფესიული საგანმანათლებლო პროგრამით გადამზადება. მოსამსახურეთა პროფესიული განვითარების მიზნით, საგანგებო სიტუაციების მართვის სამსახური თანამშრომლობს სხვა ქვეყნებთან და საერთაშორისო ორგანიზაციებთან. საერთაშორისო ეგიდით სხვადასხვა ქვეყნებში გამართული სასწავლო კურსების მეშვეობით საგანგებო სიტუაციების მართვის სამსახურის მოსამსახურეები გადამზადდნენ არაერთი მნიშვნელოვანი მიმართულებით“, _ გვპასუხობენ უწყებაში.
ავტორი
