რამდენიმე დღის წინ, როგორც “გურია ნიუსი” წერდა, დაგვიანებული ხელფასების გამო, გაიფიცნენ ოზურგეთელი მეეზოვეები. დასუფთავების სამსახურის წარმომადგენელთა უმთავრესი მოთხოვნა ხელფასის დროულად ჩარიცხვა და ასევე, ახალი სამუშაო ტანსაცმლის და ინვენტარის მიწოდება იყო.
გაფიცვის მეორე დღეს მოსული წვიმის შედეგად, ოზურგეთის ცენტრში, საიდანაც ნაგავი არ იყო გატანილი, ნაგავი არხებში გაიჭედა და ჭადრების ბაღი _ ქალაქის ყველაზე თვალსაჩინო ადგილი, წყალში მოტივტივე ნაგვით აივსო. ადამიანები მხოლოდ შემოვლით ახერხებდნენ მეორე მხარეს გადასვლას, თუმცა, ცენტრალურ სამანქანო გზაზეც მდინარესავით მოედინებოდა არხებიდან გადმოსული წყალი.
დასუფთავების სამსახურის ერთ-ერთმა პასუხისმგებელმა პირმა, დავით ქურიძემ არ იცოდა, გატანილი იყო თუ არა ნაგავი:
“არა მგონია, ნაგავი არ იყოს გატანილი, ცხაურები იჭედება, მალე გავალ სანახავად და პასუხს მერე გეტყვით”, _ გვითხრა ქურიძემ.
მალე ქალაქის ცენტრში მეეზოვეები გამოჩნდნენ, რომლებმაც წყალში მოტივტივე ნაგვის მოგროვება დაიწყეს.
“გურია ნიუსი” მეეზოვეებს გაესაუბრა.
“ყველას ბანკის ვალი გვაქვს, ხელფასი ჯერ კიდევ არ მიგვიღია, ყოველ გადაშორებულ დღეზე რომ 20 ლარს დაგაწერს ბანკი ჯარიმას, ჩვენნაირი ხელფასის და გაჭირვების მქონე ხალხისთვის, რანაირი გადასახდელია? ნაგვის აღება არ უნდა დაგვიანდეს და ხელფასის დაგვიანება შეიძლება? პურის ფული არ გვაქვს, ტყუილად ხომ არ ვწუწუნებთ?” _ გვითხრეს მათ.
ხელფასი არ მიუღიათ, ასევე, სკოლამდელი დაწესებულებების თანამშრომლებს. “გურია ნიუსის” წყაროს ინფორმაციით, საბავშვო ბაღებში სხვა პრობლემებზეც _ კერძოდ, სოფლების ბაღების ხელმძღვანელების (სილაური, ჭანიეთი და სოფელ შრომის ორი საბავშვო ბაღი) თანამდებობიდან გათავისუფლებაზე საუბრობენ და ამის შეფარული მიზეზი არჩევნებზე “ქართული ოცნების” კანდიდატისთვის ხმის მიცემაა. როგორც წყარო ამბობს, ბაღების ხელმძღვანელები ამიტომ დაიბარეს და თანამდებობიდან გათავისუფლების თაობაზე განცხადების დაწერა მოთხოვეს. წყაროსვე თქმით, დებულების თანახმად, 65 წლის მენეჯერიც არ უნდა მუშაობდეს, თუმცა, ქალაქის მეოთხე საბავშვო ბაღში ამ ასაკის მენეჯერი მუშაობს და მისთვის არავის უთქვამს, რომ დებულების თანახმად უნდა გაათავისუფლონ, რადგან ეტყობა, მას პოლიტიკურ თანამოაზრედ თვლიან.
“გურია ნიუსის” კითხვაზე, შეესაბამება თუ არა აღნიშნული ინფორმაცია სიმართლეს, ჭანიეთის საბავშვო ბაღის ხელმძღვანელი გვპასუხობს, რომ მისთვის არავის უთქვამს, თუ საარჩევნო მხარდაჭერის გამო ათავისუფლებენ:
_ გვითხრეს, რომ ახალი დებულების თანახმად, ხელმძღვანელს უნდა გააჩნდეს უმაღლესი ან საშუალო სპეციალური განათლება. საბავშვო ბაღში აღმზრდელად მუშაობის 40 წლის სტაჟი მაქვს და დღემდე პრობლემა არ ყოფილა. ამ შუა სასწავლო წელს გათავისუფლება რომ არ დაგეგმილიყო, კარგი იყო, _ გვითხრა მან.
“გურია ნიუსი” დაუკავშირდა ოზურგეთის მუნიციპალიტეტის მერიას.
კითხვაზე _ როდის მიიღებენ დასუფთავების სამსახურის და სკოლამდელი აღზრდის დაწესებულებების თანამშრომლები კუთვნილ ანაზღაურებას, მერიის საფინანსო სამსახურის უფროსი გია მამაკაიშვილი ამბობს, რომ თანხების ჩარიცხვის შეფერხება გამოწვეული იყო აღნიშნულ ორგანიზაციებში მიმდინარე რეორგანიზაციის პროცესით:
_ აღნიშნული ორგანიზაციები უშუალოდ არის მიბმული ფინანსთა სამინისტროს სახაზინო სამსახურის ელექტრონულ მომსახურებაზე. შეფერხებები თანხების ჩარიცხვასთან დაკავშირებით გამოწვეული იყო ზემოთ აღნიშნულ ა(ა)იპ ორგანიზაციებში რეორგანიზაციის პროცესის მიმდინარეობით და ახალი ხელმძღვანელების სახაზინო ელექტრონულ პროგრამასთან დაშვების უზრუნველყოფით. ასევე, სახაზინო პროგრამაში შექმნილი შეფერხებით. ორივე პრობლემა უახლოეს ორ-სამ დღეში გადაიჭრება და თანამშრომლები კუთვნილი ხელფასის მიღებას შეძლებენ. მიუხედავად იმისა, ეს ჩვენი ბრალეულობით არ მომხდარა, რეორგანიზაციის პროცესია _ შეიქმნა ახალი გაერთიანება, მე მაინც ბოდიშს ვუხდი ყველას და გპირდებით, რომ ყველაფერი მოწესრიგდა და მეტი შეფერხება არ იქნება, _ გვითხრა მამაკაიშვილმა.
რაც შეეხება საბავშვო ბაღების ხელმძღვანელი პირების ცენზის გამო გათავისუფლებასთან დაკავშირებულ საკითხს, მერიას ამ საკითხზეც მივმართეთ:
_ რატომ ათავისუფლებენ სასწავლო წლის შუა პერიოდში ხელმძღვანელებს და თუ დებულება ამას ითვალისწინებს, მაშინ რატომ მუშაობს ქალაქის მეოთხე ბაღის მენეჯერად 65 წლის პირი, რადგან დებულების თანახმად, არც ეს შეიძლება?
_ საბავშვო ბაღებში ყველა დანიშვნა მოხდება დებულების შესაბამისად. გავითვალისწინებთ ბაღების ავტორიზაციის პროცესს, რომელიც, სავარაუდოდ, რამდენიმე თვეში დაიწყება, სადაც აუცილებელი პირობა იქნება ახალი საკვალიფიკაციო მოთხოვნების გათვალისწინება”, _ მოგვაწოდეს მერიიდან ა(ა)იპ “ოზურგეთის მუნიციპალიტეტის სკოლამდელი აღზრდის ცენტრის დირექტორის მაკა ჭყონიას კომენტარი.
