ოფიციალური დოკუმენტების მიხედვით, ქალაქ ოზურგეთში, ჭავჭავაძის ქუჩა #8 და #10-ში მდებარე ეზოს საფარის მოწყობა 29 497 ლარი დაჯდა, ნიკო ნიკოლაძის ქუჩის სანიაღვრე არხის გაკეთება და ეზოს კეთილმოწყობა _ 65 374 ლარი და იაკობ შემოქმედელის ქუჩაზე მინისტადიონის და სკვერის კი _ 22 416 ლარი. ჯამში, პროექტის ღირებულება 117 287 ლარი იყო.
აღნიშნულ პროექტის გასახორციელებლად ხელშეკრულება 2016 წლის 15 სექტემბერს გაფორმდა, ერთი მხრივ, ქალაქ ოზურგეთის მუნიციპალიტეტის მერის ბეგლარ სიორიძესა და მეორე მხრივ, შპს “ჯეო ბილდერს შორის “, რომლის უფლებამოსილი წარმომადგენელი ედუარდ ღლონტი იყო.
ქალაქ ოზურგეთში შესრულებულ ინფრასტრუქტურულ სამუშაოებზე მოსახლეობა და ოპოზიციონერი დეპუტატები კარგა ხანია ამბობენ, რომ ამ სამუშაოებს ტენდერში გამარჯვებული კომპანიები უხარისხოდ ასრულებენ და არაკეთილსინდისიერად უდგებიან მათზე დაკისრებულ მოვალეობებს.
ერთ-ერთი პროექტი, რომელსაც მოსახლეობის მხრიდან უკმაყოფილება მოჰყვა, ქალაქ ოზურგეთში, იაკობ შემოქმედელის ქუჩაზე სკვერის მოწყობა იყო. აქაურების თქმით, მათ თხოვნით მიმართეს ქალაქ ოზურგეთის მერს ბეგლარ სიორიძეს, რომ რადგან ქალაქთან ტერიტორიულად დიდი მანძილი აშორებთ, პატარებისთვის მოეწყოთ სკვერი და მინისტადიონი. მერიამ მათ თხოვნა აუსრულა და აღნიშნულ ტერიტორიაზე სკვერი მოეწყო.
სკვერში შესრულებულ სამუშაოებს მოსახლეობის მხრიდან გაღიზიანება მოჰყვა _ სკვერი და მინისტადიონი, რომლის მოწყობაც 22 416 ლარი დაჯდა, მათი თქმით, არაკეთილსინდისიერად არის გაკეთებული.
როგორც მოსახლეობა განმარტავს, თანხა არამიზნობრივადაა გახარჯული, რადგან ხარჯთაღრიცხვაში მითითებული ღირებულება არ ესადაგება შეძენილი საქონლის ღირებულებას.
“აბუჩად აგვიგდეს, დაგვცინეს! ასე აკეთებენ ეტყობა სხვაგანაც. ამას ვინმე თუ უნდა აკონტროლებდეს?! ეს არის გაკეთებული?!” _ ამბობენ “გურია ნიუსთან” საუბრისას იაკობ შემოქმედელის ქუჩის მცხოვრებლები ნონა ტრაპაიძე, მანანა გუჯაბიძე, ლია ტრაპაიძე.
“დავწერეთ ერთობლივად განცხადება და ვთხოვეთ მერს, რომ გაეკეთებინათ სკვერი. 21 ბავშვი ცხოვრობს აქ. გააკეთეს, მაგრამ რომ არ გაეკეთებინათ, უკეთესი იქნებოდა _ სამარცხვინო მაგიდა და სკამები მოგვიტანეს. არ შევარჩენთ ამ დაცინვას. სულელები ვგონივართ ამათ _ 25 ლარი ღირს საქანელა და 1 525 ლარი გაწერეს, “სასრიალოში” 737 ლარია გაწერილი. ვნახეთ დოკუმენტები _ საერთოდ არ არსებობს ეგ “სასრიალო”. არ უნდა დაიჭირონ ამის გამკეთებელი? 50-ლარიანი მაგიდა და სკამები მოგვიტანეს, თან დაგვცინეს _ ოთხი კაცი ჯოკერს კი ითამაშებთო და გაწერეს 492 ლარი! ახლა დარია, უნდა ნახოთ, რა მდგომარეობაა აქ წვიმაში,” _ ამბობს მოსახლეობა.
აღნიშნულ პროექტთან დაკავშირებით, ქალაქ ოზურგეთის მუნიციპალიტეტის საკრებულოს დამოუკიდებელი დეპუტატი ლევან მგელაძე განმარტავს, რომ ასეთი პროექტები ოზურგეთში მრავლადაა და კომპანიები არაკეთილსინდისიერად ასრულებენ სამუშაოებს:
“კომპანიამ, ჩემი აზრით, არაკეთილსინდისიერად ჩაატარა სამუშაოები. შემსრულებლები უნდა მოიძებნონ და დაისაჯონ სამაგალითოდ, მაგრამ ვაძლევთ შანსს, როგორც მერიას, ასევე, შემსრულებელ კომპანიას, რომ უმოკლეს ვადაში, ის სამუშაოები, რაც მათ უნდა შეესრულებინათ, გამოასწორონ და შეასრულონ კეთილსინდისიერად”, _ ამბობს მგელაძე და დასძენს, რომ აღნიშნულ სამუშაოებზე არსებობს ექსპერტიზის დასკნაც: “ჩემთვის გასაკვირად, ამ საქმესთან დაკავშირებით არსებობს ექსპერტისა და მერიის ზედამხედველობის სამსახურის დასკვნა, რომ აქ სამუშაოები შესრულებულია დამაკმაყოფილებლად. გამოთხოვილი ოფიციალური დოკუმენტაციის მიხედვით რისი ანალიზიც გავაკეთეთ, არის უზარმაზარი დარღვევები. ე. წ. საქანელას ფასი, რომელზეც ექსპერტმა და შესაბამისმა სამსახურებმა დასკვნა დადეს, რომ დამაკმაყოფლებელია, მშენებელს 1 525 ლარად აქვს გაწერილი, ე. წ. “სასრიალო” _ 737 ლარი უღირს, მაგიდა და სკამები, რომელიც სინამდვილეში ღირს 50 ლარი, გაწერილია 492 ლარად”.
ქალაქ ოზურგეთის მუნიციპალიტეტის მერი ბეგლარ სიორიძე აღნიშნულთან დაკავშირებით ასეთ კომენტარს აკეთებს:
“ვიყავი იაკობ შემოქმედელის ქუჩაზე და ვნახე ეს პროექტი, რომელიც დასრულებულია და შესაბამისად, დასკვნაც აქვს წარმოდგენილი ტენდერში გამარჯვებულ კომპანიას. იქ არ არის საუბარი მხოლოდ საქანელაზე. როგორც გავარკვიე, არის მაგიდა, სკამები, “სასრიალო” და ერთად არის ეს ყველაფერი 1 500 ლარის ღირებულებისაა.
რაც შეეხება იმას, რომ არსებობს ექსპერტის დასკვნა აღნიშნულ სამუშაოების დასრულებასთან დაკავშირებით, მე მაინც ვთხოვე კომპანიის წარმომადგენელს, გამოასწოროს ეს ნაკლი, რადგან არც მე მომეწონა, რაც ვნახე. დამპირდნენ, რომ უმოკლეს დროში მოაგვარებენ ამ საკითხს.
დარწმუნებული ვარ, ასეც მოხდება. აუცილებლად გადავამოწმებ”, _ აღნიშნავს სიორიძე.
