დღეს, ოზურგეთის საგანმანათლებლო რესურსცენტრში, მაკვანეთის საჯარო სკოლის მათემატიკის მასწავლებელი, მურმან მსხალაძე დააჯილდოეს.
მას სახელმწიფომ საქართველოს დამსახურებული მასწავლებლის წოდება მიანიჭა.
საზეიმო დაჯილდოების ცერემონია, რომელსაც ოზურგეთის საჯარო სკოლების დირექტორები, პედაგოგები, ასევე მუნიციპალიტეტის მერიის საჯარო მოხელეები ესწრებოდნენ, რესურსცენტრის უფროსმა, ლელა იმედაშვილმა გახსნა:
_ძალიან სასიამოვნო დღე გვაქვს. აღიარება, რომელიც ჩვენს უფროს მეგობარს, ჩვენს კოლეგას, ჩვენი წარდგინებით ხვდა წილად, ეს მოხდა სახელმწიფოს მხრიდან. ეს არის დასტური იმისა, თუ როგორ ხდება ზრუნვა მასწავლებელზე არა მხოლოდ ფორმალურად, არამედ მისი აღიარებისთვის. ამიტომაც მინდოდა ცოტა განსხვავებული ყოფილიყო ეს ცერემონია და დღეს ჩვენთან, სკოლების დირექტორებთან ერთად, მოვიწვიეთ, მუნიციპალიტეტის მერიის წარმომადგენლები. როცა ბატონ მურმან მსხალაძეს ვხვდები და ვხედავ, მინდა, მოწიწებით სამგზის დავხარო თავი მის წინაშე! ის მთელი თავისი გავლილი ცხოვრებით არის მაგალითი, პედაგოგის სახე, თუ როგორ არ უნდა გადააბიჯოს მასწავლებელმა ზღვარს ზნეობიდან უზნეობისკენ! თუ ოდესე იქნება კიდევ უფრო დიდი ჯილდო, მე დაუფიქრებლად ვიტყვი, რო ეს მურმან მსხალაძეს ეკუთვნის! როცა ეს ამბავი დაანონსდება და კითხვის ნიშანი არ გაჩნდება: რატომ მაინც და მაინც ის? აი, ამიტომ! გილოცავთ, ღირსეულო მასწავლებელო, მთავრობის ღირსეულ ჯილდოს _ მიმართა მან მურმან მსხალაძეს.
ოზურგეთის მეოთხე საჯარო სკოლის დირექტორმა, ტარიელ კალანდაძემ მილოცვისას, მეტად ემოციური განცხადება გააკეთა:
_სამწუხაროდ, დღეს საქართველოში მასწავლებლის ქანდაკება არ დგას. თუმცა, თუ ოდესმე ძეგლს დაუდგამენ პედაგოგს, ვიზუალურადაც და მთელი თავისი განვლილი პედაგოგიური თუ ადამიანური ცხოვრებით უნდა იყოს ისეთი, როგორიც მურმან მსხალაძეა! აღიარება! ეს არის უდიდესი ჯილდო, რომლის ანალოგი პატივი არ არსებობს!
მურმან მსხალაძეს საპატიო ჯილდო მიულოცეს ოზურგეთის მუნიციპალიტეტის მერიისა და საკრებულოს წარმომადგენლებმა, საჯარო პირებმა, რომლებიც შეხვედრაზე იმყოფებოდნენ.
_ 30 წელია, განათლების სისტემაში ვმუშაობ. მთელი ამ წლების მანძილზე მესმოდა მურმან მსხალაძის, როგორც საუკეთესო პედაგოგის შესახებ. ყველაზე დიდი ბედნიერება, აღიარებაა და კიდევ ის, რომ მოსწავლეს უყვარხარ, თაობები გემადლიერებიან და გეტყვიან იმას , რაც დღეს უნდა გითხრათ: „მადლობა , მასწავლებელო“, – ასე მიმართა მურმან მსხალაძეს ოზურგეთის მუნიციპალიტეტის, ცხემლისხიდის საჯარო სკოლის ყოფილმა დირექტორმა, ლალი სიჭინავამ, რომელიც ახლა მუნიციპალიტეტის მერიაში მუშაობს.
ემოციურად, თვალებზე მოწოლილი ცრემლით მოიხადა მადლობა ბატონმა მურმან მსხლაძემ, როცა მას ქალბატონმა ლელა იმედაშვილმა ჯილდო გადასცა. შემდეგ კი, დარბაზში მსხდომ პედაგოგთა შემადგენლობას მიმართა: ეს სიხარული ყველას გამოგეცადოთო!
მურმან მსხალაძემ „გურია ნიუსთან“ ისაუბრა და მადლიერება გამოთქვა ქვეყნის ხელისუფლების, ასევე რესურცენტრის უფროსის, ლელა იმედაშვილის მისამართით, რომ არჩევანი მასზე შეაჩერა.
_56 წელია, პედაგოგად ვმუშაობ. როცა მუშაობ და შრომას დაგიფასებენ, ეს მეც მიხარია, მაგრამ ყველაზე უფრო ის მიხარია, რომ ეს არის სტიმული მომავალი თაობისთვის! მათთვის ასპარეზისკენ მითითება, რომ თუ თავდადებით, ერთგულად და წესიერად იშრომებენ, აუცილებლად დაუფასდებათ! კიდევ ერთხელ დიდი მადლობა! _ განაცხადა მან.
ავტორი
