“გურია ნიუსის“ მიერ მოპოვებული ინფორმაციით, დასავლეთ აფრიკის ერთ-ერთ ქვეყანაში დაკარგულ გემზე, სადაც 17 ქართველი იმყოფებოდა, ერთი ოზურგეთელია.
ეს ინფორმაცია ჩვენთან საუბრის დროს ოზურგეთის მუნიციპალიტეტის მერის ერთ-ერთმა წარმომადგენელმა დაგვიდასტურა.
“კონკრეტულად არაფერი ვიცით. გავიგეთ, რომ იმ გემზე იმყოფებოდა, რომელიც ამ დღეებში დაიკარგა“, _ გვითხრა მერის წარმომადგენელმა.
17 ქართველი მეზღვაურის ბედი ისევ უცნობია. დაკარგული გემის ადგილსამყოფელს ამ დრომდე ვერ მიაგნეს. არსებობს ვერსია, რომ გემი მეკობრეებმა გაიტაცეს, თუმცა, არ გამორიცხავენ, რომ გემის გაუჩინარება მეკობრეებთან კავშირში არ იყოს. გემთან კავშირი 14 აგვისტოს შეწყდა.
17 აგვისტოს ამ ფაქტთან დაკავშირებით საქართველოს საგარეო საქმეთა სამინისტრომ განცხადება გააკეთა.
“ პანამის დროშის ქვეშ მცურავ გემზე Pantelena IMO 9321469, რომელიც ახდენდა ნავთობის ტრანსპორტირებას და მის ბორტზე 17 ქართველი მეზღვაურია 14 აგვისტოს გაწყდა კავშირი. ბოლო კონტაქტი დაფიქსირდა აფრიკის დასავლეთ სანაპიროზე, გვინეის ყურეში. გემთმფლობელი ბერძნული კომპანია Lotus Shipping აწარმოებს მოძიების სამუშაოებს. საგარეო საქმეთა სამინისტრო ეკონომიკისა და მდგრადი განვითარების სამინისტროს საზღვაო ტრანსპორტის სააგენტოსთან ერთად კოორდინირებულად მუშაობს გემთმფლობელ კომპანიასთან ვითარების გარკვევის მიზნით. ასევე, აქტიურად ვმუშაობთ პანამის დროშის ორგანიზაციასთან. საქმეში ჩართულია როგორც რეგიონის საზღვაო სამხედრო ძალები ასევე, გაერთიანებული სამეფოს საზღვაო ცენტრი UKMTO.“
ამ განცხადების შემდეგ, ჯერჯერობით, ოფიციალური განცხადება არ გაკეთებულა.
