საქართველოს დამოუკიდებლის დღისადმი მიძღვნილი ღონისძიებები ქალაქ ოზურგეთში , გუშინ დღის ორი საათისთვის დაიწყო.
მთელი დღის განმავლობაში ოზურგეთელებმა და ოზურგეთის სტუმრებმა ადგილობრივი მუსიკალური და ქორეოგრაფიული ანსამბლების მიერ საინტერესო კონცერტები იხილეს.
მოეწყო კოსტიუმირებული მსახიობებისა და ორკესტრის მსვლელობა, ჭადრების ბაღში კი მცენარეების მოვლის, დარგვისა და გადარგვის აქტივობები შედგა.
აქვე იყო კულინარიის კუთხე _ „სამზარეულო ომების“ გამარჯვებულებმა ლანა და ეკა სალუქვაძეებმა სტუმრებს გურული სამზარეულოში უმასპინძლეს.
„ჩვენთვის ეს დღე არის ძალიან მნიშვნელოვანი. თავისუფლება ყველაზე დიდი მონაპოვარია და ეს ყველაზე საამაყოა“, _ გვითხრა ეკა სალუქვაძემ.
ღონისძიებაზე მყოფმა მრავალმა ადამიანმა ჩვენთან საუბრისას საკუთარი მოსაზრებები დააფიქსირეს.
ნიკოლოზ სირბილაშვილი: „ძალიან მიყვარს ეს დღე, რადგან საქართველოს დამოუკიდებლობის დღეა. ყველა ქართველს უნდა ახსოვდეს და ყველამ უნდა იცოდეს, რა მძიმე გზები გამოიარეს ჩვენმა წინაპრებმა, რომ ჩვენ თავისუფლება გვქონოდა“.
დათო კობიძე: „ეს დღე ყველა ქართველისთვის ძალიან მნიშვნელოვანია. გილოცავთ!“
ილია თოიძე: „საქართველოს ვუსურვებ თავისუფლებას, ბედნიერებას და წინსვლას; ტრადიციების შენარჩუნებას, მამული, ენა, სარწმუნოება არ დაგვერკაგოს.
დღეს არის დიდი დღე, რადგან დამოუკიდებლობაზე ძვირფასი ამ ქვეყანაზე არაფერია _ ეს არის ჩვენი დღევანდელობა, წარსული და მომავალი“.
დათო ხომერიკი: „მიუხედავად იმისა, რომ ასეთი ტურბულენტური სიტუაციაა ქვეყანაში მჯერა, რომ ეს დღე ყველას გვაერთიანებს. ყველას გვიყვარს ეს ქვეყანა და ყველას ვულოცავ! ყველას წინსვლას, წარმატებას ვუსურვებ და ერთად გავალთ სამშვიდობოს“.
„გურია ნიუსთან“ 26 მაისთან აკავშირებით კომენტარი გააკეთა ოზურგეთის მუნიციპალიტეტის მერის მოადგილემ გიორგი ღურჯუმელიძემ: „საქართველოს ნებისმიერი მოქალაქისთვის და გულშემატკივრისთვის უმნიშვნელოვანესია დღევანდელი დღე. ვისურვებდი, ჩვენი საქართველო უფრო მეტად ძლიერი და წარმატებული ყოფილიყოს. მინდა, რომ ძალიან მალე ერთიან საქართველოში გვეცხოვროს“.
საქართველოს დამოუკიდებლობის დღე მოგვილოცა გურულების სიძემ, ამერიკელმა ნოელ ბროკეტმა, რომელიც ქართულად კარგად საუბრობს:
„გილოცავთ დამოუკიდებლობის დღეს, გილოცავთ თავისუფლებას და მჯერა, რომ სულ ასე იქნება“, _ გვითხრა ნოელ ბროკეტმა.
დღესასწაული მასტერის და „რეზო და ბავშვების“ კონცერტით დასრულდა.
დამოუკიდებლობის დღისადმი მიძღვნილი ღონისძიება საქართველოს მთავრობის ადმინისტრაციის, სოფლის განვითარების სააგენტოსა და ოზურგეთის მერიის ორგანიზებით ჩატარდა.
ავტორი
