დამოუკიდებლობის 30 წლის თავს ვხვდებით – პოლარიზებული საზოგადოებით, კოვიდირებული ეკონომიკით, მძიმე დემოგრაფიით, დაკარგული ტერიტორიებით, 500 000 სოციალურად დაუცველი ადამიანით, 2 მილიონით შემცირებული მოსახლეობით, 2 მილიონი ემიგრანტით, ისევ ქუჩების გადაკეტვით, ისევ მესიების ძიებაში – და მაინც ,,არსად ისე არ მღერიან როგორც აქ, ამ ქვეყანაში, არსად, არსად არ არსებობს ბრძოლის ჟინი, ბრძოლის ქარი…”… ისევ ილია – რა გითხრათ, რით გაგახაროთ – ,, ჩემო კარგო ქვეყანავ, რაზედ მოგიწყენია!… აწმყო თუ არა გვწყალობს, მომავალი ჩვენია…”… 3000 წელზე მეტი ვიცხოვრეთ, დავეცით, ავდექით, გაგვყიდეს, ჩვენ არავინ ვიყიდეთ, გავერთიანდით, მერე იმდენჯერ დავეცით ადგომა კარგა ხანს აღარ გვიცდია – გვყავდა ფარნავაზი, ვახტანგი, გრიგოლ ხანძთელი, დავით კურაპალატი, იოანე მარუშისძე, ბაგრატი, დავითი აღმაშენებლად წოდებული, მეფე თამარი, რუსთაველი, გიორგი ბრწყინვალე… მერე ბედი არეულა და ბორბალი უკუღმა დატრიალებულა, პატარა კახიმ გამოანათა, რუსეთმა ჩაგვყლაპა… დიმიტრი ყიფიანი, ილია, ვაჟა, აკაკი, იაკობი – აი აი დაიწერა, წერა კითხვა ასწავლეს ხალხს, გარუსებას გადაგვარჩინეს…, იბრძოლეს დამოუკიდებლობისთვის ქაქუცამ, მაზნიაშვილმა, კვინიტაძემ – დამარცხდნენ… მერე პოეტების მეფე გალაკტიონი და ცისფერ ყანწელები, ექვთიმემ განძი დააბრუნა, რეზო თაბუკაშვილმა ექვთიმეს ღვაწლი და ცნობიერება დაგვიბრუნა, მზიანი ღამე გათენდა და პატრიარქი ილია მოგვევლინა, აზვირთებული ეროვნული მოძრაობა, 9 აპრილს დაღუპული გმირები… რამდენი სახელიანი და უსახელო სამშობლოსათვის თავდადებული… რეფერენდუმი, ბოლო ერთობა და 9 აპრილს პრეზიდენტ ზვიად გამსახურდიას გამოცხადებული დამოუკიდებლობა… და მაინც 26 მაისი მერაბ კოსტავას დაბადების დღეა, რომ ეცოცხლა იქნებ… იმის მერე ბედი არეულა და ბორბალი უკუღმა დატრიალებულა… და მაინც
“ჩემი ხატია სამშობლო, სახატე მთელი ქვეყანა, განათებული მთა-ბარი, წილნაყარია ღმერთთანა.
თავისუფლება დღეს ჩვენი მომავალს უმღერს დიდებას, ცისკრის ვარსკვლავი ამოდის და ორ ზღვას შუა ბრწყინდება,
დიდება თავისუფლებას, თავისუფლებას დიდება.”…
ღმერთმა დალოცოს საქართველო!… _ ამ პოსტით გამოეხმაურა საქართველოს დამოუკიდებლობის 30-ე წლისთავს საქართველოში ერთ-ერთი წარმატებული აუდიტორული კომპანიის დამფუძნებელი ბაქარ დევდარიანი. ამჟამად თბილისში მცხოვრები ახალგაზრდა, წარმოშობით ხარაგაულელია. ბაქარ დევდარიანი თანამემამულეთა შორის დიდი სიყვარულით და ავტორიტეტით სარგებლობს. ბუნებით ქველმოქმედი მშობლიურ ხარაგაულს და ხარაგაულელებს ბევრი კეთილი საქმით წაადგა.
