ჩვენ უკვე ვწერდით, რომ ოზურგეთის კულტურის და დასვენების პარკში, დიდთოვლობის დროს, ატრაქციონი „ავტოდრომი“ დაინგრა. ამასთან ერთად დაზიანებულია „მხიარული მატარებელი“ და „მხიარული კარუსელი“. გამომწვევი მიზეზი დიდთოვლობა იყო, თუმცა, როგორც ვწერდით, მიზეზად გულგრილობას უფრო ასახელებენ, როცა დამშვები ზონარის გახსნის შემთხვევაში, შესაძლებელი იყო მისი გადარჩენა.
ახლა, აქ, ჩამოშლილი სახურავის ქვეშ, დაწყვეტილი თასმები ყრია. ასე საგულდაგულოდ გახორციელებული პროექტის შემდეგ, ბავშვებისთვის უსაყვარლესი ატრაქციონის დანგრევა, როგორც ოზურგეთელი მშობლები აღნიშნავენ, ძალიან გულსატკენი ამბავია. ისინი ეჭვობენ, რომ აღდგენაც დიდხანს ვერ მოხერხდება, რადგან მუნიციპალიტეტში თოვლმა ისედაც უმრავი შენობა_ნაგებობა დააზიანა და არავინ იცის, როდის მოხდება ამ ყველაფრის აღდგენა თუ სულ თავიდან აშენება.
კულტურის და დასვენების პარკში, სადაც ავტოდრომის გარდა, სხვა ატრაქციონებიც დაზიანდა. ამიტომ, პირველ რიგში, როგორც ბევრი საუბრობს, აუცილებელია უსაფრთხოების ზომების დაცვა. აქ ხომ დღის განმავლობაში უამრავი ბავშვი დადის. ხშირად შემოდიან ახალგაზრდები.
_სადმე ჭა არ იყოს თავახდილი ან სადენები გაშიშვლებული. როგორია წყლის მომარაგების სისტემის მდგომარეობა… დაზიანებული ავტოდრომი შემოფარგლულია, თუმცა ხომ შეიძლება ბავშვს ცნობისმოყვარეობამ სძლიოს და შეძვრეს? ან იმ ჩამტვრეული სახურავიდან შიგ შეაღწიოს? აქვეა მეოთხე საჯარო სკოლა. თუ არსებობს აქ უსაფრთხოების სამსახური ? საქართველოში არაერთი ტრაგიკული ფაქტი მოხდა, ღმერთმა გვაშოროს. ძალიან საყურადღებო ამბავია. ახლააქ უამრავი პრობლემაა გადასაჭრელი, მაგრამ უსაფრთხოების საკითხი უმთავრესია,_ გვეუბნებიან ახალგაზრდა მშობლები ნუცა თავაძე და თეა ნაკაიძე.
_მე არ მევალება ამ ყველაფრის მიხედვა. ჩვენ მხოლოდ ერთ შენობაში ვართ. ისე კი იყვნენ აქ, დაათვალიერეს და აღწერეს ეს დანგრეული ავტოდრომი, _ გვითხრა ა(ა)იპ თოჯინების თეატრის ხელმძღვანელმა ლაშა კუტალაძემ.
„გურია ნიუსის“ მიერ მოპოვებული ინფორმაციის თანახმად, აღნიშნული ა(ა)იპ-ის დაქვემდებარებაში ეს პარკი რამდენიმე თვის წინ გადავიდა და პასუხისმგებლობაც მასზეა. ასევე, ქონება, რაც არსებობს, უკლებლივ მის სახელზეა დარეგისტრირებული. თუმცა, ვიდრე იუსტიციის სახლიდან შესაბამის დოკუმენტს მივიღებდეთ, რომ შემდეგ უფრო დაკონკრეტებით ვისაუბროთ პასუხისმგებლობასა და საქმიანობის შინაარსზე, მანამდე არაერთი სხვა პრობლემაც არსებობს. კერძოდ, აქ, ორიათასამდე ძირი მარტო მწვანე ნარგავია , რომელსაც მოვლა-პატრონობა სჭირდება. (მორწყვა, გასხვლა, ფორმირება, შემობარვა თუ სხვადასხვა სასუქის მიცემა…)
_კონკრეტულად მწვანე ნარგავებს ჩვენ ვუვლით. მოვლაში ვგულისხმობთ გასხვლას, სასუქის მიცემას. ზოგადად, რაც მცენარეს სჭირდება, _ გვითხრა ა(ა)იპ ოზურგეთის მომსახურების ცენტრის დირექტორმა გია ანთაძემ.
კულტურის და დასვენების პარკში, უხვთოვლიანობის შემდეგ, რაც ავტოდრომი დაინგრა, არაერთხელ ვნახეთ ოზურგეთის მუნიციპალიტეტის მერიის ინფრასტრუქტურის სამსახურის უფროსი, გოჩა აბაშმაძე.
_ამ მომენტში ავტოდრომი შემოსაზღვრულია, ადევს ბოქლომი. საფრთხეც ნაკლებად მოსალოდნელია. ვხედავ, ბავშვები დადიან. ამ თოვლდიდობის შემდეგ, მუნიციპალიტეტში იმდენი სახლია დანგრეული და დაზიანებული, ვერც წარმოვიდგენდით. შესაბამისად, საქმეც უამრავია. ყველა სამსახურს ჰყავს ხელმძღვანელი და უნდა გააკეთოს ის, რაც ევალება. რაც არ ევალება, ვინმე ავალებს ვინმეს იმის კეთებას? _ გვითხრა მან.
აღნიშნულ პარკში განთავსებულია კაფე, რომლის გაქირავებასა და ახალგაზრდულ სივრცედ გამოყენებაზე არაერთხელ იყო საუბარი. თუმცა, როგორც ადრე გვითხრეს („გურია ნიუსი“ არაერთხელ წერდა აღნიშნულ პარკში გახორციელებულ პროექტსა და მის უდიდეს მნიშვნელობაზე ოზურგეთელი ახალგაზრდებისთვის დ არა მარტო… ავტ.) მაღალი ფასის გამო, ეს არ მოხერხდა. ასე დარჩა უფუნქციოდ დიდის ამბით აგებული შენობა…
ოზურგეთის მოსწავლე ახალგაზრდობის და კულტურის სახლი რომ ქალაქიდან მოშორებით, სოფელ ოზურგეთში მდებარეობს, ეს ცაკლე პრობლემაა აქაური მოსწავლეებისთვის. ფაქტიურად, ის ქალაქის ცენტრში ან ახლოს უნდა იყოს განთავსებული, რომ მოსწავლეებმა და მშობლებმა შეძლონ იქ მისვლა, ღონისძიებებზე დასწრება.
_პარკი და მოსწავლეთა სახლი ერთმანეთთან ახლოს უნდა იყოს. ასევე თოჯინების თეატრის მიერ , ოთხივე სეზონზე უნდა იმართებოდეს ღონისძიებები, სპექტაკლები. ეს არის მოსახლეობის დაკვეთა. სახელმწიფო თეატრს 200 ათასი ლარით ასუბსიდირებს. უდიდესი მოლოდინი იყო, რომ აღნიშნულ პარკში ახალგაზრდული ცენტრები გაკეთდებოდა. პერიფერიაში გადასროლილი კულტურის სახლი კი ცენტრში დაბრუნდებოდა. (საუბარი იყო ოზურგეთის ცენტრში არსებული კინოს სახლის რემონტზეც, რომ იქ მერე კულტურის სახლი განთავსებულიყო. ამის თაობაზე სამი წლის წინ, ოზურგეთელი მშობლები მაშინდელ კულტურის მინისტრს, თეა წულუკიანს შეხვდნენ და ითხოვეს, კულტურის ცენტრი კვლავ დაბრუნებოდა ოზურგეთის ცენტრს. წულუკიანმა მათ განუცხადა, რომ მისი პირდაპირი მოვალეობა არ იყო ეს, თუმცა დაპირდა დახმარებას.
თუმცა დაპირება დაპირებად დარჩა. დღეისთვის კი, არსებული და ასევე სტიქიით გამოწვეული პრობლემები კიდევ უფრო გადაეჯაჭვა ერთმანეთს.
ჩვენ კიდევ ერთხელ მივუბრუნდებით ამ უმნიშვნელოვანეს საკითხს და მის ირგვლივ არსებულ პრობლემებს, როცა უკვე ხელთ გვექნება მნიშვნელოვანი დოკუმენტაცია.
ავტორი
