დღეში კორონავირუსის ათასობით ახალი შემთხვევა გვაქვს, თუმცა ჯანდაცვის სფეროს წარმომადგენლები არ მალავენ – პიკში ჯერაც არ შევსულვართ. კიდევ რამდენს გაუძლებს ჯანდაცვის სისტემა და რა მოხდება, როცა ვეღარ გაუძლებს?
ახალი რეკორდი! საქართველოში კორონავირუსი 47 ათასზე მეტ ადამიანს სჭირს. ეს დადასტურებულად. დაავადებათა კონტროლის ცენტრის დირექტორის მოადგილე, პაატა იმნაძე აღიარებს, რომ სინამდვილეში მათი რიცხვი “20-25%-ით უფრო მაღალია”. ამ დროისთვის , “ყოველი 50-ე, მე-60 მოქალაქე არის ინფიცირებული” – განაცხადა მან დღეს გამართულ ვებინარზე.
“ორი კვირაა, დანის პირზე დავდივართ – ეუბნება “რადიო თავისუფლებას” ბოკერიას სახელობის საუნივერსიტეტო ჰოსპიტალის კლინიკური დირექტორი ალექსი ვაჩაძე – გაჩერებული გვაქვს გეგმიური ოპერაციები და ამ ფონზე, რესურსების 99% მიმართულია კორონასკენ”.
მისი თქმით, 250-ვე საწოლი დაკავებულია. ახალ პაციენტებს მხოლოდ იმის წყალობით იღებენ, რომ ყოველდღიურად ზოგი კოვიდინფიცირებული ეწერება, ზოგი კი იღუპება. კლინიკა თავის შესაძლებლობების ზღვარზე მუშაობს, სრულად იყენებს რესურსს და “ერთი ექთანიც რომ დაგვიავადდეს, უკვე ახლოს ვიქნებით კატასტროფასთან”.
ადგილები ილევა სხვა საავადმყოფოებშიც. 12 აგვისტოს ლევან რატიანმა ტვ პირველს დაუდასტურა, რომ ადგილების არქონის გამო მისმა კლინიკამ უარი უთხრა მიღებაზე 31 წლის ფეხმძიმე ქალს, რომელსაც ნაყოფი დაეღუპა.
10 აგვისტოს თბილისელ სალომე კვირიკაშვილს ბაბუა დაეღუპა, “ონკო პაციენტი იყო, სუნთქვა გაუჭირდა და უჟანგბადობა ჰქონდა”. 112-ს ოპერატორთან დაკავშირებას სალომე 4 წუთი ელოდა, სასწრაფო კი საათნახევრის დაგვიანებით მოვიდა.
“ბაბუას შანსი არ ქონდა, როგორც აგვიხსნეს და ნუ კი, ბატონო, ამაში მათ ვერ დავადანაშაულებთ, მაგრამ სანამ მოვიდოდნენ, მათ ხომ ეს არ იცოდნენ, იცოდნენ რომ ადამიანი კვდებოდა, სუნთქვა უჭირდა და სისხლჩაქცევები გაუჩნდა სხეულზე უჟანგადობით”, – ამბობს სალომე.
რატომ ვართ კატასტროფის პირას?
“დელტა შტამი” – ასე პასუხობს ამ კითხვას ჯანდაცვის ყოფილი მინისტრი, სანდრო ურუშაძე. ამასთანავე, მისი თქმით, გვერდს ვერც ხელისუფლების არაკომპეტენტურობას ავუვლით.
სანდრო ურუშაძე განმარტავს – მმართველი გუნდის შეცდომა ისაა, რომ ქვეყანაში პანდემიაზე რეაგირების გეგმა არ არსებობს. უფრო სწორედ არსებობს, მაგრამ “მხოლოდ ფურცელზე”. სახელმწიფო რეაგირებს “სიტუაციიდან გამომდინარე”, ეს კი საკმარისი არ არის.
“კვლევა უნდა ტარდებოდეს შემთხვევების, სამედიცინო სექტორის დატვირთვის, ინფიცირების გავრცელების გზების და ამის მიხედვით უნდა ხდებოდეს რეაგირება.” – ამბობს იგი – გრძელვადიანი ხედვა და სტრატეგიული მართვის ინსტრუმენტები არა გვაქვს ქვეყანაში და მთლიანად დამოკიდებული ვართ საკოორდინაციო საბჭოს ყოველდღიურ გადაწყვეტილებებზე”.
თუმცა რამდენად არაკომპეტენტურიც არ უნდა იყოს ხელისუფლება და რა სახიფათოც არ უნდა იყოს კორონავირუსის მუტირებული ვარიანტი, მთავარი პრობლემა მაინც აუცრელობაა.
“ჩვენთან [სრულად] ვაქცინირებული მოსახლეობის რაოდენობა ძალიან მწირია – 5%ზე ნაკლებია. ანუ თუ შევადარებთ, რატომ აქვთ სხვა ქვეყნებს უფრო ნაკლებად დატვირთული ჰოსპიტალური სექტორი და ნაკლები ადამიანია გარდაცვლილი ბოლო პერიოდში, ამის მთავარი პასუხი არის ვაქცინაციის მაცვენებლები, მათ შორის ორჯერ ვაქცინირებული მოსახლეობის რაოდენობა” – ამბობს სანდრო ურუშაძე.
არადამაიმედებელი პროგნოზები
ჯანდაცვის სფეროს წარმომადგენლები აღიარებენ – ინფიცირებულთა და გარდაცვლილთა ყოელდღიური რიცხვი კიდევ უფრო გაიზრდება.
“ყოველდღე, ინფიცირებულთა 13% ხვდება სტაციონარში” – განაცხადა 11 აგვისტოს ჯანდაცვის მინისტრმა ეკატერინე ტიკარაძემ.
არსებობს უფრო საგანგაშო პროგნოზებიც.
ამერიკული ორგანიზაცია, ჯანმრთელობის გაზომვისა და შეფასების ინსტიტუტი (IHME), სხვადასხვა მონაცემებზე დაყრდნობით, პანდემიის განვიითარების შესაძლო სცენარებს ანგარიშობს. საქართველოს შესახებ მონაცემები, მათ ბოლოს 5 აგვისტოს განაახლეს.
ყველაზე უარესი სცენარის თანახმად, აგვისტოს ბოლოსთვის, დღეში 80 ადამიანზე მეტი დაიღუპება.
ამავდროულად, IHME-ის გამოთვლებით, საქართველოში კორონავირუსით დღეში იმაზე გაცილებით მეტი ადამიანი ინფიცირდება, ვიდრე ჯანდაცვის სისტემა აფიქსირებს.
მათი ცხრილის მიხედვით, მხოლოდ 6 აგვისტოს, უკეთეს შემთხვევაში 13 ათასი ადამიანი დაავადდა, უარეს შემთხვევაში კი 16 ათასზე მეტი.
წყარო: რადიო თავისუფლება
