„გურია ნიუსის“ ექსკლუზიურ ინფორმაციას, ნატალია ხომერიკის განათლების, კულტურის, სპორტისა და ახალგაზრდულ საქმეთა სამსახურის უფროსის თანამდებობიდან (რომელზეც ის 12 დეკემბერს დაინიშა) განყოფილების უფროსად ჩამოქვეითების შესახებ, საკრებულოს სხდომაზე ხმაური მოჰყვა.
„ოცნების“ დეპუტატმა ხათუნა ცერცვაძემ დასვა კითხვა, რამდენად შეესაბამებოდა მედიაში გავრცელებული ინფორმაცია ხომერიკის სამსახურის უფროსად დანიშვნის შესახებ სიმართლეს.
_ ამ დანიშვნას დიდი რეზონანსი მოჰყვა და ასევე, მოჰყვება რეზონანსი არდანიშვნასაც. დაინიშნა თუ არა მერიის თანამშრომელი სამსახურის უფროსად, კონკრეტული პასუხი გვაინტერესებს, _ თქვა ცერცვაძემ.
იურიდიული სამსახურის უფროსმა ლაშა თავაძემ განაცხადა, რომ იყო საუბარი, იყო შეთავაზება ხელმძღვანელობის მხრიდან, შემდეგ დაიწერა ბრძანება, თუმცა, არ გამოქვეყნებულა, იურიდიული ძალა არ ჰქონდა.
„ოცნების“ დეპუტატმა მარი ჩხიკვიშვილმა თავაძისგან კონკრეტული პასუხი მოითხოვა.
_ ჩამოყალიბდი, ბატონო ლაშა, ეს არ არის იურისტის პასუხი.
ლაშა თავაძემ კვლავ აღნიშნა, რომ ხომერიკი სამსახურის უფროსად ინიშნებოდა და ხელმძღვანელობამ შესთავაზა განყოფილების უფროსად დანიშვნა!
ხათუნა ცერცვაძე და მარი ჩხიკვიშვილი დაჟინებით მოითხოვდნენ კონკრეტულ პასუხს, რატომ დაინიშნა. თუ არ დანიშნულა, საიდან გავრცელდა მედიაში და რას ნიშნავს ბრძანება დანიშვნაზე და მერე არდანიშვნაზე.
სხდომა ისე დასრულდა, კითხვა-პასუხის ხმაურიან რეჟიმს კონკრეტული პასუხი არ მოჰყოლია.
„გურია ნიუსმა“ საკითხის ირგვლივ კომენტარი სთხოვა მუნიციპალიტეტის გამგეობის იურიდიული სამსახურის უფროსს ლაშა თავაძეს:
ბრძანებას ხელი არ აქვს მოწერილი. მოეწერება, გატარდება და შეიძენს იურიდიულ ძალას. ხელმოწერა არ ნიშნავს იურიდიულ ძალის შეძენას. ძალას იძენს ოფიციალურ ბეჭდვით ორგანოში გამოქვეყნების შემდეგ. თუ ეს ორგანო არ გააჩნია, ვებგვერდზე უნდა გამოქვეყნდეს.
_რატომ აღარ ნიშნავენ სამსახურის უფროსად ნატო ხომერიკს და ნიშნავენ თუ არა ამ ადგილზე ოზურგეთის მერიის ყოფილ თანამშრომელს ვოვა კუნჭულიას?
_ ვოვა კუნჭულიას შესახებ არაფერი ვიცი, მე არ მსმენია ამის შესახებ. ნატო ხომერიკი სამსახურის უფროსად ინიშნებოდა და ხელმძღვანელობამ შესთავაზა განყოფილების უფროსად დანიშვნა.
„გურია ნიუსთან“ ასევე კომენტარი გააკეთა საკრებულოს დეპუტატმა „ქართული ოცნებიდან“ მარი ჩხიკვიშვილმა:
_ნატო ხომერიკის კულტურის სამსახურის უფროსად დანიშვნასთან დაკავშირებით კითხვებით მივმართე მერიის თანაშემწეს კოკა კიღურაძეს და მერიის იურისტს ლაშა თავაძეს. თუმცა, ვერც ერთმა დამაკმაყოფილებელი პასუხი ვერ გამცა. მედიაში გავრცელდა ინფორმაცია ნატო ხომერიკის კულტურის სამსახურის უფროსად დანიშვნაზე და მერე უკვე არდანიშვნაზე. მივმართე აღმასრულებელი ხელისუფლების წარმომადგენელს, იყო თუ არა ეს პროცედურა კანონმდებლობის მთელი დაცვით გახორციელებული, თუ იყო ბრძანებაზე ხელი მოწერილი, თუმცა, პასუხები ვერ მივიღე. ბატონმა ლაშამ მიპასუხა, რომ ეს იყო ბრძანების პროექტი. თუმცა, კანონმდებლობის შესაბამისად, ბრძანების პროექტს არ სჭირდება ხელწერა. ასევე, ბატონმა ლაშამ გვიპასუხა, რომ ხელწერა ძალაში შედის 24 საათის განმავლობაში, თუმცა, ლაშამ არასწორად გვიპასუხა, რადგან ბრძანება, კანონმდებლობის მიხედვით, ხელმოწერისთანავე შედის ძალაში. ჩემთვის, როგორც საკრებულოს წევრისთვის, მთავარია, თითოეული მოქალაქის და თითოეული თანამშრომლის ინტერესი, რასაც მუდამ დავიცავ, _ გვითხრა ჩხიკვიშვილმა.
