გასულ კვირას ოზურგეთის მუნიციპალიტეტის საკრებულოს რიგგარეშე სხდომა გაიმართა. სხდომის დაწყებამდე საკრებულოს თავმჯდომარემ, დავით დარჩიამ ქართული ჟურნალისტიკის დღე მიულოცა მედიის წარმომადგენლებს.
“ქართული ჟურნალისტიკის დღეს გილოცავთ თითოეულ ჟურნალისტს! თქვენი საქმიანობა უდიდეს შრომასა და პასუხისმგებლობას მოითხოვს. გისურვებთ წინსვლასა და წარმატებებს პროფესიულ საქმიანობაში!” _ მიმართა მან ჟურნალისტებს და აღნიშნა, რომ 21 მარტი დაუნის სინდრომის მსოფლიო დღეა და ჯანმრთელობა და ბედნიერება უსურვა ამ სინდრომის მქონე ყველა ბავშვს.
შემდეგ დავით დარჩიამ საკრებულოს წევრებს დღის წესრიგი გააცნო.
პირველი საკითხის: “ოზურგეთის მუნიციპალიტეტის მერიის მიერ, 2022 წელს გახორციელებული შესყიდვების ანგარიშის მოსმენის შესახებ _ ოზურგეთის მუნიციპალიტეტის საკრებულოს მიერ ცნობად მიღების თაობაზე”, შესყიდვების სამსახურის წარმომადგენელმა, დავით გორდელაძემ ისაუბრა:
_ ოზურგეთის მუნიციპალიტეტის მიერ, 2022 წლის განმავლობაში სახელმწიფო შესყიდვების წლიური გეგმის შესაბამისად, რომელიც ჯამურად განსაზღვრული იყო 44 773 760 ლარით, გაფორმდა 545 სახელმწიფო შესყიდვების შესახებ ხელშეკრულება და მასთან გათანაბრებული დოკუმენტი, ჯამურად, 37 872, 291, 51 ლარზე. მათ შორის 412 ხელშეკრულება გამარტივებული შესყიდვის წესით, ჯამური ღირებულებით 4 324 772, 66 ლარზე, რაც შესყიდვების სრული მოცულობის 11,42%-ს შეადგენს. 112 ხელშეკრულება ელექტრონული ტენდერის ჩატარების შედეგად, ჯამურად 31 834 455,74 ლარზე, რაც გახორციელებული შესყიდვების 84, 06 %-ია და 21 ხელშეკრულება საქართველოს მთავრობის მიერ, გახორციელებული , კონსოლიდირებული ტენდერის საშუალებით, ჯამურად 1 713 063, 11 ლარზე, რაც სულ გაფორმებული ხელშეკრულებების ჯამური ღირებულებების 4,52%-ია, _ თქვა მან.
დავით გორდელაძემ, ასევე, განმარტა, რომ აღნიშნულ პერიოდში, ოზურგეთის მუნიციპალიტეტის მიერ, გამოცხადებული იყო 151 ელექტრონული ტენდერი. აქედან, არ შედგა 31 ტენდერი იმიტომ, რომ არც ერთმა პრეტენდენტმა მონაწილეობა არ მიიღო. ორი ტენდერი დასრულდა უარყოფითი შედეგით, რადგან ტენდერში მონაწილეებმა ვერ დააკმაყოფილეს სატენდერო დოკუმენტაციით განსაზღვრული პირობები, ერთი ტენდერი კი შეწყვეტილად გამოცხადდა. შემდგარი 117 ელექტრონული ტენდერი, გამოცხადებული იყო, ჯამურად, 36 146 535 ლარზე.
გაფორმებული ხელშეკრულებების ჯამურმა ღირებულებამ შეადგინა 32 081 829, 85 ლარი. შესაბამისად, მიღებულმა ეკონომიამ შეადგინა 4 064 705, 15 ლარი (11,25%).
დავით გორდელაძემ დარბაზში მსხდომთ მიმართა, თუ კითხვები ექნებოდათ ამ ყველაფერზე, პასუხს გასცემდა.
“ნაციონალმა” დეპუტატმა დავით მჟავანაძემ სასწრაფოდ განაცხადა, რომ შეფასების გაკეთება სურდა და ითხოვა ყურადღებით მოსმენა.
საკრებულოს თავმჯდომარემ მას უთხრა, კითხვა დაესვა, ხოლო შეფასებაზე ბოლოს ესაუბრა.
მჟავანაძემ შენიშვნაზე უკმაყოფილება გამოთქვა, აზრი არავის გამოუთქვამს ტენდერების თაობაზე და შეფასება მსურსო:
_ სწორედ ამ პროექტების თაობაზე მსურს საუბარი. ევროკავშირის მიერ დაფინანსებული პროექტია ეს, რომლითაც გალამაზდა ქალაქი. თუმცა, თქვენ ერთი წლის განმავლობაში ატყუებდით ხალხს, რომ ეს “ქართული ოცნების” მიერ იყო დაფინანსებული. ერთ-ერთი პროექტის თაობაზე უნდა დავსვა კითხვა, _ გაბრაზებული ყვიროდა მჟავანაძე და ფოტოებს აფრიალებდა:
_ თეატრის წინ მდებარე მოედანზე მოშალეთ ინფრასტრუქტურა მხოლოდ იმიტომ, რომ “ნაციონალების” გაკეთებული იყო. მე მაშინვე დავსვი კითხვა და გიორგი ღურჯუმელიძემ მითხრა, უკეთესს ვაკეთებთო. ეს კუბოებია უკეთესი? _ თქვა მან და ფოტოები ააფრიალა, თეატრის წინ მდებარე მოედნის, როგორც ძველის, რომელიც დაანგრიეს, ასევე _ ახლის, რომელსაც ახლა აკეთებენ.
_ ძალიან კარგია, რომ შესყიდვების ნაწილი მოდის იმ პროექტებზე, რომლებიც ევროკავშირისგან ფინანსდება, თუმცა, გამეცით პასუხი _ ეს რომ არ მოგწონდათ და ეს რომ მოგწონთ ამიტომ დაანგრიეთ? ამიტომ დააწყვეთ კუბოები? გაიტანეთ თეატრის მოედნიდან ეს კუბოები, _ თქვა მჟავანაძემ იმ საყვავილეების მისამართით, რომლის თეატრალურ მოედანზე განლაგებამ მოსახლეობაში სერიოზული უარყოფითი შეფასება გამოიწვია.
მჟავანაძეს “ოცნების” წევრები გამოეხმაურნენ.
_ სირცხვილია, ის მოღალატე პარტია ლაპარაკობს, რომელმაც გაყიდა სამშობლო, გაყიდა საქართველო და გიჭირთ იმის აღიარება, რაც კეთდება. დამანგრევლები თქვენ ხართ და კიდევ გვამების დამწყობი, _ კამათში შეჰყვა მჟავანაძეს “ქართული ოცნების” წარმომადგენელი ქეთი ხომერიკი, შემდეგ კი მას ხელიდან გამოსტაცა ფოტოები და დაუხია.
“ნაციონალმა” დეპუტატმა რაინდი დუმბაძემ თქვა, რომ საკრებულოს სხდომაზე უნდა განიხილებოდეს ყველა პროექტი, რომელიც ხორციელდება:
_ ასეთ რეჟიმში მუშაობა არ შეიძლება. ჩვენც უნდა მოგისმინოთ და თქვენც უნდა გვისმენდეთ.
დაპირისპირება და ხმაური საკრებულოს სხდომაზე ნახევარ საათზე მეტ ხანს გაგრძელდა, შემდეგ კი “ნაციონალური მოძრაობის” დეპუტატებმა დარბაზი დატოვეს და უკან აღარ დაბრუნებულან.
საკრებულომ დადებითად შეაფასა და ცნობად მიიღო ოზურგეთის მუნიციპალიტეტის მერიის მიერ 2022 წელს გახორციელებული შესყიდვების შესახებ ანგარიში.
ოზურგეთის განაშენიანების გენერალური გეგმის შემუშავების დაწყების თაობაზე, მუნიციპალიტეტის მერის მოადგილემ, გიორგი ღურჯუმელიძემ ისაუბრა.
საკრებულომ, მერს ქ. ოზურგეთის გენერალური გეგმის შემუშავების დაწყების თაობაზე თანხმობა მისცა.
აღნიშნული განკარგულების პროექტი ხმათა უმრავლესობით დამტკიცდა, თუმცა, კენჭისყრაში მონაწილეობა არ მიუღიათ ფრაქცია ” ერთიანი ნაციონალური მოძრაობის” წევრებს, რადგან მათ, როგორც ვთქვით, სხდომა ხმაურის და დაპირისპირების შემდეგ დატოვეს.
საკრებულოს რიგგარეშე სხდომაზე, დეპუტატ დავით მჟავანაძის გამოსვლის შემდეგ, როცა მან და მისივე პარტიიდან საკრებულოს წევრებმა დარბაზი დატოვეს, სიტყვა ითხოვა საფინანსო-საბიუჯეტო კომისიის თავმჯდომარემ, გელა ჩავლეშვილმა:
“მინდა, გლობალური ომის პარტიას გამოვეხმაურო, რადგან ისე არ მომეცა საშუალება, პასუხი გამეცა, არ მაცალეს! საკრებულოს სხდომამდე რამდენიმე დღით ადრე, აღნიშნული საკითხი სამმა კომისიამ განიხილა. იქვე იყვნენ თვითონ “ნაციონალი” დეპუტატები _ თავად დავით მჟავანაძე და ბესო ქათამაძე. ერთი სიტყვაც არ უთქვამთ, კრინტი არ დაუძრავთ. ვინ დაუშალა, ეთქვათ, კრიტიკულად გამოსულიყვნენ. თუმცა, იცით, რაშია საქმე? კომისიის სხდომაზე არ იყვნენ ოპოზიციური ტელევიზიები და ჟურნალისტები, არ იყო კამერები. დღეს კი აქ არიან. ამჯერად მათი მთავარი ამოცანა იყო კამერების წინ პოზიორობა. მე იმის თქმა მინდა, რომ საკრებულოს დარბაზი არ არის თეატრი და კინოს გადასაღები მოედანი. მოვიდნენ და ილაპარაკონ საქმეზე”, _ თქვა ჩავლეშვილმა საკრებულოს “ნაციონალი” წევრების მისამართით.
ამავე სხდომაზე, საკრებულოს გადაწყვეტილებით დამტკიცდა შემდეგი განკარგულების პროექტები: “საკრებულოს 2023 წლის II კვარტლის სამუშაო გეგმა”; მუნიციპალიტეტის საკუთრებაში არსებული მოძრავი ქონების ა(ა)იპ “ოზურგეთის მომსახურების ცენტრისთვის”, “ოზურგეთის მუნიციპალური ინსპექციისთვის” და “ლანჩხუთის, ოზურგეთისა და ჩოხატაურის მუნიციპალიტეტებში სახელმწიფო რწმუნებულის ადმინისტრაციისთვის” სარგებლობის უფლებით გადაცემაზე, ოზურგეთის მუნიციპალიტეტის მერისთვის თანხმობის მიცემის შესახებ , ასევე, მუნიციპალიტეტის საკუთრებაში არსებული მოძრავი ქონების შპს “სატისისთვის” სარგებლობის უფლებით გადაცემაზე.
ავტორი
