„მინდა მოვუწოდო ჩვენს ოპონენტებს, რომ თავი დაანებონ საკუთარი პოლიტიკური მიზნებისთვის სოციალურად დაუცველი მოქალაქეებით მანიპულირებას“, _ ასე გამოეხმაურა შრომის, ჯანმრთელობისა და სოციალური დაცვის მინისტრის მოადგილე ზაზა სოფრომაძე პარტია „ევროპული საქართველოს“ წევრის ზურაბ ჭიაბერაშვილის განცხადებას.
„მსოფლიოში არ არსებობს სისტემა, რომელიც დახმარების ყველა მსურველს დააკმაყოფილებს და გამონაკლისი არც საქართველოა. სოციალური დახმარების დანიშვნისა და მოხსნის პროცესი, ისევე როგორც ოჯახების გადამოწმების პროცესი _ არის მუდმივი. ყოველთვიურად ათასობით ადამიანს ენიშნება და უჩერდება სოციალური დახმარება.
საერთაშორისო ორგანიზაციებთან აღებული ვალდებულებების მიხედვით, სოციალურად დაუცველი ოჯახების გადამოწმების პროცესი აგვისტოში უნდა დასრულდეს. შესაბამისად, გადამოწმების პროცესი აქტიურად მიმდინარეობს.
მინდა ხაზგასმით აღვნიშნო, რომ ყოველგვარ საფუძველს არის მოკლებული ის აზრი, თითქოს გარკვეული თანხების დაზოგვა ხდება ამ მიმართულებით. საბიუჯეტო პროცესი არის აბსოლუტურად გამჭვირვალე და ყველა ეს რესურსი მიემართება მიზნობრივად სოციალურად დაუცველი ოჯახებისკენ და ხმარდება მხოლოდ სოციალურ პროგრამებს.“
გარდა ამისა, ადგილობრივი თვითმმართველობებთან მიმდინარეობს მუშაობა, რომ მათი სოციალური პროგრამების მეშვეობით ამ ადამიანებისათვის კიდევ უფრო ხელმისაწვდომი გახდეს სხვადასხვა სოციალური სერვისი.
2016 წელს აქტიურად მოწმდებოდა როგორც საარსებო შემწეობის მიმღები ოჯახები, ასევე ბაზაში რეგისტრირებული , მაღალქულიანი ოჯახები, ასევე ის პირებიც, რომლებიც არ იყვნენ რეგისტრირებულები ბაზაში და პირველადი განაცხადით მომართეს სააგენტოს. ამას დაემატა ის ადამიანებიც, რომელთაც გაუვიდათ ბაზაში რეგისტრაციის გაუქმების 1 წლიანი ვადა და ხელახალი გადამოწმება მოითხოვეს.
ბაზაში საარსებო შემწეობის მიმღებ პირთა რაოდენობის კლება ან ზრდა არ არის ამოვარდნილი იმ საერთო სურათიდან რაც ზოგადად ახასიათებს ამ პროგრამას. 2015-2016 წლებში ბაზაში რეგისტრირებული საკმაოდ დიდი მასის გადამოწმება მოხდა, ამჟამად მიმდინარეობს გადამოწმება გეგმა გრაფიკით და ამ ოჯახებს შორის ბევრია საარსებო შემწეობის მიმღები ოჯახი”, _ განაცხადა სოფრომაძემ.
შეგახსენებთ, რომ ფრაქცია “ევროპული საქართველოს” წევრის ზურაბ ჭიაბერაშვილის განცხადებით, ოქტომბრიდან დღემდე საარსებო შემწეობის გარეშე 53 000-მდე მოქალაქე დარჩა.
“მეექვსე თვეა, მილიარდერი ივანიშვილის მთავრობა ათიათასობით სოციალურად დაუცველ ოჯახს ართმევს საარსებო შემწეობას იმ ფონზე, როდესაც ამავე მთავრობის არასწორი ეკონომიკური პოლიტიკით ხალხი უფრო და უფრო ღარიბდება.
ჯანდაცვის სამინისტროს ოფიციალური მონაცემებიდან ჩანს, რომ ოქტომბრიდან დღემდე შემწეობაშეჩერებული 53 000 მოქალაქიდან:
– 7 000 ბავშვია;
– ყველაზე დიდი დარტყმა პენსიონერებმა მიიღეს: შემწეობა მოეხსნა 17 000 პენსიონერს. მათგან უმეტესობა მარტოხელა მოხუცია;
– უდიდესი ნაწილი – 43,000 მოქალაქე სოფლად ცხოვრობს. არადა მთავრობის არასწორი ეკონომიკური პოლიტიკის გამო ხალხს განსაკუთრებით სოფლად გაუჭირდა.
– კლება სხვებზე მეტად ყველაზე გაჭირვებულ, ყველაზე დაბალქულიან – 0-დან 30 000-მდე და 30 000-57 000 ქულების ჯგუფებშია. ეს ჯგუფები ყოველ პირზე, შესაბამისად, 60 და 50 ლარს იღებენ. ეს პირდაპირ მიუთითებს, რომ საარსებო შემწეობის მოხსნის საფუძველი თანხების დაზოგვაა.
ზემოთ აღწერილი სურათი გვაძლევს საფუძველს, ვთქვათ, რომ სერგეენკოს პოლიტიკის შედეგად ყველაზე მეტად სოფლად მცხოვრები მარტოხელა პენსიონერები ზარალდებიან, თუმცა, საარშებო შემწეობის შეჩერება შეეხო ყველა ასაკობრივ ჯგუფს და ყველა ოჯახს, მიუხედავად წევრთა რაოდენობისა.
მონაცემების მიხედვით, დავით სერგეენკო ღარიბ მოქალაქეებზე თვეში დაახლოებით 2 მლნ ლარამდე ზოგავს.
“ევროპული საქართველო” მიიჩნევს, რომ საარსებო შემწეობა უნდა აღუდგეს სოციალურად დაუცველ ყველა ოჯახს, რომელიც დევით სერგეენკოს პოლიტიკური მოტივაციის გამო უსახსროდ დარჩა და რომლის მდგომარეობას ბიძინა ივანიშვილის მთავრობის მავნებლური ეკონომიკური პოლიტიკა კიდევ უფრო გაუსაძლის ხდის,” _ განაცხადა ჭიაბერაშვილმა.
