იურისტი და უფლებადამცველი ლია მუხაშავრია „გურია ნიუსთან“ იუსტიციის უმაღლესი საბჭოს მიერ საკანონმდებლო ორგანოში წარდგენილ მოსამართლეთა სკანდალურ სიაზე საუბრობს. მუხაშავრია მიიჩნევს, რომ „ქართული ოცნება_დემოკრატიული საქართველოს“ თავმჯდომარე ბიძინა ივანიშვილმა გააცნობიერა, რომ უზენაესი ინსტანციის სასამართლოში ოდიოზური მოსამართლეების დანიშვნა ქვეყნისთვის კატასტროფული შედეგის მომტანი იქნებოდა, ამიტომ მოსამართლეებმა თვითაცილება მისივე განკარგულების შემდეგ მოითხოვეს.
_ ქალბატონო ლია, უზენაესი სასამართლოს მოსამართლეობის ათმა კანდიდატებმა თვითაცილება მოითხოვა, შესაბამისად, პარლამენტში მათი კანდიდატურები განხილვას აღარ ექვემდებარება. როგორც იუსტიციის არამოსამართლე წევრთა ნაწილი აცხადებს, საქმე გვაქვს სასამართლო სისტემის, ე.წ. კლანსა და ხელისუფლებას შორის ახალ გარიგებასთან თუ მოსამართლეთა შერჩევის პროცესი, თვითაცილების შემდეგ, გამჭვირვალედ წარიმართება?
_ უზენაესის უზენაესმა თავმჯდომარემ ბატონმა ბიძინამ მედიისა და არასამთავრობო ორგანიზაციების პროტესტი გაიგო. ივანიშვილმა გააცნობიერა, რომ უზენაეს სასამართლოში ოდიოზური მოსამართლეების დანიშვნა ქვეყნისთვის კატასტროფა იქნებოდა. დარწმუნებული ვარ, მოსამართლეებმა თვითაცილება ბიძინა ივანიშვილის განკარგულების შემდეგ მოითხოვეს. ეს სია მრავალწლიანი ტანჯვისა და შეთანხმებების შედეგად შეიქმნა, ამიტომ მოსამართლეები ასე იოლად უკან არ დაიხევდნენ. სამართლიანობის აღდგენის პროცესი დასრულებული ნამდვილად არ არის. ოდიოზურ მოსამართლეებს კვლავ ექნებათ მცდელობა, უზენაესი სასამართლოს უვადო მოსამართლეები გახდნენ. ამ ადამიანებს ამჯერად იმის შეეშინდათ, რომ შესაძლოა, იუსტიციის უმაღლესი საბჭოს გარეკვასაც გადაყვნენ და უკან ამის გამოც დაიხიეს.
_ იუსტიციის უმაღლესი საბჭოს არამოსამართლე წევრთა ნაწილი თვლის, რომ ამავე საბჭომ ახალ სიაში, შესაძლოა, საზოგადოებისთვის ნაკლებად ცნობილი, კლანურ მმართველობასთან დაკავშირებული მოსამართლეები შეიყვანოს. როგორ ფიქრობთ, შესაძლოა, ასეთ შემთხვევასთან გვქონდეს საქმე?
_ ცნობილი თუ ნაკლებად ცნობილი ოდიოზური მოსამართლეების თანამდებობებზე განმწესების მცდელობები იქამდე გაგრძელდება, სანამ „ქართული ოცნება“ პროცესის დასრულების მტკიცე პოლიტიკური ნებას არ გამოხატავს. ხელისუფლებაში არსებობს სურვილი იმისა, რომ სასამართლო სისტემა „ქართულმა ოცნებამ“ სრულად აკონტროლოს. პროცესები ასე იოლად არ დასრულდება, ამიტომ არ უნდა მოვდუნდეთ და პროტესტის გამოხატვა უნდა გავაგრძელოთ.
_ აღნიშნეთ, რომ „ქართულ ოცნებას“ სასამართლო სისტემაზე სრული კონტროლის დამყარება სურს, თუმცა მმართველი პარტიის წევრები აცხადებენ, რომ (მიუხედავად სისტემაში ოდიოზური მოსამართლეების არსებობისა) სასამართლო სისტემა პოლიტიკური გავლენებისგან გათავისუფლდა.
_ სრულიად გასაგებია, რომ ოფიციალური პირები ასეთ განცხადებებს აკეთებენ. ხელისუფლებამ გადაწყვიტა, რომ მოსამართლეები ჯიბეში ჩაისვას, რაც კარგად ჩანს. ჩვენ გვაქვს ინფორმაცია, როგორ ხდება უზენაეს სასამართლოში მოსამართლეების შერჩევა და დანიშვნა, პარალელურად ის პროცესები, რომლებიც უზენაესი სასამართლოს მოსამართლეების წარდგენას წინ უძღოდა, ევროსაბჭოს წევრი ქვეყნისთვის, რომელსაც პრეტენზია აქვს, რომ ევროკავშირის წევრი ქვეყანაც გახდეს, სამარცხვინოა.
_ არასამთავრობო ორგანიზაციები იუსტიციის უმაღლესი საბჭოს იმ წევრთა გადადგომას მოითხოვენ, რომლებმაც პარლამენტში მოსამართლეთა სკანდალური სიის წარდგენას დაუჭირეს მხარი. „ქართულ ოცნებაში“ არსებობს ნება იმისა, რომ აღნიშნული პირები სასამართლო სისტემას ჩამოშორდნენ ან სულ მცირე, პრივილეგირებულ თანამდებობებს აღარ იკავებდნენ?
_ ბუნებრივია, არა. ჩვენს პოლიტიკურ სისტემაში მმართველ საკვანძო თანამდებობებს ისეთი პოლიტიკოსები იკავებენ, რომლებსაც ხეირიანად არ ესმით, სახელმწიფო ხელისუფლება როგორ უნდა იმართებოდეს. არ ესმით, რა მნიშვნელობა აქვს სასამართლოს დამოუკიდებლობასა და მიუკერძოებლობას. კენწეროში მოკალათებული შემთხვევითი ადამიანები ფიქრობენ, რომ ყველაფერი შეუძლიათ, მათ შორის, სასამართლო სისტემაზე კონტროლის დამყარებაც, რაც სამარცხვინოა.
