გუშინ გერმანული „ჰამბურგის“ სპორტულმა დირექტორმა მიხაელ მუტცელმა განაცხადა, რომ საქართველოს ნაკრების მოთამაშე გიორგი ჩაკვეტაძის თამაშით კმაყოფილია:
„გიორგი ჩაკვეტაძით ძალიან კმაყოფილი ვარ. „გენტში“ იოლი პერიოდი არ ჰქონდა. ცხადი იყო, თავიდან არ შეეძლო და არ უნდა დაეწყო თამაში ძირითად შემადგენლობაში. სამაგიეროდ, მწვრთნელისგან და სამწვრთნელო შტაბისგან დიდი სათამაშო დრო მიიღო და კარგად გაისარჯა. ქართველი კარგი ბიჭია, მშვიდი, თავმდაბალი და გუნდს სრულად შეეწყო. სპორტული თვალსაზრისით კი, დარწმუნებული ვარ, რაც მეტს ითამაშებს, მით უფრო მოუმატებს“.
უკრაინის საფეხბურთო ასოციაცია აპირებს ყველა ჯილდო ჩამოართვას ეროვნული ნაკრების ყოფილ ფეხბურთელს ანატოლი ტიმოშჩუკს, რომელიც ამჟამად სანკტ-პეტერბურგის „ზენიტის“ სამწვრთნელო შემადგენლობაში საქმიანობს. ტიმოშჩუკს რუსეთის მიერ უკრაინაში წამოწყებული ომის დასაგმობად ხმა ერთხელაც არ აუმაღლებია.
განცხადება უკრაინის საფეხბურთო ასოციაციის ეთიკისა და სამართლიანი თამაშის კომიტეტმა გააკეთა, რომელიც შემდეგი ნაბიჯების გადადგის ინიციატივით გამოდის: ჩამოერთვას სამწვრთნელო პრო-ლიცენზია, რომელიც უკრაინაში აქვს მიღებული, ასევე ყველა სახელმწიფო ჯილდო და საპატიო წოდება, უკრაინაში მოგებული ყველა ტიტული (ჩემპიონატის ოქროსა და ვერცხლის მედლები, თასი, სუპერთასი) და მისი გვარი ამოღებულ იქნას ქვეყნის ნაკრებების ოფიციალური რეესტრიდან.
„ტიმოშჩუკი ეროვნული ნაკრების რეკორდსმენია ჩატარებული მატჩების რაოდენობით და უკრაინის, გერმანიისა და რუსეთის ჩემპიონიც არის. მოუგია ჩემპიონთა ლიგა და უეფას სუპერთასი. 2007-09 და 2013-15 წლებში ის რუსული „ზენიტის“ ღირსებას იცავდა, 2017 წლის შემდეგ კი იქვე მწვრთნელის რანგში მუშაობს. ომის დაწყების შემდეგ, უკრაინის ნაკრების ყოფილ კაპიტანს ერთი განცხადებაც კი არ გაუკეთებია მიმდინარე მოვლენებზე და არც „ზენიტის“ დატოვების გადაწყვეტილება მიუღია. მისი კიდევ ერთი ყოფილი კლუბი „ბაიერნი“ არაერთი განცხადებით გამოვიდა და უკრაინის მხარდასაჭერად აქციებსაც ატარებს, ტიმოშჩუკი კი ჩუმადაა და რუსეთში მუშაობას აგრძელებს. ამგვარად, ის შეგნებულად აზიანებს უკრაინული ფეხბურთის იმიჯს და ეთიკისა და სამართლიანი თამაშის კოდექსს არღვევს, რაც უპასუხოდ ვერ დარჩება“.
ლიეტუვური საკალათბურთო კლუბი „ჟალგირისი“ უკრაინის მხარდასაჭერად აქციას „ბარსელონასთან“ ევროლიგის საშინაო მატჩში გეგმავს, რომელიც 11 მარტს გაიმართება.
კაუნასელი კალათბურთელები კატალონიელებთან სათამაშოდ მოედანზე უკრიანის დროშის ფერების, ლურჯ-ყვითელი ფორმებით გავლენ. „ჟალგირისმა“ მოუწოდა თავის გულშემატკივრებს, თამაშზე ლიეტუვასა და უკრაინის დროშებით მივიდნენ და ყველა საშუალებით გამოხატონ უკრაინელთა მიმართ სოლიდარობა.
ცნობილი ჩოგბურთელი ენდი მარი უკრაინაში რუსული აგრესიის გამო აღშფოთებულია და გადაწყვიტა 2022 წლის ყველა საპრიზო თანხა, რასაც მოიპოვებს, გაეროს ბავშვთა ფონდ „UNICEF“-ს გადაურიცხოს.
„უკრაინაში მიმდინარე საომარი კონფლიქტის გამო 7,5 მილიონზე მეტი ბავშვი დაზარალდა. „UNICEF“-თან აქტიური თანამშრომლობა დავიწყე, რათა ბავშვებს დავეხმაროთ“, – განაცხადა მსოფლიოს ყოფილმა პირველმა ჩოგანმა და დიდი ბრიტანეთის ყველა მოქალაქეს მოუწოდა, „UNICEF“-ის ჰუმანიტარულ დახმარებას შეუერთდეს.
უკრაინაში მიმდინარე მოვლენებს ახლო წარსულში ცნობილი რუმინელი ფეხბურთელი გეორგე ჰაჯიც გამოეხმაურა. 57 წლის ჰაჯისათვის გაუგებარია, ვის სჭირდება ამდენი ფული, ძალაუფლება და რატომ შეიჭრა რუსეთი სხვის სახლში.
„მსოფლიოში არავის სურს ომი. ვინც უკრაინაში შეიჭრა, უნდა გაჩერდეს. ჩვენ მშვიდობა, სიმშვიდე, სპორტი, კულტურა, ჯანმრთელობა და ლამაზი ცხოვრება გვინდა. არ შეგვიძლია ბომბებით ცხოვრება და რასაც ვხედავთ, არ უნდა არსებობდეს.
ახლაც არ მჯერა, შოკში ვიყავი, როცა ომი დაიწყო. მინდა თუ არ მინდა, ფეხბურთზე მეტად ომზე ვფიქრობ. გთხოვთ, გაჩერდით, დედამიწაზე მშვიდობა უნდა იყოს! არ ვიცი, რა აწუხებს მას, ვინც თავს ესხმის, ვინც ომს იწყებს. რას ფიქრობს, რისი გაკეთება სურს? ვინ იკვებება ამით? რა გინდა? რატომ მოდიხარ ჩემს სახლში? არ მოგბეზრდათ ამდენი ფული და ძალაუფლება? ჩვენც, ნორმალურ ხალხსაც გვინდა ლამაზად ცხოვრება.
ეს იმედგაცრუებაა, ტანჯვაა, არ მჯერა და მტკივნეულია, რომ მსგავსი რამ 21-ე საუკუნეში მოხდა. 2 წელი პანდემია იყო, ახლაც აქაა და ამ დროს რუსეთმა ომი დაიწყო. ყველას სასიკეთოდ მოვუწოდებ, რომ გაჩერდეს! თუმცა, სამწუხაროდ, მე არაფერს წარმოვადგენ, რაც ვთქვი, არ მგონია გაითვალისწინონ. ყველა ქვეყანა ღირსია თავისი მთლიანობა ჰქონდეს, მდიდარმა ხალხმა ფული სპორტში, კულტურაში, კინოში, თეატრში, მსახიობებში უნდა ჩადოს და არა ომში, მიჭირს ამის გაგება“,– განაცხადა გეორგე ჰაჯიმ.
[sexy_author_bio]
