თოვლი, დაბალი ტემპერატურა და ძლიერი ქარი – ასე გამოიყურება უახლოესი დღეების ამინდის პროგნოზი, რომლის შესახებაც “გურია ნიუსი” გარემოს ეროვნული სააგენტოს მოკლევადიანი ამინდის პროგნოზის ბიუროს ხელმძღვანელ დოდო გვაზავას ესაუბრა.
“11-12 თებერვალს დასავლეთ საქართველოში, მათ შორის გურიაში, ზოგან მცირე ნალექია მოსალოდნელი, ზოგან თოვლჭყაპის სახით. მთიან და მაღალ მთიან რაიონებში სუსტი თოვა.
13 თებერვლიდან, შავი ზღვის ჩრდილოდასავლეთიდან ცივი ჰაერის მასები უახლოვდება მთელ საქართველოს, ამიტომ მოსალოდნელია 13 თებერვალს და 14 თებერვლის ღამის საათებში თოვა, ზოგან ძლიერი. 14 თებერვალს დღისით შედარებით გამოიდარებს და ეს გამოდარება 15 თებერვლის დღის პირველი ნახევრის ჩათვლით შენარჩუნდება. ჰაერის ტემპერატურა დაბლობ რაიონებში 0 გრადუსს მიუახლოვდება, ხოლო დღის მაქსიმალური ტემპერატურა +4, +6 გრადუსის ფარგლებში იმერყევებს. 13 თებერვალს იქნება +4 გრადუსი, 14 თებერვალს გამოდარების შესაბამისად +1, +2 გრადუსით მოიმატებს, 15 თებერვლის დღის მეორე ნახევრიდან სამხრეთ რაიონებისკენ კვირის ჩათვლით და იმ კვირის დასაწყისში მოსალოდნელია ტემპერატურის კლება, თოვა. დროგამოშვებით ძლიერი თოვა იქნება 16 -17 თებერვლის ღამეს, შეჩერდება 19 თებერვალს, ხოლო 20 თებერვლიდან კვლავ განახლდება. ღამის ტემპერატურა 0 გრადუსი იქნება დაბლობ რაიონებში, დღისით +4 გრადუსი, მთიან რაიონებში უფრო დაბალი ტემპერატურა დაფიქსირდება. დროგამოშვებით გაძლიერდება დასავლეთის მიმართულების ქარი, რამაც შეიძლება თოვის ფონზე ქარბუქი გამოიწვიოს. 13 თებერვალს იქროლებს ძლიერი ქარი, 14 თებერვალს შესუსტდება, 16-17-18 თებერვალს კი ისევ ძლიერი ქარია მოსალოდნელი”,_ ამბობს გვაზავა.
