ოზურგეთის მუნიციპალიტეტის სოფელ მაგნეტიტის სანაპიროს ქუჩაზე მცხოვრები სვეტა იასტრებოვა “გურია ნიუსს” ცოტა ხნის წინ დაუკავშირდა.
როგორც გამომცემლობის ოფიციალურ ფეისბუქგვერდზე იასტრებოვამ მოგვწერა, ყოველ გაწვიმებაზე მისი ეზო იტბორება და პრობლემები ექმნება. მისივე თქმით, პრობლემას სანიაღვრე არხების არარსებობა იწვევს.
“სახლიდან ვერ გავსულვართ. მცირეწლოვანი ბავშვი მყავს. ყველა გაწვიმებაზე ვიტბორებით სანიაღვრე არხის არქონის გამო. არავინ გვაქცევს ყურადღებას. აღარ ვიცით, ვის მივმართოთ. ისედაც სოციალურად დაუცველები ვართ და კიდევ ეს პრობლემა გვემატება. საქმის კურსშია მუნიციპალიტეტის ხელმძღვანელობა, მაგრამ რად გინდა _ მოვლენ, გადაუღებენ სურათებს და წავლენ”, _ ამბობს სვეტა იასტრებოვა.
მისივე თქმით, ქუჩა გააკეთეს, მაგრამ არხის არარსებობის გამო წყალი ქუჩიდან ეზოში ჩაედინება.
“ქუჩაში კი დააგეს გზა, მაგრამ არხი რომ არაა, ყოველ გაწვიმებაზე ქუჩები იტბორება და წყალი ქუჩიდან ეზოებში შემოდის.
ამას კიდევ კანალიზაცია ემატება, რამდენჯერაც გაწვიმდება, ჩვენს ეზოში ამოდის, _ გვწერს იასტრებოვა და ფაქტის ამსახველ ვიდეოს გვიგზავნის.
“გურია ნიუსი” დაუკავშირდა ოზურგეთის მუნიციპალიტეტის მერის წარმომადგენელს დაბა ურეკში დავით რობაქიძეს.
რობაქიძის თქმით, სანაპიროს ქუჩის პრობლემა მისთვის კარგადაა ცნობილი.
“2-დღიანმა გადაუღებელმა წვიმამ დიდი პრობლემები შექმნა, არა მარტო სანაპიროს ქუჩაზე, ზოგადად, მთელ ურეკში. მდინარეები ისეა ადიდებული, ზღვა ვეღარ იღებს.
რაც შეეხება კონკრეტულ პრობლემას, ამას თავად მოსახლეობა ქმნის _ ისინი საკანალიზაციო ჭებს თავს ხდიან რომ ქუჩაში არსებული წყალი გაატაროს, მაგრამ ივსება ჭები, გადმოდის და ჩადის ეზოებში. მოსახლეობამ სანიაღვრე არხები თავიანთ საკუთრებაში მოაქცია, არ წმენდენ და აქედან გამომდინარეც იქმნება პრობლემა. ზოგან გააუქმეს კიდეც. მთელი დღეა მე თითონ ტრაქტორით დავდივარ მთელ დაბაში, სოფელ-სოფელ, ყველას ვეხმარები შესაძლებლობის ფარგლებში. თითონაც სანაპიროს ქუჩაზე ვცხოვრობ და ვიცი, რა მდგომარეობაცაა მაქ”, _ გვითხრა დავით რობაქიძემ, რომლის თქმითაც, არსებული პრობლემა არ მოგვარდება თუ მოსახლეობამ უფრო მეტი პასუხისმგებლობა არ გამოიჩინა.
“მოსახლეობამ თუ უფრო მეტი პასუხისმგებლობა არ გამოიჩინა და არხი, რომელიც საკუთრებაში მიიღობა არ გაწმინდა, პრობლემა არ მოგვარდება. ზოგადად, სანიაღვრე არხების მოწესრიგების შესახებ საუბარი მიმდინარეობს და იმედია ურეკის მცხოვრებლებს ეს პრობლემა მალე მოუგვარდებათ”, _ გვითხრა დავით რობაქიძემ.
