გუშინ, გამოცემამ „La Gazzetta dello Sport“ საინტერესო ინფორმაცია გაავრცელა. გაზეთის ჟურნალისტების მტკიცებით, თუ „ნაპოლიმ“ მიმდინარე სეზონში იტალიის პირველობა და ამავდროულად ჩემპიონთა ლიგა ერთად მოიგო, შესაძლოა, ლუჩანო სპალეტიმ მთავარი მწვრთნელის პოსტი დატოვოს, რადგან ასეთი ფაქტის შემთხვევაში, 64 წლის სპეციალისტს ახალი გამოწვევები მოუნდეს.
„ნაპოლის“ თავდამსხმელი ვიქტორ ოსიმენი გუშინ იტალიურ მედიას ესაუბრა.
„მომწონს სპალეტის მენტალიტეტი, მას არ სჯერა, რომ რაიმე გაკეთებულია, სანამ ნამდვილად არ გაკეთდება. მთელ გასახდელს გადასცა ეს მენტალიტეტი, არავინ ბედავს იმის თქმას, რომ ყველაფერი კარგადაა. ვარჯიშზე ისე ვმუშაობთ, თითქოს ქვედა ლიგაში დაქვეითებისგან თავის დაღწევას ვცდილობთ. ეს არის ამ გუნდის მთავარი საიდუმლო და მენტალიტეტი.
ნეაპოლი ქალაქი არ არის, ქვეყანაა! სხვა ნებისმიერი ადგილისგან განსხვავებული გრძნობები და განცდებია. როდესაც იქ სათამაშოდ მიდიხარ, ხვდები, რატომ რჩებიან მოთამაშეები ამდენი წლის განმავლობაში და წასვლა არ სურთ. გულშემატკივრების სიყვარული წარმოუდგენელია, მათ ძალიან უყვართ ფეხბურთი, იქ მარადონა ნამდვილი კერპია. მსგავსი რამ არასოდეს მინახავს. ეს გვიჩვენებს, რომ როდესაც რაღაცას აკეთებ ამ ქალაქისთვის, როდესაც ტიფოზებს აბედნიერებ, ისინი უპირობოდ გიყვარებენ და მხარს გიჭერენ. როდესაც რთული პერიოდი გაქვს, ყოველთვის მაჩვენებენ თავიანთ სიყვარულს, ჩემს სახელს მღერიან. ერთადერთი გზა, რომ მათ სამაგიერო გადავუხადო, მოედნიდან ისინი გავახარო და ყველას ოცნების ახდენაა, რაზეც ამდენი წელია ოცნებობენ და ახლა ეს ჩემი ოცნებაც არის – რომ ჩემპიონები გავხდეთ“, – განაცხადა ვიქტორ ოსიმენმა.
მსოფლიოს ჩემპიონმა არგენტინის ნაკრებმა ამხანაგურ მატჩში პანამის ნაკრები დაამარცხა – 2:0. ლეო მესიმ კი კარიერაში მე-800 გოლი გაიტანა.
თამაშის 89-ე წუთზე მესიმ მეტოქის კარი ჯარიმით დალაშქრა და საბოლოო ანგარიში დააფიქსირა, ეს გოლი მისთვის საიუბილეო აღმოჩნდა.
მესის 701 გოლი საკლუბო დონეზე აქვს გატანილი, ხოლო არგენტინის ნაკრებში თავი 99-ედ გამოიჩინა.
მორიგი რეკორდი დაამყარა პორტუგალიელმა კრიშტიანუ რონალდუმ – ის გახდა ფეხბურთელი, რომელსაც სანაკრებო დონეზე ყველაზე მეტი მატჩი აქვს ჩატარებული.
ლიხტენშტეინის წინააღმდეგ რონალდუ პორტუგალიელთა ძირითად შემადგენლობაში გახლდათ და ეს იყო მისთვის ეროვნულ გუნდში ჩატარებული 197-ე მატჩი, რაც მსოფლიო ფეხბურთის რეკორდია.
რონალდუმ ბადერ ალ-მუტავას აჯობა, რომელმაც ქუვეითის ნაკრებში 196 თამაში აქვს ჩატარებული.
ჰარი კეინი კი ინგლისის ნაკრების ყველა დროის საუკეთესო ბომბარდირი გახდა. თავდამსხმელმა იტალიის ნაკრების წინააღმდეგ გამოიჩინა თავი და 54-ე გოლი გაიტანა, რაც რეკორდია.
კეინმა ამ შედეგს 81 მატჩში მიაღწია. მან უეინ რუნის გადაასწრო, რომლის აქტივში 53 გოლია.
გუშინ ცნობილი გახდა, რომ მიუნხენის „ბაიერნი“ მთავარ მწვრთნელ იულიან ნაგელსმანს ათავისუფლებს.
როგორც ირკვევა, 35 წლის მწვრთნელს ცუდი ურთიერთობა აქვს, როგორც ფეხბურთელებთან, ისე კლუბის ხელმძღვანელობასთან. ამასთან, დიდი გავლენა იქონია ბუნდესლიგის ბოლო ტურში „ლევერკუზენთან“ მარცხმა, რაც ნაგელსმანის დასათხოვად გადამწყვეტი ფაქტორი აღმოჩნდა.
ცნობილი გახდა, რომ უახლოეს დღეებში „ბაიერნს“ თომას ტუხელი ჩაიბარებს.
გუშინ ცნობილი გახდა, რომ კატალონიური „ბარსელონას“ თავზე ცა მოიღრუბლა. უეფამ კლუბის წინააღმდეგ გამოძიება დაიწყო ენრიკე ნიგრეირას საქმეზე, რომელიც ესპანელი მსაჯების კომიტეტის ყოფილი ვიცე-პრეზიდენტია.
„ბარსას“ ბრალად ედება მსაჯებისთვის დახმარების მიზნით სოლიდური თანხის გადახდა, რის გამოც საქმეში უეფაც ჩაერთო. ბრალის დამტკიცების შემთხვევაში დიდი შანსია, რომ კატალონიური გრანდი ერთი წლით ევროთასებიდან გარიცხონ, მაგრამ არაა გამორიცხული უფრო ხანგრძლივი დისკვალიფიკაციაც.
„უეფას სადისციპლინო რეგულაციების თანახმად, ეთიკისა და დისციპლინური ინსპექტორები დაინიშნენ გამოძიების ჩასატარებლად „ბარსელონას“ მხრიდან შესაძლო დარღვევის შესახებ, ე.წ. ნეგრეირას საქმეზე“, – ნათქვამია უეფას განცხადებაში.
ავტორი
