გუშინ, ახლო წარსულში ცნობილმა შვეიცარიელმა ფეხბურთელმა ვალონ ბეჰრამიმ განაცხადა, რომ ხვიჩა კვარაცხელიასა და ვიქტორ ოსიმენისთვის კარგი იქნება, თუ „ნაპოლის“ დატოვებენ.
„ისეთმა ფეხბურთელებმა, როგორებიც ოსიმენი და კვარაცხელია არიან, უმჯობესია გუნდი შეიცვალონ. მათ რაღაც ისტორიული გააკეთეს, შემდეგ კი, მწვრთნელისა და სპორტული დირექტორის წასვლით გუნდი დაშალეს. დე ლაურენტისიც ისეთ რამეებზე ამახვილებს ყურადღებას, რაც გუნდს საერთოდ არ ეხმარება, მაგალითად, პოლიტანოს ინტერვიუზე რაც გააკეთა“, – თქვა ბეჰრამიმ.
საიდუმლოს არ წარმოადგენს, რომ მიმდინარე წლის ზაფხულში ვიქტორ ოსიმენი ნეაპოლურ კლუბს დატოვებს. იყო საუბარი მისით ინგლისის პრემიერლიგის გუნდების დაინტერესებისა. ორი დღის წინ ცნობილი გახდა, რომ ნიგერიელის სურვილია, რომ კარიერა ფრანგულ „პსჟ“-ში განაგრძოს და მისთვის პრიორიტეტული ახლა სწორედ ესაა.
“ნაპოლი” ოსიმენს 120 მილიონი ევროს სანაცვლოდ შეელევა, პარიზულ გუნდს კი კილიან მბაპეს შემცვლელი ესაჭიროება.
გუშინ, “ლაციოს” ყოფილმა ნახევარმცველმა და ამჟამად საფეხბურთო კომენტატორმა მარკო პაროლომ განაცხადა, რომ დიდი ალბათობით, ზაფხულის სატრანსფერო ფანჯარაზე “ნაპოლის” კაპიტანი ჯოვანი დი ლორენცო დატოვებს.
“ნაპოლი” რთულ სიტუაციაშია. მდგომარეობას ისიც ამძიმებს, რომ კლუბს რთული კალენდარი დარჩა. მართალია, მათ გასულ ზაფხულს მხოლოდ კიმ მინ-ჯე დაკარგეს, თუმცა სპორტული დირექტორისა და მწვრთნელის შეცვლა კლუბზე უარყოფითად აისახა.
ვინ იქნება შემდეგი? ვფიქრობ, რომ სეზონის დასრულების შემდეგ “ნაპოლი” არა მხოლოდ ოსიმენს, არამედ ჯოვანი დი ლორენცოსაც დაკარგავს. დარწმუნებული ვარ, ჯოვანის ახალი გამოცდილების მიღება სურს”, – განაცხადა პაროლომ.
„ნაპოლის“ ამჟამინდელ პრობლემებს გამოცემამ „Spazio Napoli“ სპეციალური წერილი მიუძღვნა.
“კვარაცხელიას გარეშე მარცხმა ყველაფერი გამოააშკარავა და შეტევის ხაზის არაერთი პრობლემა დაგვანახა. ქართველი შემტევი “ნაპოლის” რიგითი ფეხბურთელი არასოდეს არ იქნება. ერთი სეზონის განმავლობაში “კვარადონას” მეტსახელი დაიმსახურა, რადგან გულშემატკივართა საყვარელი მოთამაშეა.
“ატალანტასთან” მატჩმა ზუსტად წარმოაჩინა, რომ “ნაპოლი” “კვარაზე” დამოკიდებულია. მას შეუძლია იერიშები არაპროგნოზირებადი გახადოს და შემთხვევითი არაა, რომ სწორედ ის იტანს გოლებს და პარტნიორებისთვის მომენტებს ქმნის. რამდენიმეჯერ პასიურიც ვიხილეთ, მაგრამ ბოლო შეხვედრებში გასული სეზონის დონეს მიუახლოვდა. სამწუხაროდ, საქართველოს ნაკრებში საბერძნეთთან ევროპირველობაზე გასასვლელი პლეი-ოფის ფინალში ტრავმა მიიღო“, – დაწერა გამოცემამ.
გიორგი მამარდაშვილი კი დიდი ხანია ძლიერი ევროპული კლუბების სამიზნეშია. ცნობილია, რომ მამარდაშვილის სარფიანად გაყიდვით დაინტერესებულია „ვალენსიაც“ და თუკი აქამდე ტრანსფერიდან 30 მილიონი ევროს მიღებას იმედოვნებდნენ, ახლა ალბათ ფასსაც მოუმატებენ.
ბოლო ინფორმაციით, შესაძლოა „მილანში“ მაიკ მენიოს ადგილი გიორგი მამარდაშვილმა დაიკავოს.
მაიკ მენიოს კონტრაქტი „მილანთან“ 2026 წელს იწურება. ახლო მომავალში მილანური გუნდი მეკარის გარემოცვასთან დაილაპარაკებს, რათა ხელშეკრულება 2028 წლამდე გაგრძელდეს. ფრანგი მეკარე, რომელიც სეზონში 2,8 მილიონ ევროს გამოიმუშავებს, კლუბისგან 8 მილიონს ითხოვს. „მილანში“ მზად არიან, მენიოს ხელფასი გაზარდონ, მაგრამ არა იმდენად, რომ ე.წ. ლეაოს ზღვარს (7 მილიონი ევრო ყველაფრის გათვალისწინებით) გადააჭარბონ.
თუკი ახალ კონტრაქტზე შეთანხმება ვერ მიიღწევა, „მილანი“ ფრანგ მეკარეს 70-80 მილიონ ევროდ გაყიდის, მის ადგილზე პირველ სამიზნედ კი გიორგი მამარდაშვილი ეყოლება.
2000 წელს დაბადებული ქართველი კარის დარაჯის ფასი 40-50 მილიონს შორის მერყეობს.
ავტორი
