გენერალური პროკურორის ვაკანტურ თანამდებობაზე ირაკლი შოთაძის კანდიდატად წარდგენას, რომელსაც გენერალური პროკურორის თანამდებობა ადრეც ეკავა, მაგრამ პოსტიდან 2018 წელს წავიდა, საქართველოს პარლამენტის თავმჯდომარე, არჩილ თალაკვაძე გამოეხმაურა.
თალაკვაძის განცხადებით, ირაკლი შოთაძის საქმიანობის დროს საზოგადოებას არაერთი მნიშვნელოვანი საქმე ახსოვს, რომელიც გამოძიებული იყო ეფექტურად და დროულად.
„იყო კონკრეტული საქმეები, სადაც მძიმე დანაშაულთან გვქონდა საქმე. იყო განსაკუთრებით მძიმე დანაშაულები, მკვლელობის შემთხვევები და ის საქმეებიც, სადაც საზოგადოების ინტერესი იყო მაღალი. ეს იყო ოჯახში ძალადობის ნიადაგზე ჩადენილი მკვლელობი; ორგანიზებულ დანაშაულის შემთხვევები; არაერთი დანაშაული, ნარკოტრეფიკინგის შემთხვევები, სადაც იყო ორგანიზებულ დანაშაულთან ბრძოლა. პროკურატურა მისი ხელმძღვანელობით, ამ საქმეებს ჩემი აზრით, ეფექტურად ახორციელებდა, ებრძოდა ამ დანაშაულს.
რაც შეეხება მის გადაწყვეტილებას გადადგომასთან დაკავშირებით, მაშინაც, როდესაც საზოგადოებას ჰქონდა კითხვები მის მიმართ, მან ასევე მიიღო ღირსეული გადაწყვეტილება და დატოვა თანამდებობა ნიშნად იმისა, რომ თანამდებობა არ არის ყველაზე მთავარი. სტატუსები არ არის ყველაზე მთავარი ჩვენი ხელისუფლების პირობებში და მაშინ ბატონმა შოთაძემ ღირსეული გადაწყვეტილება მიიღო. შესაბამისად, არ გამოვრიცხავ, რომ სწორედ მისი კანდიდატურა იყოს ერთ-ერთი, ვინც წარმოდგენილი იქნება პარლამენტში განსახილველად. ვფიქრობ, უმრავლესობის მხრიდან მის კანდიდატურას ნამდვილად ექნება მხარდაჭერა“,_ განაცხადა თალაკვაძემ.
შოთაძე გენერალური პროკურორობის კანდიდატად 16 იანვარს საპროკურორო საბჭოს „ტექნიკურმა უნივერსიტეტმა“ წარუდგინა. ამ დროისთვის, გენერალური პროკურორის ვაკანტურ თანამდებობაზე 14 კანდიდატია წარდგენილი.
ყოფილმა გენერალურმა პროკურორმა, ირაკლი შოთაძემ, თანამდებობის დატოვების შესახებ გადაწყვეტილება მას შემდეგ მიიღო, რაც სასამართლოს განაჩენის თანახმად, ხორავას ქუჩაზე მომხდარი მკვლელობის საქმეზე განზრახ მკვლელობის ბრალდებით პროკურატურის მიერ წარმოდგენილი ორი ბრალდებულიდან დავით სარალიძის მკვლელობა არც ერთს არ დაუდასტურდა.
