მიუხედავად იმისა, რომ ხელისუფლების მხრიდან დიდი თანხები იხარჯება ინფრასტრუქტურის კუთხით, ლანჩხუთის სოფლებში მაინც საკმაოდ მწვავე პრობლემებია, რაც ერთი მხრივ მიუთითებს გაკეთებული საქმის არაეფექტიანობაზე.
ფაქტია, რომ ხშირ შემთხვევაში, გახარჯული თანხები ვერ აგვარებს იმ პრობლემებს, რომლებიც მოსახლეობას რეალურად აწუხებს. ამის მაგალითად ბევრი ფაქტის მოყვანაა შესაძლებელია, თუმცა, ამ ჯერზე ერთს დავჯერდებით.
ლანჩხუთში, სუფსის ადმინისტრაციული ერთეულის მოსახლეობა ათეული წლებია ხაზგასმით აღნიშნავს, რომ სოფლებში მწვავედ დგას გზის პრობლემები და არის შემთხვევები, შესაბამისი სარეაბილიტაციო სამუშაოებისთვის თანხები დაიხარჯა, პრობლემა კი მაინც მოუგვარებელი დარჩა.
ფაქტია, ამ დასახლების რელიეფი იმდენად დაბალია ზღვის დონიდან, რომ ნალექის მცირე რაოდენობის შემთხვევაშიც კი, გარკვეული დისკომფორტი იქმნება. შესაბამისად, ეს ფაქტორი თავიდანვე გასათვალისწინებელია და ამა თუ იმ სამუშაოს შესრულების შემთხვევაში მუნიციპალიტეტის სხვა სოფლებისგან განსხვავებით უფრო სპეციფიური და ეფექტური ნაბიჯების გადადგმაა უპრიანი.
ზუსტად ზემოთ თქმული ფაქტორის გათვალისწინებით თუ ჭკვიანურად არ დაიგეგმა სანიაღვრე არხების მოწყობა და სამუშაოები მხოლოდ მოვალეობის მიზნით არ შესრულდა, პრობლემა ყოველთვის მოუგვარებელი დარჩება. ამის დასტურად, სხვადასხვა დროს, მერიის ოფიციალურ გვერდზე მოქალაქეთა მიერ გაკეთებული კომენტარებიც გამოდგება:
“ვამაყობთ თქვენი გაკეთებული საქმეებით! გზა გვაქვს ისეთი საოცარი, რა გვაქვს საწუწუნო. ორი “ლაფათქა” მიწა ამოყარეთ და მაგაში დახარჯეთ, ხო, თორმეტი ათასი ლარი?! უნამუსობასაც ხომ საზღვარი?! აქ ვიძირებით ჭაობში, გზა არა, კვალი არა და აქ ყოყოჩობთ და მოგწონთ თავი. ამოცანა გვეკითხება, სად არის სანიაღვრე, რომელზეც დაიხარჯა გამოყოფილი თანხა?! იქნებ, მომასწროთ ცოტა რამის შეცვლა, ნაომარს რომ გავს ყველაფერი. გავლა შეუძლებელია, სამარცხვინო მდგომარეობაა, ვერც მანქანით გაივლი და ვერც ფეხით. დროა მიხედოთ ამ პრობლემას ყველამ ერთად”, _ წერენ ლანჩხუთელები.
სუფსის ადმინისტრაციულ ერთეულში შემავალი სოფლის, ხიდმაღალას მაგალითზე თუ ვიმსჯელებთ, გაგონილს ნანახი ბევრად აღემატება, რა თქმა უნდა, უარესობის მხრივ. მიუხედავად იმისა, რომ როცა “გურია ნიუსი” ადგილზე იმყოფებოდა, ორი დღის გამოდარებული იყო და მზიანი ამინდებიც იდგა, სოფლის გზა უზარმაზარი წყლის გუბეებით იყო დაფარული. როგორც ადგილობრივები ამბობენ, აქ წყალი მხოლოდ პაპანაქება ზაფხულში შრება.
სოფლის იმ ნაწილში, სადაც მოსახლეობის თხოვნით, “გურია ნიუსი” იმყოფებოდა, სანიაღვრე არხი ან საერთოდ არაა, ან რაცაა, ისიც მოუწესრიგებელია და დამატებით პრობლემებს უქმნის მოსახლეობას.
“გუბეც არაა ეს, ტბაა, ტბა! ქათმები წყალში არ ჩაგვეხრჩოსო და იხვების მომრავლებას მივყავით ხელი. გადასარევად გრძნობენ თავს _ მთავარია, წყალი არ მოაკლდებათ.
საკუთარი თვალით ხომ ხედავთ, რა დღეში ვართ?! დარში რამხელა გუბეებია მთელს ქუჩაზე და წარმოიდგინეთ წვიმაში რა მდგომარეობაა აქ _ ეზოებში შემოდის წყალი. კატასტროფაა! ყელიანი რეზინის ჩექმა თუ არ ჩაიცვი, ისე სახლის ზღურბლს იქეთ ვერ გადადგამ ფეხს. ასფალტი და ბეტონის გზა კი არა, სანიაღვრე არხების გაკეთება გვაქვს სანატრელი, რომ ყოველი გაწვიმებისას წყალი ეზოებში არ გვივარდებოდეს და არ გვტბორავდეს.
სირცხვილია, 21-ე საუკუნეში ამ დღეში ვიყოთ ხალხი და ელემენტარული პრობლემების მოგვარებას ვითხოვდეთ. როდის ინებებს ჩვენი ხელისუფლება და სუფსასაც მოაქცევს ყურადღებას. გვითხრან მაინც! რა დანაშაული გვაქვს ამისთანა, წყალში რომ გვახრჩობენ, თუ საერთოდ არ ვართ ლანჩხუთის რუკაზე?! დავდივართ და ვცხოვრობთ ლაფსა და ტალახში, როდემდე გაგრძელდება ასე?! არჩევნების წინ ერთი მანქანა ხრეში მოიტანეს და ახლაც ისე ყრია, როგორც დატოვეს. ან მოხრეშვა რას შველის, თუ არხი არ გაიყვანეს წყალი რომ გაატაროს”, _ ამბობს უგზოობით შეწუხებული სოფელ ხიდმაღალას მოსახლეობის ნაწილი, რომელთა თქმითაც, მათი უბნის პრობლემის თაობაზე ადგილობრივი ხელმძღვანელობა კარგადაა ინფორმირებული.
“სოფლის დეპუტატმა თუ მერის წარმომადგენელმა კარგად იცის ჩვენი პრობლემის თაობაზე, ყველა საქმის კურსში გვყავს ჩაყენებული”, _ ამბობს მოსახლეობა.
განსაკუთრებით რთულ მდგომარეობაში კი სოფლის ამ ნაწილში მცხოვრები დემურიების ოჯახია, რომელთა ეზოს შუაში სანიაღვრე არხი გაედინება. ავდარში არხი წყალს ვერ ატარებს, დემურიების ეზო წყლით იფარება და ფაქტობრივად, გამოუსადეგარი ხდება, რომ ზაფხულში ელემენტარულად ბოსტანი მაინც დათესო და რაღაც მოსავალი მოიყვანო.
დემურიების დატბორილი ეზო
“სოფლის სასაფლაოს ქვემოთ რაც ტერიტორიაა, იქედან ნაწრეტი ყველა წყალი ამ არხში მოედინება, რომელიც ჩემს ეზოში, სახლიდან რამდენიმე მეტრში გადის. საწინააღმდეგოც არაფერი მაქვს, მაგრამ ფაქტია, რომ არხი წყალს ვერ ატარებს და ყოველი გაწვიმების დროს ეზო მეტბორება, ხშირად სახლშიც შემოდის წყალი. ერთხელ იყვნენ მოსულები, ტექნიკას ვერ შემოვიყვანთო და ბარითა და ნიჩბებით გაწმინდეს, მაგრამ მარტო ჩემს ეზოში. ეს არხი, ახალი ავტობანი რომ კეთდება, იქ გვირაბში უნდა გავიდეს, მაგრამ წყალს ვერ ატარებს და ნალექის დროს წყალი ჩემი ეზოსკენ მოდის. ალტერნატიული არხიც გაკეთდა ვითომ, მაგრამ პირიქით, ჩემთვის უარესი გამოდგა _ წყალს ისიც ვერ ატარებს და ყოველი გაწვიმებისას ის წყალიც ჩემს ეზოში ჩამოდის. მე ყველანაირ ვარიანტზე თანახმა ვარ, თუნდაც ალტერნატიული არხი გაკეთდეს, როგორც ხშირ შემთხვევაში არის ხოლმე. ეზოების წინ გააკეთონ არხები, ან ჩემს ეზოში გამავალი არხი მოაწესრიგონ. მე ყველანაირ პირობაზე თანახმა ვარ, ოღონდ ეზო არ მეტბორებოდეს და წყალი სახლში არ მივარდებოდეს”, _ ამბობს ოჯახის უფროსი.
იგეგმება თუ არა ზემოთ ნახსენები პრობლემების მოგვარების მიზნით რაიმე ქმედითი ღონისძიებების გატარება, ამის გასარკვევად “გურია ნიუსი” უპირველესად სუფსის ადმინისტრაციული ერთეულის წარმომადგენელს ლანჩხუთის საკრებულოში ია მოქიას დაუკავშირდა.
“მე, პირადად, მქონდა შეხება ამ უბნის მოსახლეობასთან. რთული სიტუაციაა სუფსაში ყველგან. იქ ნამდვილად ჩასატარებელია სამუშაოები _ სანიაღვრეებიც მოსაწესრიგებელია და გზის საფარიც. მართლაც კატასტროფულ მდგომარეობაშია. ვმუშაობთ, რომ რამენაირად მალე და მოკლე ხანში მოგვარდეს ეს პრობლემა. მერიაში ჩემგან მიწოდებულია ამის თაობაზე ინფორმაცია. როგორც კი გამოიდარებს, ამ უბანში, მინიმუმ, გზის მოხრეშვითი სამუშაოები დაიწყება.
სანიაღვრე არხებიც გაიწმინდება, სადაც ამის საჭიროებაა.
დემურიების ოჯახსაც აუცილებლად შევხვდები პირადად. ცნობისთვის, მოკლე ხანში მელიორაციასაც ველოდებით, დიდი არხებია გასაწმენდი, სწორედ ამ დიდი არხების გამო იტბორება ხიდმაღალა. ვფიქრობ, ცოტა მაინც მოგვარდება ამ წელიწადში რაღაცეები”, _ გვითხრა ია მოქიამ და მეტი დეტალის გასარკვევად მერიასთან გადაგვამისამართა.
მერიის ინფრასტრუქტურის სამსახურის უფროსის ლევან ჩხაიძის თქმით, ამ მომენტისთვის ზემოთ ნახსენები პრობლემის მოგვარების თაობაზე კონკრეტულად რაიმეს თქმა ჭირს.
“ამ მომენტისთვის, კოვიდის გავრცელების გამო, ბევრი თანამშრომელი არ დადის სამსახურში, რომ რაიმე პრობლემა შევისწავლოთ და დასკვნები დავდოთ.
ზოგადად, სუფსაში ერთი გზის გაკეთება იგეგმება _ სადაც კატასტროფული მდგომარეობაა, ის ქუჩა აირჩევა. ჯერ პროექტიც არაა მომზადებული და კონკრეტულად ვერაფერს ვიტყვი, შეიძლება, ეს ქუჩა გაკეთდეს, თუ მართლაც კატასტროფული მდგომარეობაა იქ”, _ გვითხრა მერიის ინფრასტრუქტურის სამსახურის უფროსმა.
[sexy_author_bio]
