თბილისის მერიის საზოგადოებასთან ურთიერთობის სამსახურის გავრცელებული ინფორმაციითმ კახა კალაძე 20 ივნისის მოვლენების გამოძიებაზე აცხადებს: “დაველოდოთ, თუ რა კონკრეტიკა და მტკიცებულებები გამოიკვეთება”.
ოფიციალური ინფორმაციით, თბილისის მერი კახა კალაძე მიიჩნევს, რომ 2019 წლის 20 ივნისის მოვლენებთან დაკავშირებით, რუსთაველის გამზირზე მიმდინარე საგამოძიებო მოქმედებებთან და იმდროინდელი შს მინისტრის გიორგი გახარიას შესაძლო პასუხისმგებლობასთან დაკავშირებით წინასწარი შეფასებების გაკეთება რთულია.
როგორც მან ამ საკითხზე დღეს მედიასთან საუბრისას განაცხადა, საგამოძიებო პროცესი მნიშვნელოვანია და სტრასბურგის სასამართლოც ამას მოითხოვს.
„დაველოდოთ გამოძიებას, წინასწარ რაიმე შეფასების გაკეთება რთულია. უნდა დაველოდოთ, თუ რა კონკრეტიკა და რა მტკიცებულებები გამოიკვეთება. ეს მნიშვნელოვანია, სტრასბურგის სასამართლოც მოითხოვს, რომ უნდა ჩატარდეს შესაბამისი საგამოძიებო მოქმედებები“, – აღნიშნა კახა კალაძემ.
რაც შეეხება გიორგი გახარიას განცხადებას იმის შესახებ, რომ ის მზად არის ბრძოლისთვის ნებისმიერი ფორმით და ნებისმიერი ადგილიდან და ახლა ის ეფექტური სწორედ ბრიუსელშია, კახა კალაძემ აღნიშნა, რომ პოლიტიკოსი, უპირველეს ყოვლისა, საკუთარ ქვეყანაში უნდა იყოს ეფექტური.
„მე ასე წარმომიდგენია, რომ პოლიტიკოსები და პოლიტიკური პარტიები, პირველ რიგში, ეფექტურები უნდა ვიყოთ ჩვენს ქვეყანაში, ჩვენი ქვეყნისთვის და ჩვენი ხალხისთვის. ამ ადამიანების შინაარსი და ხედვა აბსოლუტურად სხვა არის. ისინი არიან აგენტურის წარმომადგენლები, ემსახურებიან სხვა ქვეყანას და სხვა ქვეყნის მთავრობებს. შესაბამისად, მათ არაფერი ესაქმებათ ჩვენს ქვეყანასთან და ქართველ ხალხთან“, – განაცხადა ოფიციალური ინფორმაციით თბილისის მერმა.
