ამ წუთებში პარლამენტის შენობის წინ შეკრებილ ოპოზიციის მხარდამჭერებს ევროპული საქართველოს ერთ-ერთი ლიდერი დავით ბაქრაძე მიმართავს:
„რა არის გამოსავალი? სახლებში წავიდეთ და 4 წელი ამ ქვეყანას ჰყავდეს არალეგიტიმური მთავრობა თამარ ჟვანიას მანდატით? დავიქცევით ხალხო! ორ წელიწადში, საერთოდ დავიქცევით და ქვეყანა აღარ გვექნება!“ „2 კვირა გავიდა არჩევნებიდან და თუ ვინმეს ეგონა, რომ ხალხი დაიღლებოდა, ქუჩაში აღარ გამოვიდოდა, პანდემიის შეეშინდებოდა, ძალიან მწარედ გაუცრუვდა იმედი. ეს არ არის პიროვნული ბრძოლა, ეს არ არის პარტიული ბრძოლა, თითოეული თქვენთაგანი გამოდის აქ ჩვენი ქვეყნის და ჩვენი შვილების მომავლისთვის და ასეთი ადამიანები არ დავიღლებით, არ დაიღლებიან და ბოლომდე მივიყვანთ ამ ბრძოლას ჩვენი ქვეყნის გამარჯვებით. მეგობრებო, მინდა მათ შორის იმ ადამიანებს მივმართო, ვინც ახლა ეკრანებიდან გვიყურებს შეშფოთებული და ამბობს – „რა ხდება, გვინდა ქვეყანაში არეულობა?“ „პანდემია გვიტევს, ეკონომიკა გვენგრევა, რა ხდება ქვეყანაში?“ მინდა თითოეულ ასეთ ადამიანს მოგმართოთ, ამ ქვეყანაში თითოეული ჩვენგანის მომავალს სჭირდება ქვეყნის სტაბილური განვითარება და წინსვლა და ამას ვერასდროს მოიტანს გაყალბებული არჩევნები და ხელისუფლება, რომელიც მოსახლეობის ნახევრის თვალში არის არალეგიტიმური და უკანონო“, – აღნიშნა ბაქრაძემ.
მისივე თქმით, საქართველოში უნდა ჩატარდეს თავისუფალი არჩევნები, სადაც თითოეულ ხმას ექნება მნიშვნელობა.
„მინდა ვიცოდე, ვის ვანდობ ჩვენი შვილების მომავალს, რომლებმაც ამ ქვეყანაში უნდა იცხოვრონ. მე შეიძლება არ მომეწონოს არჩევნების შედეგები, მაგრამ პატივი ვცე, რადგან ვიცოდე, რომ ეს არის თავისუფალი არჩევანი. არ ვცემ და ვერ ვცემ პატივს, როცა ვხედავ, რომ თამარ ჟვანია ცხვირწინ მიყალბებს არჩევნებს, ამას არ ვაღიარებთ. მოგმართავთ ყველას, ვინც სახლში უყურებთ ჩვენს ბრძოლას, ეს არის ბრძოლა თითოეული თქვენგანისთვის და იმისთვის, რომ საქართველო იყოს სტაბილური ქვეყანა, იმისთვის, რომ საქართველოში ერთხელ და სამუდამოდ დასრულდეს დაპირისპირება, გაყოფა და ერთმანეთის ჭამა, ეს არის ბრძოლა იმისთვის, რომ საქართველოში ერთხელ და სამუდამოდ დასრულდეს ტყუილი და ძალადობა და თქვენ გქონდეთ არჩევანის უფლება. დღეს საქართველო არის ერთი ადამიანის ქვეყანა და ჩვენ გვინდა, რომ საქართველო იყოს თითოეული ადამიანის ქვეყანა“ „რა არის გამოსავალი? სახლებში წავიდეთ და 4 წელი ამ ქვეყანას ჰყავდეს არალეგიტიმური მთავრობა თამარ ჟვანიას მანდატით? დავიქცევით ხალხო! ორ წელიწადში, საერთოდ დავიქცევით და ქვეყანა აღარ გვექნება!“ – განაცხადა ბაქრაძემ.
