ოზურგეთის მერს კონსტანტინე შარაშენიძეს მორიგ ბრალდებებს უყენებს „ნაციონალური მოძრაობის“ ადგილობრივი ლიდერი დავით მჟავანაძე.
„ოზურგეთის ვითომ დამოუკიდებელი მერი, რომ კორუფციაში ჩამპალია და ყარს ამაზე ამჯერად აღარაფერს ვამბობ. მე უფრო ის მაინტერესებს, როდესაც მერი იპარავს და კანონს არღვევს ამ დროს რას აკეთებს ქართული ოცნება. ბუნებრივია არც არაფერს, რადგან დამნაშავე მერი თავად არის დამნაშავე ოცნების სახე და ის ფსევდო დამოუკიდებელი მერის როლს თამაშობს.
ამ ფაქტს კიდევ ერთხელ ადასტურებს მდინარე ბჟუჟზე დღეს განვითარებული მოვლენები. როგორც კი ინფორმაცია გავავრცელე მერის მხრიდან ქვა -ღორღის უკანონოდ მოპოვების შესახებ, რამდენიმე წუთში ადგილზე გარემოს დაცვის სამსახური გამოცხადდა, მაგრამ კონკრეტული პირების დაჯარიმების ან სხვა სახის ღონისძიების გატარების ნაცვლად, სამართალდამრღვევებს ქართულ ჯიგრულ პონტში თხოვეს დროებით საზოგადოების თვალის ასახვევად უკანონო სამუშაოები შეეჩერებინათ“, _ დაწერა ფეისბუქის საკუთარ გვერდზე “ნაციონალური მოძრაობის” ოზურგეთის ორგანიზაციის ლიდერმა, დავით მჟავანაძემ.
დავით მჟავანაძის ამ ბრალდებებს ოზურგეთის მერიამაც ფეისბუქი საშუალებით უპასუხა, სადაც აღნიშნულია, რომ ვეხმაურებით “ნაციონალური მოძრაობის” ოზურგეთის ორგანიზაციის ლიდერის, დავით მჟავანაძის მიერ სოციალურ ქსელში გამოქვეყნებულ ინფორმაციას, სადაც აღნიშნულია, რომ მდინარე ბჟუჟის ტერიტორიიდან მოპოვებული ქვა-ღორღი ხმარდება მუნიციპალიტეტის საჭიროებას.
„ის ოზურგეთის მერს კონსტანტინე შარაშენიძეს ქვიშა-ხრეშის უკანონო მოპოვებასა და კორუფციაში ადანაშაულებს. საზოგადოება რომ შეცდომაში არ შევიდეს განვმარტავთ: მდინარე ბჟუჟის ტერიტორიიდან მოპოვებული ქვა-ღორღი ხმარდება მუნიციპალიტეტის საჭიროებას, რომლის დამადასტურებელ ფოტო და ვიდეომასალას აქვე განვათავსებთ.
აღნიშნული ინერტული მასალა ხმარდება მუნიციპალიტეტის საკუთრებაში არსებული მძიმე ტექნიკის განსათავსებელი ავტოფარეხის მოწყობას გენადი გიორგაძის ქუჩაზე.
გამომდინარე იქიდან, რომ მუნიციპალიტეტს გააჩნია 38 ერთეული მძიმე ტექნიკა და აქამდე ის განთავსებული იყო კერძო ტერიტორიაზე, ოზურგეთის მუნიციპალიტეტის “მომსახურების ცენტრის” მიმდებარედ არსებული ტერიტორია, რომელიც ირიცხებოდა ეკონომიკის სამინისტროს ბალანსზე, მუნიციპალიტეტის თხოვნით გადმოეცა ოზურგეთის მუნიციპალიტეტს, სადაც მოეწყობა ავტოფარეხი და განთავსდება სხვადასხვა სახის ტექნიკა, როგორც დასუფთავების მანქანები, ასევე GCB – ის მარკის ტრაქტორები!“- წერია ოზურგეთის მერიის კომენტარში.
